مجلة الفنون المسرحية
استعراضية من فصل واحد
مشهد استاد رياضي ... الملعب ثم التراك الذي يفصل الملعب عن المدرجات ... والمدرجات وتحتها غرف اللاعبين وشريط الإعلانات المتحركة وعلي الجانب عمود يحمل شاشة إعادة عرض الاهداف
المناسبة الحفل الختامي لفعاليات رياضية دولية تنقله المحطات الفضائية الاجنبية وبعدها تنقل المبارة النهائية
الحدث اختفاء مخرج الحفل الختامي ومؤلفه وملحنه في ظروف غامضة ومحاولة انقاذ الاستعراض بواسطة المذيع الرياضي الغير مختص بهذا النشاط ثم ظهور المخرج ليشرح سبب الاختفاء الغامض
الشخصيات حسب الظهور
طلعت المذيع الرياضي من ارض الملعب
المخرج التلفزيوني ويظهر بالصوت من عربة البث مشجعا طلعت
شرطي مصطحبا شاب احضر سيناريو الحفل المفقود وقدمه لطلعت
محمد رشاد مخرج الحفل المختفي والذي يحضر فجأة بعد بداية الاستعراض ويشرح أسباب اختفائهم
مؤلف العرض يحضر بعده ليكشف اساب الاختفاء الحقيقية
الملحن والذي يمتنع عن الكلام
علي ارض الملعب نشاهد المذيع الرياضي يمسك بميكرفون ويضع في اذنه سماعات الرأس مع الميكرفون للتواصل مع المخرج التلفزيوني والاستديو
المذيع الرياضي يتحدث في الميكرفون وهو يتحرك لينقل للمشاهدين معلومات عن حفل الافتتاح: سيداتي انساتي سادتي حتي الان لم يحضر مخرج الحفل ولا الملحن ولا مؤلف الاستعراض والغريب ان هواتفهم النقالة غير متاحة وقد تكون مغلقة بالرغم من تواجد الفرق الفنية منذ الصباح وشاهدتهم يؤدون بعض البروفات بملابس العرض في انتظار اوامر المخرج ليبدأ الحفل الختامي والوقت يمر والقمر الاصطناعي ينقل للعالم صورة الملعب الخالي من اي فعاليات وبالطبع لن نسلم من التعليقات السلبية خاصة وموعد المباراة النهائية يقترب ولم تبدأ فقرات الحفل الختامي ... نسمع صوت
المخرج التلفزيوني يتحدث للمذيع الرياضي: ازاي ح نتغلب علي مشكلة عدم وجود استعرضات في حفل الختام
المذيع الرياضي: لو فشلنا ستحرم الدول النامية من اقامة الفعاليات العالمية لسنوات
انا شايف شرطي قادم في اتجاهي بصحبة شاب
الكاميرا تنقل مشهد شرطي والي جواره شاب يحمل أوراق غير مرتبة يقع بعضها علي الأرض ويقوم بجمعها
الشرطي للمذيع : حضرتك كابتن طلعت ؟
المذيع : نعم
الشرطي: الشاب ده عنده اخبار بخصوص اختفاء مخرج الاستعراض ومعاه أوراق هامة عايز يسلمها
الشاب يشرح: كنت سايق سيارتي في الطريق السريع وشاهدت سيارة تنقلب عدة مرات وقمت بنقل المصابين الي سيارتي واحد منهم قبل ما يفقد الوعي طلب مني جمع الاوراق التي تناثرت في الطريق وتوصيلها الي اي مسئول في الاستاد لانها سيناريو الحفل الختامي وصلتهم للمستشفي وحضرت لتسليم الاوراق
طلعت: يأخذ منه الأوراق ربنا يبارك فيك ويكتر من أولاد الحلال امثالك ... كام واحد كان في السيارة المنكوبة؟
الشاب: كانوا تلاتة واحد منهم معاه الة موسيقية
والتلاتة حالتهم خطيرة
طلعت ينظر الي الاوراق المتسخة والممزقة وغير المرتبة في حيرة ماذا سيفعل بها
طلعت للشرطي وللشاب: اذا كان عندك وقت انتظر ح نعمل لقاء معاك بعد العرض عن دورك في انقاذ الضحايا واحضار سيناريو الاحتفال
الشاب: حاضر ... ( يتحرك مع الشرطي في اتجاه غرف اللاعبين تحت المدرجات )
المخرج التلفزيوني: ح تعمل ايه دلوقتي احنا في ورطة
طلعت: الاول لازم نشيد بالشاب الوطني الاصيل واللي بيظهر معدن الشعب في الأوقات الصعبة وبيضحي بمصالحة الشخصية لانقاذ عدد من الجرحي وبعدين يحاول انقاذ الحفل الختامي ألف شكر للمواطن الشريف وهو ده النموذج والمثال اللي نتمني شبابنا يكون عندهم نفس الروح وان شاء الله نتواصل معاه بعد المباراة لنتعرف علي تفاصيل اكثر
ثم يتحدث الي مخرج التليفزيون
هل نعتذر عن الاستعراض بسبب الظروف اللي استجدت؟
المخرج التلفزيوني: ح نتعرض لانتقادات وفضايح علي مستوي العالم ... السيناريو معاك اجتهد واحصل علي اجر المجتهد اذا اخطأ
طلعت: انا مذيع رياضي افهم في الكرة قوانينها وخططها لكن ما افهمش في سيناريو استعراضات حفل ختامي ابقي مجنون لو حشرت نفسي فيما لا افهم
المخرج التليفزيوني: بص يا طلعت احنا سمعتنا علي المحك يا نكون يا ح نقعد في القاع سنوات طويلة انت معاك فرصة عمرك تبقي بطل الدول النامية كلها السيناريو في ايدك اتصل علي غرف الفرق الفنية وجمد قلبك وانت بتفك طلاسم السيناريو المتبهدل اعتبر نفسك شامبليون ومعاك حجر رشيد واطلب من المجموعة الجاهزة تنزل ... الوقت محسوب علينا ولازم يتملي لان القمر الصناعي بينقل علي الفاضي
طلعت: الورق مقطع ومختلط ببقع زيت ولا دم وتراب ... ومش عارف بداية الورق من نهايته
المخرج التليفزيوني: مفيش وقت للالتزام ببداية مش معروفة ومش معروف مين بيعمل ايه ولا مين بيقوم بدور الربط بين الفقرات ... اعلن اسم الاستعراض اللي يخطر علي بالك وليكن الاستعراض العشوائي .... سبهللا
طلعت بدهشة: سبهللا !! ودي اشرحها ازاي؟
المخرج التليفزيوني: دي ادق كلمة توصف وضعك فهي الرجل اللي ممعهوش حاجة
طلعت يقلب في الاوراق: نهارنا ابيض ... قدامي كلمة حضرة ... حضرة مين بالضبط؟ مش عارف ... لا ده فيه ألف ولام ... الحضرة
المخرج التلفزيوني: احنا اتفقنا مفيش حاجة معاك ... بالامر اطلب نزول الحضرة ... يا طلعت الأعور أحسن من الاعمي
طلعت بجدية: مجموعة الحضرة استعد ...
الكاميرا تنقل تحركات غير عادية امام الأبواب تحت المدرجات ووقوف مجموعة في وضع الاستعداد
طلعت: حضرات المشاهدين ح نبتدي فقرات الاستعراض العشوائي سبهللا
يتكلم بحسم: مجموعة الحضرة تبدأ فورا
ونشاهد مجموعة من الشباب والفتايات في ملابس الدراويش المزركشة يدخلون الي ارض الملعب ومعهم مجموعة اخري تحمل دفوف يدقون عليها ويتمايل الجميع يمينا ويسارا ( والجمهور يصفق للمنظر ) وفي الوقت الذي تتعالي فيه أصوات الفريق ويسود الصمت الملعب وتتردد كلمات
مدااااد .... مدد ... مدد مدد مدد ... مداااد
طلعت يشعر بالارتياح ويتحدث الي العالم: كما تشاهدون الفقرة الاولي من فقرات الحفل الختامي والمسمي سبهللا واول استعراض الحضرة نرجو لكم متابعة طيبة
ثم تنشد المجموعة وهي تلف دائرة وسط الملعب وتغير في التشكيلات التي تعرضها
مدااااد .... مدد ... مدد مدد مدد ... مداااد
عملنا حضرة وقلنا حي *** والكوديا شقرة بتقولها خي
فقر توست رايح وجي *** ده ابن بلدي ملوهش زي
مدااااد ... مدد
فقر معانا واديها جيرك *** وقول ل اخوك ح نبقي شرك
واياك تصاحب كوهين وميرك *** يتبقي زي الاسد ف سيرك
ويبدأ الجمهور في التفاعل وترديد ... مدااااد ... مدد
بخر يا واد كل المكان *** زود فسوخ وجاوي ولبان
ابوك وعمك بدون امان *** لما قاعدوا مع الشيطان
مداااااد ... مدد
ع الدف دقي سلام يا كوديا *** نتفت دقني وبقيت كروديا
ابيع كنوزي ويدي فاضية *** والخوف هزمني بضربة قاضية
مدااااد .... مدد
ع الوحدة دقي واشدي الموشح *** عتاب اخويا لو همس يجرح
طب ليه فدمي عمال تسيح *** وتسيب عدوك ف عرضي يمرح
مداااد ... مدد
وتبدأ المجموعة في الانسحاب الي احد اركان الملعب والجمهور يصفق ويطلب الاعادة
طلعت للمخرج التلفزيوني : قدامي كلمة اعلان
مخرج التلفزيون: ده مش اعلان من عندي ... احتمال يكون ضمن العرض ... جرب زي اللي فات ... وح تبقي اجدع سبهللا
طلعت: جماعة الاعلان ... انزل
يخرج ايضا مجموعة تعدو حتي منتصف الملعب ومعهم نماذج من سلع ملونة وتؤدي اعلان راقص
لبان لبان بالحبهان *** عيط يا واد صرخ كمان
قول لأبوك عايز لبان *** عايز لبان... لبان كتير
وانتي ياللي قاعدة جنبه *** قولي برضه عايزة شامبو
ماركة الأمريكي رامبو *** السلك يبقى خيوط حرير
وانتو لو ف الفلاحين *** يعني خضرة أو ياسين
البنات ويا البنين *** يشتروا نبوت غفير
وتعيد الجماعة الاعلان وهي تتراجع الي ركن اخر من اركان الملعب
مخرج التلفزيون: هايل يا طلعت ... صدقتني حتبقي سبهللا المنقذ ... سبهللا اللي محصلش
طلعت: معايا ورقة الكلام فيها مطموس اشوف اللي بعديها ... مكتوب بطيخ ... لكن قبل بطيخ فيه كلمة ... فتاوي ... يعني ايه ... فتاوي بطيخ؟
مخرج التلفزيون : قوي قلبك واطلب ان ما مشيتش شوف غيرها
طلعت : مجموعة فتاوي بطيخ تنزل
يخرج مجموعة ومعهم ادوات خفيفة يفردونها بسرعة فيظهر ما يشبه الاستديو في محطة تلفزيونية يجلس شخص يتلقي مكالمة
وسيدة تتحدث اليه في الهاتف
جوزي شاب وعلي اخر موضة ***وجاهل بالعدة المعدودة
ولا يحسب ايامها السودة ***ويطلق ويردني تاني
طلقني يا دوبك ميت مرة ***ويقولي خلاص انتي الحرة
ويجيني سكران من برة ***وف ايده كيس الحلواني
وبيرجع والديك بيلالي ***والفجر بيدن طوالي
وما ببقي دريانا بحالي ***وشيطانه يناكف ف شيطاني
نستمع الي مجموعة تردد
والشيخ بطيخ عدل العمة ***ويقول لها يا اختي بالذمة
طلاقاته كانت في اللمة *** ولا في الاوضة الجواني؟
السيدة
ده فضحني يا مولانا الشيخ ***وزعيقه يسمع في المريخ
وكلام متنقي معاه تسبيخ ***وانا لحمي بيبقي بدنجاني
الشخص الذي يقوم بدور الشيخ بطيخ
اسمعي مني يا بنت الناس *** نية جوزك تبقي اساس
وكلام ف غضب وبدون احساس ***تبقي انت الزوجة الرباني
غناء جماعي
شيخنا يا شيخ بطيخ يا هلمه ***ياللي مجدد دين الامة
سيبك م اللي بيفتي بذمة ***ده العلماني فقه زماني
متصل اخر
متغرب من ست سنين ***وانا وحدي في الغربة حزين
قالوا مبروك جالك نسرين ***عمرها عام وبقت ف التاني
قوللي يا شيخ من غير تورية ***قول دا انا عايش ف السعودية
!! وبخلف وبجيب ذرية ***ومكانها مش هو مكاني
القائم بدور الشيخ بطيخ
الموضوع ده فيه اقوال *** وبدون دوشة عدي الحال
تيجي يمين تيجي شمال ***خليك هادي مش عدواني
المجموعة تردد من جديد
اه يا شيخ بطيخ ميه الميه ***الفتوي ما بتخرش ميه
ويعيش في بلاد السعودية ***ويخلف في الشكل ياباني
وتنسحب المجموعة الي منطقة اخري في الملعب وهي مستمرة في الانشاد وتفكك الاستديو ويدخل به البعض الي غرف الملابس
طلعت: ح اعمل ايه تاني الورق متبهدل
مخرج التلفزيون : طلعت قلب الاسد اتصرف بشجاعة
طلعت بدهشة وانبهار: الله الله الله ايه ده مين اللي جاي بيعرج من هناك
مخرج التلفزيون : فيه ايه يا طلعت ؟
طلعت: دا المخرج! ... تصدق مخرج الاستعراض الأستاذ محمد رشاد داخل بيعرج ... (باستغراب) هو ده اللي حالته خطيره وفي العناية الفائقة انا حروح اكلمة
طلعت لمخرج العرض: استاذ محمد رشاد الف سلامة ايه اللي حصلكم؟
محمد رشاد: واحنا جايين عربيتين قفلوا علينا الطريق اضطرنا نقف هجم علينا جماعة بالسلاح وخطفونا الي الطريق جانبي ... عايزين مننا ايه؟ ما نعرفش حاجة وما فيش كلام فقط المؤلف حب يهددهم وقال دا قطع طريق وخطف وشغل عصابات ... وعينك ما تشوف الا النور الراجل مش ح ينفع يألف تاني من كتر الضرب
طلعت: بتقول ايه ... احنا جالنا شاب وقال عربيتكم اتقلبت وجاب لنا السيناريو وهو اخدكم المستشفى وحالتكم خطيرة
محمد رشاد: كل الكلام ده اكاذيب مفيش حاجة من دي حصلت واكيد ده واحد منهم ولهم هدف مش معروف لغاية دلوقتي
طلعت: يا امن الاستاد الشاب اللي جه بلغنا بانقلاب سيارة محمد رشاد محدش يسمح له بالخروج وارجو القاء القبض عليه لمعرفة أسباب اختطاف المخرج رشاد وزملائه محمد رشاد: انا قدرت اهرب لكن المؤلف هو اللي اتهري من الضرب علشان محاولة المقاومة عدموه العافية مش حينفع تاني
مخرج التلفزيون: محمد يا رشاد ... التلفزيون بيكلمك ... العالم بينقل وبقلنا مدة متوقفين
محمد رشاد: حاضر يا ريس... وانا جاي سمعت الاستعراضات اللي اتعملت وبكدة السيناريو اتنسف خليه بقي عرض سريالي ومسرح عبث ومشيها سبهللا زي ما طلعت قال
مخرج التليفزيون: اتصرف يا محمد بقالنا مدة عطلانين
طلعت: الاول عايزين نصحح الكلام اللي قلناه عن الشاب وتبين لنا ان الشاب لم يكن من العناصر الوطنية لكنه ضمن جماعة اجرامية غير معروف اتجاهاتها ولا اهدافها وهو لا يمثل الشباب الوطني المحب لتراب بلده بل يمثل الخيانة والخسة لوضعه البلد امام العالم بصورة غير مشرفة وان شاء الله سوف يدفع ثمن هذه السفالة وسنوافيكم بالتطورات
محمد رشاد يتناول الاوراق من طلعت ويفرأها ثم
يقول: يا علي لو جماعة سوق علي مهلك جاهزة انزل
تدخل سيارة نصف نقل تسير في التراك حول الملعب وهي تحمل مجموعة من الشباب الذي يقفز من السيارة ويقومون بالرقص والغناء ونستمع الي
سوق علي مهلك سوق
سوق ودينا السوق .... سووووق
سوق دا البيض مسلوق
اوعي فراملك تهرب منك *** او زيتك يطلع محروق
ولا كوتشك بعد ماتنفخ *** الجواني يكون مخروق
سوق علي مهلك سوق ... سوووق
سوق ودينا السوق
اكتب كلمة علي العربية *** عربيتنا اداب وحقوق
والدكتور قاعد ويانا *** ح يعتقها ف باب اللوق
سوق علي مهلك سوق ... سوووق
سوق ودينا السوق
العربية بواسطة يا أسطي *** وبتزكية من عم فاروق
حبة ف حبة نعدي البسطة ***والاقساط ندفعها بذوق
سوق علي مهلك سوق ... سوووق
سوق ودينا السوق
اوعي تفكر تدرس كيميا *** او تتخصص طب حروق
بعد تعب وسنين ف دراسة *** تقف وتنادي ع البرقوق
سوق علي مهلك سوق ... سوووق
سوق ودينا السوق
مجموعة تخرج بالسيارة وهم يدفعونها ومجموعة تتمركز في الملعب
طلعت باستفسار: استاذ رشاد ... ح نعمل ايه دلوقتي؟
محمد رشاد: المجموعات الجاهزة ح تتقدم ... بص يا طلعت شايف مين اللي جاي ...
طلعت ينظر والكاميرات تنتقل الي شخص يكاد يسقط من الاعياء يقترب منهم وهو يعرج ورأسه مربوط بضماده وذراعة موضوعة في رباط معلق الي رقبته
محمد رشاد : دا المؤلف ... ازي جيت يا استاذ
المؤلف وهو يتألم: اه يا كتفي عدموني من الضرب يا محمد ... اتضربت جامد قوي ... اخدت جايزة المؤلف المضروب ... المهم تحاملت علي نفسي علشان افسد خطتهم لأني عرفتها
طلعت ورشاد معا: عرفت ايه قول؟
المؤلف: الخطة في لحظة عزف السلام الوطني للفريقين وتلفزيونات العالم بتنقل الحدث ح يعلنوا اخذ اللعيبة وطاقم التحكيم رهائن تحت تهديد السلاح لأن ليهم قضية وبيقولوا ان حكومات العالم متجاهلة قضيتهم وعايزين يعرضوها علي شعوب العالم لتضغط علي حكوماتها لايجاد حل
طلعت: وهل قضيتهم دي معانا؟ مين دول؟ وايه البلاوي اللي بتتحدف علينا ... يا امن الاستاد انت فين؟
المخرج التلفزيوني يعرض علي شاشة اعادة الاهداف صورة الشاب والشرطي وكذلك علي شريط الاعلانات المتحركة حول الملعب
طلعت للمؤلف: لكن ايه سبب خطفهم لكم؟
المؤلف: علشان يقدروا يدخلوا ارض الملعب بحجة توصيل سيناريو العرض وبعدين يتمكنوا من اسر اللاعبين ومخاطبة العالم بما يريدونه لكن همه مين؟ وقضيتهم ايه؟ مقدرتش اعرف
يدخل ايضا شخص اخر مصاب ومعلق علي رقبته الة موسيقية مكسورة يتدلي طرفيها علي كتفيه
المؤلف: ودا الملحن كمان وصل وبقينا الضحايا الثلاثة ... تعالي يا أستاذ
يشير الملحن بيده علامة الرفض ويواصل السير الي الغرف اسفل المدرجات
مخرج التلفزيون: يا رشاد اعرض حاجة ما تضيعش الوقت
رشاد يتحدث للفرق : انسات عرض التحرش ... ادخلوا
يخرج من الغرفة انسات الي الملعب
بنت تتحدث الي امها :
ماشية يانينا ف شارع ضلمة **والشبان واقفين ف العتمة
لو قرب لي حد بكلمة ** ح اديلو بخة فلفل حار
الام :
اديلو يا بنت ولا يهمك ** خالكي جدعة كدة زي امك
واللي يقول لك كلمة تغمك ** اديلو م المتنقي خيار
البنت :
البت صباح بنت امبارح ** اتحرش بيها عيل قارح
بكلام واطي سافل جارح ** خالت دمه يسيح انهار
اما ستيتة بنت العجلاتي ** اتحرش بيها شاب فلاتي
وقال لها تيجي ناكلو جيلاتي ** قالت له ح والع فيك يا حمار
الام :
شبان ما شفوش التربية ** ولا حد اداهم توعية
لو شافوا بنت معدية ** يدوها كلام مخلوط بالنار
البنت :
مرة ف شارع التربيعة ** ويا نينا الزحمة فظيعة
شاب اتقصع تقصيعة ** اتكسرت ايده بدون انذار
الام :
تسلمي يا اختي من الاندال ** اللي ما فيهم شكل رجال
تمن الواحد نص ريال ** ولا ينفع طبلة ولا مزمار
البنت :
فتيات بشناب ويقولوا شبان ** ووجوه مرسومة بأيد فنان
تلاقي الرجالة تمام نسوان ** وكلام بمياصة يجيب العار
الام :
ف الودن حلق والانف كمان ** والشعر ضفيرة ديل حيوان
ولا يعرف جار او بنت جيران ** ولا يحفظ عشرة لاهل الدار
تأخذ الانسات أيضا موقع في الملعب
طلعت يتحدث لجمهور الحاضرين
طلعت: الاخوة الحضور يوجد بيننا متسللين المرجو عدم الذعر فهم لن يقوموا باعمال عنيفة هم يريدون استغلال المناسبة ومخاطبة العالم بشيئ غير معروف لنا وستكون وسيلتهم اخذ بعض اللاعبين رهائن ... ساعدونا بالتعرف عليهم ولا تشتبكوا معهم ... شاهدوا صورهم علي الشاشة الكبيرة وعلي شريط الاعلانات المتحرك
المؤلف: الصور دي لن تفيد حاليا
طلعت : ازاي ؟
المؤلف: لان معاهم الوان و ح يلونوا وجوههم بدهانات زي المشجعين وبالشكل ده ملامحهم ح تتغير
طلعت: طيب نركز علي ملابس الشرطي
المؤلف: ودي عاملين حسابهم الجاكت بوجهين دابل فيس ... يعني هو حاليا لابس الوجه التاني او تخلص من الجاكت بالكامل وملامحة طبعا تغيرت بالالوان
المخرج التلفزيوني ينقل الكاميرا الي الجمهور ويركز علي الوجوه التي عليها الوان
محمد رشاد : لسة وقت ... يا علي اذا كان الجماعة بتوع غسيل مخ جاهزين نزلهم
ينزل مطرب من الجيل القديم يرتدي طربوش ومعه عود ليعزف عليه ويضعون له كرسي ليجلس وهو يغني ويسمعه ايضا مجموعة من عجائز السميعة يرتدون ايضا الطرابيش
عيشتني معاك بالامل واحد ورا التاني
وبقيت سجين الخداع وانت سجاني
وعشمتني بالحلق خرمت انا وداني
ولا حرف منك صدق وتقول انا الجاني
اخاف اموت في البلد ما الاقي اكفاني
واتلف في ورق جرانين كانت مهجماني
ولا غراب يعلمهم طريقة يواروا جثماني
واموت مجرد رقم عاش في عالم فاني
عالم وفيه ابليس بيتنكر ف وجه انساني
يسفك دماء الناس زلفي لفكر شيطاني
شيطان في هيئة بشر فاسد وعدواني
واسمع كلاب النار تدوي علي وداني
تقول علي السفاح انسان عطوف حاني
ان اخد مالي فمن حقه فتياتي وفتياني
وان جلد ضهري ف عطف ورحمة طيلاني
ووجبي الطاعة ف المنكر ولو ح يهد بنياني
ولو يلغي صلاة الفجر اقول الفجر اخواني
ولو يمنع صلاة الظهر اقول الظهر عثماني
ولو يحظر علي الحج اطوف واسعي بوجداني
وازكي بمال في صندوقه كما شيخه افتاني
ولو اعلنت افلاسي يجيب لي الفتوي عمياني
ياخد اعضائي ويبيعها من خارجي لجواني
ومخي معاه ف غسلته ولو انزل علي سناني
واتبرمج جهاز بالعملة ادور واعزف له الحاني
واهتف له بدون داعي يدوم سكري وادماني
وايه يعني الوطن لو ضاع كفاية وجوده احياني
يحمل الجماعة المطرب وهو جالس علي الكرسي وفي احد الأماكن الخالية في الملعب يجلسونه فيقع منهم علي الارض
محمد رشاد: يا علي اطلع بصحفي من اياهم
تدخل مجموعة ومعها شمسية ومنضدة وكرسي العرضحالجي وينشدون
شافط شفاط الشفطنجي **هابش هباش الهبشانجي
في بطاقته المهنة كلامنجي **وبيكتب في الصفحة الاولي
وبدايته تحت الشمسية ** والكرسي امامه الطبلية
والفول واقراص الطعمية **والدمغة يبيعها بعمولة
باع الشمسية لعم خليفة ** واتوظف في اهم صحيفة
ومقالته بتمدح ف الجيفة ** ويردد كلمات معسولة
تنقل الكاميرا توافد اللاعبين الي غرف الملابس وهنا يبدأ خروج المجموعات من الملعب في اشكال متناسقة
ويستعد الفريقان للنزول الي ارض الملعب بصحبة طاقم التحكيم ويقف اللاعبين في صف لبدأ إجراءات السلام الوطني لكلا الفريقان وفجأة تنطلق عشرات من ومضات الفلاش تعبيرا عن اطلاق الشماريخ من جانب الجمهور والكشافات علي جانبي المسرح تتداخل اضوائها فتشكل ستارة من الدخان وعندما ينقشع نجد عدد من الافراد يحيطون باللاعبين لحمايتهم كما وان هناك بعض من الجماهير نزلوا ارض الملعب يطاردون شبان يحاولان الهرب ونستمع الي الجماهير
حلق حوش حلق حوش *** هات المجرم ما تسبهوش
حلق حوش حلق حوش *** اللي ف وشه دهان ورتوش
حلق حوش حلق حوش *** ولابس بدلة عليها نقوش
الكابتن طلعت: وهكذا يثبت امن الاستاد انه يتصرف بهدوء وحكمة وخبرة ... شكرا امن الاستاد ... شكرا جماهيرنا الواعية فقد قلتم للعالم ان الجريمة لا تفيد وان العدالة ستقتص من المجرم ... سيداتي انساتي سادتي نقلنا لكم الحفل الختامي سبهللا والذي قدمه الشباب الواعد والجيل الجديد من الفنانين الموهوبين
والان مع المبارة النهائية والحكم اجري القرعة ويضبط ساعته ويطلق صافرته إيذانا بانطلاق المبارة التاريخية نرجو لكم مشاهدة ممتعة
عند سماع صوت صفارة الحكم
ستار
ليست هناك تعليقات:
إرسال تعليق