ذات فصلين
شخصيات الفصل الأول :
1- جلال : الزوج يبلغ من العمر نحو الاربعين سنة ( يعاني من مجريات الحياة الصعبة ) .
2- المجهول : شخصية غير واقعية ( اسطورية ) .
3- فاتن : زوجة جلال , شابة في مقتبل العمر , تعاني من عدم اكتمال سعادتها في الحياة .
الفصل الأول
المشهد الاول :
( في زقاق مظلم من ازقة الاحياء السكنية , وبامكان المخرج ان يستعين بالاضاءة المسرحية للتعويض عن واقعية الديكور للمشهد , يمكن اضافة بعض المجسمات على ارضية المسرح من مكعبات خشبية , ومستطيلات مسطحة , وبعض الهياكل البشرية , معلقة من الاعلى وبعض الخطوط المتشابكة من منحنياة , واشكال لشبكة خيوط العنكبوت على السايك الخلفي في اعلى المسرح )
جلال ---- (وهو في حالة من الذعر والخوف , مع نفسه ) يارب , ساعدني حتى اكدر اجتاز هاي المحنه , ياالله انت المعين , ابعد عني هذا الخوف , وخليني اشوف دربي منين , الدنيا ظلمه هندس ومداشوف كلشي من الطريق ,رايد اوصل للبيت , لكن شلون واني بوسط هل ظلمه ؟ اخاف من الارواح والاشباح تطلعلي , هل ارواح تعيش بالظلمه , , وهي السبب بخراب هل دنيا وبهل دمار اللي خرب سعادتنا وهجم بيوتنا فمثلي واحد ضعيف مايكدر ايقاومها , لو يتصدالها , لكن الي يتحداها تخاف منه , بس اني انسان بسيط واخاف من خيالي , اتخبل من اشوف منظر الدم واجساد مكطعه ومكصكصه , ومطشره هنا وهناك , ليش ياربي ؟ مو انت رؤف ورحيم ؟ موانت قادر على كل شيىء قدير ؟ ليش هل دمار وخراب البيوت ؟ الدنيا صايره مجزره للبشرية , اطفال ونسوان وشيوخ كبار بالعمر , وشباب حلوين وبعدهم ماضايكين طعم الحياة ,متكصصه ايديهم ورجليهم , وروسهم مقطوعه عن اجسادهم , ومطشره هنا وهناك , هي هاي العداله السماوية ؟ يمكن ,كلشي ايصير , قد ايكون الك بيها حكمه , ومع هذا احنا راضين بحكمتك , بس كل واحد وعلى كد مايتحمل , يارب ساعدني خليني اوصل للبيت ,
يعني اني مومخبل ؟ ليش طلعت بهل الليل ؟ وشنو اللي طلعني , الدنيا موبخير, صايرة خرابه ومليانه غربان وخفافيش , ومابقى منها غير بس الاطلال واللي اتذكرنا باهل الخير , حرامات هدنيا تغيرت , وصار ابمكان طيور السلام , طيارات الهدم والتدمير , اتوجهها النه بلاد الغرب , واتحاول تدمير كل معالمنا الحضارية , صار بلدنا يحوي ناس تتكلم عن الحرية والديموقراطية , وبديهم معاول التهديم والدمار ,الوطن صار خرابة يحوي الغربان السود والذئاب الوحشية , بلدنا صار يحوي اشباح لابسه اقنعة مزيفه , وتسرق وتبوك وتنهب من ارزاق هل ناس الطيبه والصورة اللي ماذتني اشوف هناس الطيبه تاكل من فتاة هل مرتزقه اللي جوي وتربعوا على ثرواتنا واقتصادنا , وشتتوا اهاليتنه ببلاد الغرب وهجروهم من وطنهم , ايه ارجع واكول : بيها الك حكمه , بس حرام , حرام هناس الطيبه تروح ضحية الظلم والفساد , وصار الموت مايعرف الزغير من الجبير , واني ليش مدوخ روحي ؟ هم يجيني يوم واروح ضحيه مثل ماراحو الاخيار وسبقوني برحلتهم , الف رحمه على ارواحكم , خل اكوم اروح قبل لا يلحكني الموت من قصف طياره , لو صاروخ عمياوي يستهدفني , بس ارجع واكول الموت واحد , وشكد ماتعددت الاسباب , بس الوين اتوجه ؟ وبيادربونه افوت ؟ امشي بهل طريق ؟ لو افوت من ذاك الدرب ؟ زين وهل اجساد الضحية تبقى مرمية بالشوارع ؟ ذوله الاطفال والشيوخ والنساء اللي مكصكصه اجسادها ومرمية بهل درب ودماياتها لونت الكاع بصبغة الحنه , وصوت هلاهل اهلهم ايزفونهم بهليله الظلمه , وحاملينهم بين جفوفهم ليفوك وهتافات حركة الكلب تصرخ وتصيح بعالي الصوت , وين عدالتج ياسماء , وين عدالتج ياسماء ( هدوء ) محد يسمع صوتي الا الحيطان , ورحمه من رب العالمين اللي خلا للحيطان اذان , بس شنو الفايده , اني الاصيح بكل صوتي واني الاسمع , يرجعلي الصوت بصدى ايهز جسمي ويرعبني , ويخليني اخاف من هل ظلمه , ياالهي ارحم عبدك يستغيث منك ويطلب مساعدتك , اريد اوصل للبيت , ومااعرف شلون اتوجه ومنين , ( يصرخ بعالي الصوت ) ياعالم ياناس , وين رحتو صابكم الطرش , لو كلوبكم صارت مثل الحجر , لو صرتوا مثلي تخافون من الظلمه ؟ ( موسيقى تعبر عن شيىء من الامل , وبصيص نور ينبعث من مسافة غير قليلة , تبدو علامات الفرح على وجه جلال , ومن ثم يحاول الرقص والتهريج ) الله الله الله , انفرجت وانحلت , واخيرا ربي والهي استجابيت الدعائي , ( بتعجب وفرح ) الله هذا النور ديتقرب يمي ( ينادي باعلى صوته ) انت ياللي هناك , ( من دون جواب , فيعيد الكره ) انت اللي شايل بايديك مدري فانوس لو لمبه لو لاله , اتقرب بالعجل وتعال يمي , اني محتاج المساعدتك , اتقدم بالعجل , خليني اشوف وجهك واتبين ملامحه .
المجهول ----- ( يتقدم ويقترب بالقرب من جلال ) .
جلال ---- ( بتعجب وبشغف ) كلي انت منو ؟
المجهول ----- ( بتاني وثقه عاليه ) محتاج مساعده ؟
جلال ---- ( بفرح شديد ) شلون حجي هذا دورت عليك بالسما والكيتك بالكاع , كلي انت منو ؟
المجهول ----- اني فد واحد عابر سبيل , ورايح للبيت .
جلال ---- ( بلهف ) اقترب مني اكثر حتى اشوفك زين .
المجهول ----- ( يقترب من جلال ) .
جلال ---- ( بفرح ) اوه شلون مفاجئه , هاي انت جاري العزيز .
المجهول ----( بفرح مفتعل) منو جلال ؟ هاي اشجابك بهليل هنا , وشتسوي بهل ظلمه ؟
جلال ----- ( بحسره ) جنت ابيت صديقي , وحلت الكعده وياه , ونسينا نفسنا بحجايات كلش حلوه عن اهلنا الطيبين , وهناك فزينا على صوت ازيز طياره وهي تقصف وبليا رحمه , ومدافع تقصف بشكل عشوائي على وين ماجان , وريحة البارود وحريق المواد الكيمياوية ملت المكان , خربت كعدتنا , وخلتني انهزم ومن دون مااسلم على صاحبي , وهل تشوفني عاصي هنا بهل ظلمه , وما اندل منين اروح ,وظليت استغيث وادعي , ولمن انت اجيتني .
المجهول ---- اني انصحك تروح للبيت .
جلال ---- ياريت اندل دربي وامشي بوسط هظلمه .
المجهول ---- الدنيا صارت تخوف , يلله اذا تحب امشي ويايا .
جلال ---- ( وهو يضحك باستهزاء ) اتصورتك سبع وماتخاف , اثاريك اجبن مني .
المجهول ---- هاي ماينرادلها مرجله , الباب التجيك منه ريح سده واستريح .
جلال ---- اكلك , بالرغم من هل مصايب اني اكول بعدها الدنيا بخير .
المجهول ---- عمي ياخير , اخويا الخير راح ويا اهله , وانت بعينك دتشوف هل دمار , ودكلي بعده الدنيا بخير !!!!! يلله خويا امشينا , وخلينا نروح للبيت .
جلال ---- ( بفرح ) اكول هم زين عندك فانوس ايساعدك وتكدر تشوف طريقك , بس اويلي عليا لا فانوس ولا لمبه ولا لاله .
المجهول ---- لايغرك هذا الفانوس , فتيلته زغيره وماتساعد على شوفت الطريق , خلينا اندبر حالنا ونلحك انروح للبيت قبل لايصير بينا شي ,( تهب ريح قويه ومؤثرات هبوب الرياح وعلى اثرها ينطفي الفانوس ) .
جلال --- ( يصرخ ) هاي ليش طفيت الفانوس ؟
المجهول --- مو اني ,هاي انطفى من قوة الريح , شوف واسمع شلون هل رياح كامت تزئر , والدنيا بردت صايره مثل الثلج , خلينا نمشي ونروح ,لا نتبهدل .
جلال---- ( كانه يحاول مقاومة الريح ) جاري العزيز , الريح صايره كلش قوية , مبسمرتني ابمكاني , الزم ايديا واسحبني ليكدام يمك .
المجهول ----- هاي انت تخبلت , لو صاير بيك شي ؟
جلال --- صدكني هل ريح صايره قوية ودتتفعني ليوره وتبعدني عنك , بس ولا يهمك , راح اصير اقوى منها واتحداها ( اصوات الرياح تشتد ويقوى صوتها )
المجهول ---- لك مخبل حس على روحك , هاي ياريح ياهوى ؟ هاي من كل عقلك ؟
جلال ---- ( بتعجب ) صدك جذب , امسك ايديا واسحبني لي يمك .
المجهول ---- لك امرك عجيب , وانت اكيد مو من هل ولايه .
جلال ---- ( بتعجب ) صدك جذب , داكلك الزم ايديا واسحبني لي يمك , هاي الريح كتاله , جاري العزيز اترجاك , ساعدني واسحبني من ايديا .
المجهول ---- ( يضحك من كل قلبه ) يايا مخبل على هل طلعه , من صدك تحسبني جارك ؟
جلال ---- ( بتعجب ) طبعا جاري .
المجهول ---- كول غيرها يمعود ( وهو يدغدغ بطن جلال ويضحك ضحكة قوية )
جلال --- هاي اشدتسوي بيا ؟
المجهول ----- ( وهو يدغدغه ) داضحكك , حتى اخليك تموت من الضحك .
جلال ----- ( وهو يضحك ) لك فك ياخه مني فدوى اروحلك , راح اموت واطك من الضحك .
المجهول --- اضحك , ترى ماتسوى الدنيا , كلها يومين لو تلاثه تعض لسانك وترحل عن هل عالم ,اضحك لك اضحك ( وهو يستمر على الدغدغه ) .
جلال ---- ( يصرخ باعلى صوته ) كافي كافي , مو كتلتني , انت شنو من جنس ؟
المجهول ---- ( بمكر وخبث ) اني – اني اللي عايش بعالم يختلف عن العالم اللي عايش بيه انت اني اللي مايهمني الموت ولا اخاف منه ,باوعني زين وشوفني بعيون صافيه , راح تعرفني ,مشتاق الشوفت هوايا ناس تضحك من كل كلبها , مو محبة , بس حتى اريدها تموت , تموت , تموت من الضحك , نعم هاي موته جديدة , هوايا ناس تلفظها , بس مامجربين هذا النوع من الموت .
جلال --- هاي فلسفه جديده , وغريبه علينا .
المجهول ----- موكتلك اني عايش بعالم يختلف عن العالم اللي عايش بيه انت ؟
جلال ---- انت رايد من الناس تضحك , وشلون تضحك وكلوبها مدمايا , ومليانه قهر ومصايب فقدنا الاعزاز والمحبين والاخيارواللي ماجان الهم اي منفذ ايخلصون نفسهم من جحيم قاتل .
المجهول ---- والهسبب تشوف الشمس غابت عن هل دنيا , متكئبه وحزينه , ومتاسفه عللي راحوا وماستفادوا اي شي من هل حياة .
جلال ---- وياهو المستفيد من هل حياة , غير بس اللوكية والانتهازيين , واللي ماعدهم هم وغم غير بس الطمع والفساد والاستحواذ على ارزاق الناس , ايبوكون وينهبون ويخلون غيرهم ميتين من الجوع , وهمه بطونهم متخمه , وكروشهم كبرت وارتفعت ليفوك , وصارت اعلى من روسهم .
المجهول ---- وهاي منو سببها ؟
جلال ---- سببها الناس اللي عايشه على نياتها , ناس عايشه على حب الله ومايهمها غير بس الرزق الحلال واللكمه الطيبه اللي ايجيبوها الولدهم .
المجهول --- ( بعصبية شديده ) وهي هاي الطيبه اللي جابت البلاوي على روسهم .
جلال --- معقوله ؟
المجهول ---- وليش مو معقوله .
جلال --- الا بشي واحد .
المجهول ---- وشنو هو هذا الشي ؟
جلال ---- الا اذا نكلبت الدنيا وتغيرت معالمها , وبالفعل هي تغيرت , صار قانون الغاب يحكم بين الناس , القوي ياكل الضعيف , جم واحد من المتنفذين نصبوا نفسهم اولياء واوصياء , وعاثوا الفساد , والسلب والنهب , وخلت هل وادم اتدور على خبزة تسكن الم بطنها من الزباله , فشنو رايك , هذا حلال ؟
المجهول ---- موذوله اللي د تحجي عنهم ديحكمون بالعدل !!!!
جلال ---- اي عدل هذا ؟
المجهول ---- العدل واللي شعاره ايكول , العدل اساس الملك .
جلال ---- (بعصبية ) كذب بكذب , شعارات رنانه للدعايه وبس , ناس هوايا ارتفعت وعلى اجتاف هل مساكين , والي علموهم على ترديد عاش الملك ,يسقط الملك , وخلوهم مابين جلمه وجلمه ايصفكون وهمه مايدرون علويش ديصفكون , صارت عاده عدهم مثل الافيون والكوكائين متخدرين ومبهورين بشي اسمه القوة , ذوله هل مساكين تعلموا عل قوة اللي تسد حلوكهم وتقيد ايديهم , صاروا يكرهون شي اسمه الحرية , لانه مايعرفون شلون ايمارسوها , مساكين وجماله موغربه علينا , اهلي وعشيرتي وكل الناس اللي عايشه وياهم .
المجهول --- مادام انت تفتهم , وعيهم ثقفهم , وفهمهم شلون تكون السياسة , حتى ايكدرون ايمارسوها ويحكمون نفسهم بنفسهم .
جلال --- اخويا اي سياسة ؟ ذوله ناس مساكين اترس بطونهم, يعني خبزنا كفافنا اليوم والله كريم الباجر .
المجهول ---- ( مقاطعا وبهستريا ) الله ؟ لا , لاتلفظ هذا الاسم على مسامعي , دير بالك واحذرك ,اتخبل من هذا الاسم .
جلال --- ( بتعجب واندهاش ) جاري , عزيزي , اكو واحد يتخبل من ذكر الله على مسامعه ؟
المجهول ---( بعصبيه ) كتلك لا تذكر هل اسم وجماله دكوم تعيده على مسامعي ؟!!( بحقد ) هذا الاسم عدوي اللدود , وكل مصايبنا جتيلنا منه.
جلال ---- ( مستفسرا ) من الله ؟
المجهول --- مبين عليك عنودي , لعد خلي الله ايفيدك , ( يختفي , وتسمع صوت الرياح اشد من السابق وزئيرها يدوي , وتعم المنطقه ظلام دامس ) .
جلال --- ( بخوف ورعب ) ياالهي , وين اختفى , وليش اختفى , ( بتفكير وتامل ) اخاف هذا من ذوله اللي مايطلعون الا بالظلمه !!! ( مع نفسه ) معقوله ايكون شبح ؟ , لو جن ؟, ياالله , يارب , ساعدني وخلصني من هاي المحنه , شراح اسوي ؟ احسنلي انهزم قبل لا يجون ربعه عليا وبعدين ذاك الوكت مايفيد الندم , خليني انهزم واخلص روحي ( هنا تتغير الاضاءة على بقعة من ركن صالة , وجلال مستلقيا على اريكة في الصاله , يتقلب على جنبيه وهو في حالة الهلع والرعب والصراخ ) يارب ساعدني , يارب ساعدني .
الزوجه ---( وهي قادمة من خارج الدارومتجهة باتجاه صوت زوجها لتوقظه من حلمه منادية عليه ) جلال --- جلال --- اصحى جلال --- اكعد واصحى على روحك شنو انت دتحلم ؟
جلال ---- ( يستيقظ بذعر ) ها ها ها هاي شنو؟ , هاي اني وين ؟
الزوجه --- اكعد .
جلال --- هاي شنو جنت داحلم ؟
الزوجه – واشمدريني , اسال روحك .
جلال ---- اكيد جنت داحلم , حلم حيل مزعج .
الزوجه --- صراخك واصل ليبره , خوفتني .
جلال ---حلم كلش مزعج , اقلق راحتي وازعجني وخلاني اصرخ .
الزوجه --- شفتك شلون تتكلب يمين ويسار , وترفس برجليك , واني من يمي اصرخ واعيط اكعد جلال , اكعد جلال ومن دون فايده .
جلال ---- (متاثرا) تاذيت هوايا واني اصرخ .
الزوجه – اجيبلك كاس ويسكي تريح اعصابك بيه ؟
جلال – مبين عليج شاربه وكاعده وزن ؟ الزوجه -- واليجي من النادي شيكون شارب , كوكاكولا , لو سفن اب ؟ ( تضحك مستهزئه )
جلال --- واشعندج بالنادي ؟
الزوجه --- حفله , خابرتني سعاد وعزمتني على حفله خاصه بالسيدات .
جلال --- انت مو مواعدتني بعد مترحين الهيجي حفلات ؟
الزوجه --- وشتريدني اسوي ؟ اكعد اكابلك واكابل الحيطان , لو اتابع المسلسلات المدبلجه ؟
جلال --- احترمي وجودي بالبيت , مايصير تعوفيني الوحدي .
الزوجه --- زغير وتخاف , لومحتاجلك ممه ؟
جلال --- بلا قلة حيا , حاجيني بادب واحترام , الي حقوق عليج !!!
الزوجه --- وهسه اني شمسويا حتى تحجيلي بالحقوق ؟
جلال --- ( باستفسار وتعجب ) شمسويا ؟ جايتلي سكرانه بنص الليل , ودكليلي شمسويا ؟
الزوجه --- جلال الله ايخليك , خلي ايكون صوتك ناصي , ترى احنا مثل مادكول بنص الليل ومامسموح النا بازعاج الجيران ؟
جلال --- هلكد حساسه وتهتمين براحة الجيران ؟
الزوجه ---- تعلمت الاحساس منك يامحترم .
جلال --- الظاهر ارتباطنه جان من البدايه غلط .
الزوجه --- وهسه يلله حسيت بهل غلط ؟
جلال --- لا , من زمان , بس كلت خل انطي فرصه النا ونراجع نفسنا , بلكت نكدر ننقذ هلشي الباقي من حياتنه , الظاهر , اني غلطان , غلطان بحساباتي .
الزوجه --- من زمان وانت غلطان بحساباتك , لانك كلاسيكي وباقي على نفس الحطه , ماتحب التغيير , ولا تحب ان تكيف نفسك على ضوء كل مرحله نمر بيها , دائما راكد , راكد مثل المي اليركد بوسط حفره ونتيجته العفونه .
جلال ---- ( يصرخ وبعصبية ) فاتن , راعي الفاظج وحاسبي روحج , اني زوجج وشريك حياتج , والاحترام مابين الطرفين واجب .
الزوجه ---- وانت مؤدي واجباتك الزوجيه يازوجي العزيز ؟
جلال ---- ( يبتسم وبحسره ) العزيز ؟ ومن كل كلبج ؟
الزوجه --- وليش لا , كلمه بيها شي من الاتكيت ونوع من الدبلوماسيه , ورنتها مثل رنة الحديد
جلال --- بس مابيها احاسيس , علاقه جافه .
الزوجه --- لانه مامبنية على عواطف واحاسيس مشتركه مابين الطرفين .
جلال --- اذن اكوخلل وتقصير بواحد من عدنه , خلينا نكتشفه وانعالجه .
الزوجه --- بعد فوات الاوان ؟ بعد جفاف ينابيع الحياة , بعد تصخر الكيعان وعطش روابي الحياة الى ينابيع الحب ,وهسه جاي دكلي خلينا نكتشف الخلل ونعالجه ؟ انتهت مراحل ومحطات قطار العمرياعزيزي , واحنا واصلين للمحطه الاخيره , ومابقالنا من الحياة بس الذكريات , وبعدها الاهات والحسرات , واخيرا الممات .
جلال ----- ( بتوسل ) خلينا نراجع مواقفنا ونصحح مشوارنا !!
الزوجه --- مستحيل , فات الاوان , مابقى شي من العمر حتى الواحد يكدر ايصحح مشواره .
جلال --- بس تبقين انت زوجتي !
الزوجه ---- ( بابتسامة سخريه ) زوجتك ؟!! واشتعنيلك هاي الجلمه ؟
جلال --- هاي ال—
الزوجه --- ( مقاطعا له ) خليني اجاوب ابمكانك , انت وغيرك من الرياجيل , تحسبون المره مثل القميص واللي يتبدل شوكت ماتملون من لبسه .
الزوج --- هاي وجهة نظرج وتفكيرج .
الزوجه --- مو كتلك قبل شويه احنا مختلفين عن بعض ؟ وهذا الاختلاف هو الحد الفاصل مابين استمرار حياتنه المشتركه ؟؟!!
جلال – ودكوليها بكل بساطه ؟
الزوجه --- وشنو صعوبة لفظها ؟
جلال ---- ( بعصبية ) احنا زوجين مرتبطين برباط مقدس , كدام الله وكدام الناس , وكدام الاقارب والاصدقاء , تعاهدنا على الاخلاص والمحبه .
الزوجه --- وين المشكله ؟ ماكدرنا نتجاوز مشاكلنا ونحلها , والهسبب كانت حياتنه فاشله .
جلال--- ومنو السبب بهل فشل , مو انت ؟
الزوحه --- ( بعصبيه ) لا , انت السبب , راجع نفسك واسالها وشوف انت مقصر بحقي ؟
جلال ---تاكلين وتشربين وتلبسين هدوم فاخره , كل هذا مايملي عينج ؟
الزوجه --- ( باشد عصبيه ) هذا هو جوهر الخلاف ابيناتنه , تفكيرك ينصب على الامور المادية , بالوكت اللي اني عطشانه للحياة الروحية , اكلك , والاحسن , كل واحد خل ايروح بدربه , ويتجه باتجاه مايحتاجه من الحياة
جلال --- هذا اخر قرار الج ؟؟؟؟
الزوجه ----- ماكو غير حل .
جلال --- وشلون راح نسد حلوك الناس ؟
الزوجه --- مو احسن منصير فرجه كدامهم على نهايتنه الموحلوه ؟
جلال --- ( بعصبيه ) بس راح ننفضح , ونصير علج بحلوكهم .
الزوجه --- لاتخاف كلنا بالهوى سوى ,لو تنكشفلك حقيقة هناس اللي تخاف من عدهم , راح تشوفهم عايشين بنفق اظلم وطويل مثل نفس النفق العايشين بيه , عايشين تحت غطاء المحبه والاحترام الكاذب , يتظاهرون بالمحبه والانسجام , بس بدواخلهم اكو حقد دفين وكراهيه , وممصدكين يجي يوم ويتخلص كل واحد من الاخر .
جلال --- انت كمتي تهذرين ومو بوعاتج .
الزوجه ---- مااتصور فد يوم جنت واعيه على روحي اكثر من هاي اللحظه , متمسكه بكامل وعيي وثقافتي , اضافة الى هذا اني انظر للحياة الزوجية بغير منظارك .
جلال --- وليش اكو اختلاف مابين نظرتنا للحياة الزوجية !!
الزوجه----- هوايا , وهذا اللي اعاني منه .
جلال ---- تعانين منه ؟؟؟!!!
الزوجه ---- ( بعصبيه ) طبعا , يابارد وابرد من الثلج , لا احساس ولا مشاعرانسانية ولا عواطف وجدانية , انسانه تبحث عن الالفه والانسجام , تريد تسمع منك حلاوة اللسان وبلاغة الكلام ايعبر عن شي اسمه الحب , واني فاقدته من زمان , ومع الاسف مااشوف منك غير بس الصد والحرمان .
جلال --- انت حقج , واني اعرف كلش زين باللي تعانيه , اللي ذكرتيه كله واضح كدامي , وحقج لو تنفرين مني وتحاولين تعيدين حساباتج ومواقفج مني , بس اني هم حقي , هوايا مرات جنت افكر اتقرب منج , واحب اسمعج جلمات حلوة , لكن ماجنت اشوف منج غير بس الجفاء والتعالي ,وجنتي دائما تحسسيني اكو مسافة جبيرة مابيني وبينج .
الزوجه --- تجيني باوقات اكون بيها مهمومه , وطامسه الفوك هامتي بالمشاكل والمعاناة , فشلون تريدني ابادلك بعواطف اني مااملكها بذيجه اللحظه ؟
جلال --- دائما تكدرين تخلقين الاعذار الاخطائج , وتبريرات تخليج ابموقف البراءة واني المتهم فاني افضل كل واحد منا ايروح السريره , وباجر الصباح رباح , بلكت نشوفلنه حل .
الزوجه ---- واشراح ايكون الحل ؟
جلال ---- واكدر اجاوبج وانت سكرانه ؟
فاتن ---- لا موسكرانه , بس اني كلش مرتاحه بعد مافرغت اللي بداخلي .
جلال --- وبهشكل تكونين مرتاحه ؟
فاتن --- بلي , نعم مرتاحه ومتونسه ومنطلقه .
جلال ---- بس حالتج هاي تثير شفقتي عليج ,ماكادره تشيلين روحج , تترنحين يمين وشمال .
فاتن --- ( وهي تبكي , موسيقى حزينه مناسبه ) اكدر انتجي عليك وتساعدني اروح المكاني ؟
جلال --- وليش لا !!
فاتن --- وتكدر تسندني ؟؟
جلال --- بكل ممنونية .
فاتن --- خليني اتقرب من انفاسك واحس بروحي كدام انسان ايبادلني العواطف والمحبه .
جلال ---- حبيبتي ---
فاتن --- (مقاطعه ) شنو ؟ اشكلت ؟ عيدها مرتلخ !
جلال --- حبيبتي .
فاتن --- مع الاسف طلعت من حلكك يابسه ومن دون مشاعر , بس مجرد صوره جميله ترمز للحب , شكل ومن دون مضمون .
جلال --- لانه نظرتج للحبيب مجرد خزان تملئين منه ماينقصج من المتعه وتحرير غريزتج من خلال ممارسة هاي المتعه .
فاتن --- لانه بداخلي غريزه مكبوته ومحبوسه , اريد احررها ومنتظره من اساعدني على تحريرها .
جلال --- وهذا كل ماتريديه بعلاقتج من الجنس الاخر ؟
فاتن --- ( تضحك ساخره ) وهو اشعنده اكثر من هذا ؟
جلال --- والروح اللي بداخل الجسد , مافكرتي اذا حاولت تحرير غريزتج راح اتدنسيها ؟
فاتن --- بس هي هبه من الرب منحها للجسد وبوكت ماخلق ادم من الطين , غرائزنا هي دلالات انجذاب الجنسين الواحد للاخر , ومن دونها تنطفي الحياة , وبوجودها راح نعيش متعتها ومبتعدين عن الكابه والعقد النفسيه , ومبتسمين للحياة وللدنيا .
جلال --- وتعتقدين هو هذا المهم بالحياة ؟؟؟
فاتن --- ( تضحك ) اخ منك , رحت بعيد بتفكيرك , وبضمن نظره كلش ضيقه .
جلال ----- مدافتهمج !!!
فاتن --- لانك تعيش باطار ضيق وتخاف من ممارستك الها , تحسبها خطيه , بس هي بالعكس , هي حق من حقوقك الحياتيه اللي خلقها الله بجسد الانسان , هي نافذه مفتوحه على عالم المتعة والانسجام , الله سبحانه تعالى اوصى بيها بسفر التكوين لمن خلق الانسان على صورته ذكرا وانثى وباركهم وكال : اثمروا واكثروا واملاءو الارض , فلو مو نعمة الله ووصيته بالاكثار والانجاب لكانت الحياة خاويه , ومثل ماشبهناها , مجرد صحراء قاحله .
جلال --- انت هي الصحراء القاحله .
فاتن ----- لا --- اني ينبوع الحياة .
جلال --- (بعصبية ) غلط , انت مصدر كل الكوارث والماسي بالحياة .
فاتن ---- انا مصدر السعادة ومتعة الحياة , سبقتني حواء , وسبقتني فروديت الهة الحب والجمال , فينوس , وجميع نساء الاغريق واليونان والرومان ونساء بابل واشور , وجميع النساء المذكورة بالتوراة والانجيل والقران , وجميع الكتب السماوية , اني اللي من دوني تطفا الحياة وتموت , والهسبب وجودي بهل دنيا هو سبب ديمومتها ,لانه مني تنبع الحياة , واني اتحداك .
جلال --- ( بشدة وقوة ) فاتن , انت اخذتينا بنقاش بعيد عن مشكلتنا الاساسيه .
فاتن --- ( بصوت اقوى ) هي هاي مشكلتنا الرئيسيه واللي هي السبب بخلافاتنه الزوجيه , ومو بس احنا , هاي مشكلة هوايا من الناس , وهي سبب الكوارث والدمار وماسات الحروب والخلافات بين معظم الدول العظمى , اختلفت رؤسائها مع نسوانهم وكانت ردود افعالهم تدمير العالم , وانتهاك حرية الانسان باوطانهم وهظم حقوقهم بالحياة , لو اني غلطانه ؟( موسيقى حزينه مناسبه )
جلال --- انت مزجت الحياة الزوجية مع الحياة السياسيه .
فاتن— هو هذا الواقع , الحياة الزوجية اذا ماعشت خصوصيتها , اختلت الموازين وانعدمت قيمها , وبعدها ينولد التمرد والعصيان , و تصير الحياة الزوجيه حياة قاتله ومسيسه , وتكوم متفكر ابمحيط عائلتك , تلكالك اهتمامات ومن خلالها اتنفس عن الكبت المدفون بذاتك ,
ومن جملتهاالانشطه الرياضية والاجتماعية والسياسيه , وبعكسها من دكوم تصب اهتماماتك بعائلتك , راح ايكون عندك اسرة سعيده ومتكامله , وافرادها تملئهم المحبه والعلاقات الاجتماعية الصحيحه .
جلال --- وتعتقدين اني سبب التعاسه والقلق , و سبب هل تمرد اللي فرضتيه علينا ؟
فاتن--- عليك وبس , موعلينا , تدري ليش ؟ لانه بقيت استجدي منك الحب والحنان , ولمن مليت, بقيت اعيش هذا الحرمان , وهذا هو سبب التمرد .
جلال --- ومن دون ماتبحثين عن المشكله الرئيسيه وتفتهمين موقفي ؟ هوايا تحدث مشاكل بين العوائل لكن ابفطنة الزوجين تنحل .
الزوجه --- حاولت هوايا ومافاد , صرتلك ربان السفينتك , وقدتها باتجاه بر الامان والسلامه , لكن انت بقيت تصر على اغراقها ومن دون ماتحاول ان تساعدني , وغركت السفينه , وحاولت اتشبث بشي ينقذنا من الهلاك والغرق , وانت ولا كانه داير بال , جلبت بخشبه من حطام سفينتنه , ومديتلك ايديا حتى انقذك من الغرق , بس انت فظلت الموت على الحياة ومن غير سبب , فهمني شنو مشكلتك , مو حلوه ؟ مو لايكه الك ؟ لو اقل منك ثقافه ومعرفه , فهمني شنو هي مشكلتك ؟
جلال --- ( موسيقى حزينه ) العله بيا اني .
الزوجه --- اذن افتحلي كلبك واعترفلي , حتى اكدر اساعدك .
الزوج جلال --- داعيش حاله من القلق وعدم راحه نفسيه , واني على علم بكل معاناتج واعرف اسبابها , والحك وياج , لكن اني هم عندي مبرراتي اللي تقيدني من ممارسة الحق الطبيعي مابين كل زوج وزوجه ,
فاتن ---- والسبب ؟
جلال ---- تقبلين نظلم اولادنا وهمه ينولدون بوسط الضيم والعذاب والماسي , دتشوفين منين ماندور بوجهنا منشوف غير بس الكوارث الطبيعيه والماسي الدولية , واللي ايعيش بهل حياة , تكون حياته مسيره باتجاه الموت وغصبن عنه , ومايكون مخير بيها , فتقبلين نظلم اطفالنا ؟
فاتن --- ( باستغراب ) مدافتهم , فسرلي اشتعني بكلامك ؟
جلال --- اني اعيش حياة كلها خوف ورعب , تصوري , حتى اكدر اكلج فقدت الثقه بنفسي , تجيني ساعات , تخليني اسرح ويا افكار تعقدني وتخليني انكمش على روحي , واحبس معاناتي بداخلي .
فاتن --- وليش تكبر الامور ؟ يعني الهل درجه ؟
جلال --- ( بعصبيه ) فاتن تتكلمين وكانه انت غريبه عن هذا الواقع , ابنج اذا ولدتيه وجبتيه على هالدنيا , هو ملكج لو ملك الدوله ؟ اتعبين على تربيته وتكبريه ويصبح شاب تفرحين بطوله وتتباهين بشبابه , وعلى غفله تاخذه الحكومه منج بحجة ايدافع عن الحدود الامنه , وهذا الشي طبعا مايشمل ولدهم , ليش ؟ لان ولدهم ايضموهم ويختلوهم تحت مضلات امنه , وبس ولدنا ولد الخايبه ايدربوهم على حمل الاسلاح ويدزوهم على محارق الموت , فليش نكون احنه السبب بدمارهم ؟
الزوجه ---- وشنو الي ايخليك تفكر بهل تفكير ؟
الزوج --- لان شفتهم بعيني , صدكيني لمن جنت بالعسكريه واني من مواليد جبيرة عمر ,اخذوني غصبن عني , كوة مروة , لازم تخدم الوطن , هذا حجيهم طبعا .
الزوجه --- حجي منو ؟
الزوج --- ( باستهزاء ) حجي المواطنين الغيارى , حجي ذوله الخاتلين تحت مظلة الحكومه , وبعيدين عن محرقة الموت , مسوين نفسهم مواطنين درجه اولى , ايحاسبون ويعاقبون ويعدمون على اساس عدهم غيره على هل وطن , وهمه كاعدين وخاتلين ببيوتهم , ياكلون ويسكرون ويعربدون وينهبون ويسجنون الناس بحجة الخيانه , وحاسبين ارواحهم بس همه المواطنين الاشراف , وماعداهم كلهم خونه , فشلون تخلين ولدج بين رحمة ذوله الظلام , والي ماعدهم لا رحمه ولا انسانيه ,شلون تردين اسلم ثمرة حبي وحبج بين ايديهم واظلمهم ؟
فاتن --- بهل حاله راح تظلمني اني هم وتهظم حقوق الامومه اللي هي غريزة بذاتي .
جلال ---- فهميني , ياام تحب تزف ابنها وتحني جفوفها بدمه المسفوك وتشيعه شهيد , وهو ملفوف بوصلة قماش ومخطوط عليها , الشهداء اكرم منا جميعا وعلى لاشيىء ؟ خل واحد ايسوي احصائية بالشهداء ,جم شهيد راح من ولد ذوله الديحكمون باسم العداله والمساوات , مقارنة مع شهداء ولد المواطنين من الفقراء والمعدمين ؟ فرق شاسع , زين وين العداله ؟ وين المساوات , وين نكران الذات والدفاع عن حدود وتراب الوطن ؟ قابل الوطن مكتوب على جبين هل فقراء والمعدمين ,والبقايا بس ملتهين بالبوك واللغف ومعفيين من الدفاع عن حدود وتراب هل الوطن ؟
فاتن --- بس هذا الحجي مال ايام زمان , وفرق مابين هسه ومابين ايام زمان !!!!
جلال --- وهل وكت اتعس من ايايم زمان , ليش ؟ بايام زمان جانوا ياخذوج على مطحنة الموت واكو مسافه مابينج ومابين الموت , لكن بهل وكت , يجيج الموت على غفله , من سياره مفخخه , لو عبوه ناسفه , لو رصد من واحد مجهول , ماتعرفين شي عنه لا هويته ولا هو منين , طكج برصاصه وخلاج ترفين بجناحج وعاضه لسانج , وانتي ماداريه بروحج , فقارني ياموت هو الاحسن , اللي ينطيج مجال تصلين وتتقبلين الله وتكفرين عن ذنوبج لو الموت الغفلاوي ؟
فاتن ---- واشجاب هل تفكير على بالك ؟
جلال --- اخذنه عبر وتجارب من الماضي , وخوفي من المستقبل .
فاتن ----- واشبيه المستقبل ؟
جلال --- اتعس من الماضي والحاضر .
فاتن --- لا تخاف الحياة طبيعية ومستقره .
جلال --- اي طبيعية واي استقرار ؟ مدتسمعين الاخبار واشديصير بالعالم ؟, مدتعرفين وتسمعين اكو حروب ودمار وخراب ؟ كوارث طبيعية وزلازل وفيضانات تقضي عل البشريه وتفنيها !!!!
فاتن ---- وشنو علاقتها بحياتنه الزوجيه ؟
جلال ---- شلون مالها علاقه ؟ مو انت جزء من هل حياة !!!! يعني من تسمعين بهل اخبار تفرحين ؟ وتتمنين ان ايكون عندج اطفال ؟
فاتن --- وليش لا , اتمنى ان ايكون عندي اطفال , حالي حال بقية الامهات , وهذا الشي حقي , وهو من حقوق الامومه !!!
جلال --- واذا كان هذا الحق ايسبب تعاسة حياة ومستقبل ولدج , تقبلين ان تتمتعين بيه ؟
فاتن ---- راح افديهم بحياتي وحافظ عليهم .
جلال ---- صدكيني ماراح تكدرين .
فاتن --- قصدك .
جلال --- مو مية الف مره اعيد واكرر , متعتنا وعلى حساب تعاسة غيرنا هي الانانية بحد ذاتها,زوري العوائل اللي مثلنا واطلعي على معاناتهم , وشوفي حال ولدهم شلون حال , اطلعي على اخبار العالم , وشوفي الالاف من المتشردين , يلتحفون ارصفة الشوارع ونايمين تحت هل امطار والبرد القاسي وهمه ايلعنون ذاك اليوم اللي انولدوا بيه , سمعي اخبار الدول الافريقية واطلعي على حال المئات من العوائل المتشردة واللي تعاني من الجوع والامراض , اطلعي وشوفي واذا عجبج حالهم ذاك الوكت طالبي بحقوق الامومه .
فاتن --- وليش تذكرلي واقع اطفال افريقيا لو اطفال الدول العالم الثالث ؟ اذكرلي اطفال الدول المتحضره , واللي عايشه برفاهية وخير وسعاده .
جلال ---- ماكو اي مقارنه , تعرفين ليش ؟ لان الدول المتحضرة تحترم الانسان , حتى حيواناتهم تتمتع بحقوق افضل من عدنا , لكن هنا الانسان حاله وحال اي بهيمه عايشه على فتات الاخرين , وجماله ابمنية وصدقه , ( بحزم وقوه ) فاتن , لازم تعترفين بالواقع , اطفالنا مشردين , اطفالنا ميتين من الجوع وحسره عليهم لكمة الخبز .
فاتن --- بس افكارك هاي تخليك بعيد عن التفائل , بعيد عن الاستقرار , ماتخليك تمارس حياتك الطبيعيه !!!
جلال ---- انت ليش تبتعدين عن الواقع وتنهزمين منه ؟ مو المستور اقوى من المكشوف !! ماتعرفين اشضاملنا القدر , الله بعون المظلوم , الله بعون المظلوم ( يتالم وهو ماسكا قلبه متوجها الى غرفته ويترك زوجته في الصاله) .
فاتن --- ( مع نفسها ) اكيد هذا اتخبل , هذا ابد مو طبيعي , لازم يعرض نفسه على طبيب اخصائي , طبيب نفساني , والا راح تكون حياتنه جحيم , جحيم , جحيم ( تتغير الاضاءة وتختفي معالمها , باسثناء اضاءة سبوت لايت موجهه على فاتن وهي مستلقيه على الاريكه وفي يدها كتاب كانت تطالع صفحاته , وتغلب عليها النعاس , بحيث كانت تعيش احداث ما عرض في حلم , وهي مازالت تصرخ وتتقلب على جنبيها وبمعانات ) جحيم , جحيم , ----
جلال ---( يخرج من غرفته مهرولا باتجاه زوجته ليلقاها مستلقية على الاريكة , وهي مازالت في حالة الصراخ ) فاتن , فاتن , حبيبتي فاتن كعدي , هاي شنو دتحلمين ؟
فاتن --- ( تستيقظ من نومها وبشكل مذهولة ومرعوبه ) حبيبي جلال , هم زين اجيت ولحكتلي , جنت مرعوبه ومتوتره من هذا الحلم .
جلال ---- وانت اشبقاج هنايا ؟ غير تجين للغرفه وتنامين ؟
فاتن --- ماكدرت انام , كلت خل اطالع بهذا الكتاب , وما اشوف الا غفيت , عفيه عليك حسيت على صوتي .
جلال ---- ديالله خلينا انفوت انام .
فاتن --- خليني احجيلك حلمي !
جلال ---- شنو ؟ يمعود الدنيا نص الليل خل انفوت انام وعود من تصحين باجر الصبح احجيلياه .
فاتن ---- ( تنظر الى زوجها وهي لا تصدق ) حبيبي جلال , اني صدك جنت داحلم ؟
جلال --- اسئلي روحج وكليلها اني صدك جنت داحلم ؟ ( يضحك ) يلله خلينا نفوت انام , والصباح رباح .
( الفصل الثاني )
المنظر :( نفس الديكورالسابق في منزل جلال وفاتن , انما هناك بعض الملابس والازياء البسيطه , معلقة على شماعات غير تقليدية , كان تكون خشبه مستطيلة الشكل منتصبة عامودية , معلق عليها بعض الرموز البغدادية , كان يكون عرقجين بغدادي قديم , وكذالك يشماغ بغدادي معلق على خشبة اخرى , وكذالك الكيوى والمنسوج من الصوف مركون في زاوية ظاهرللعيان)
شخوص الفصل الثاني :
فاتن ---- الزوجه
جلال --- الزوج
عدنان --- الطالب
الشقاوه البغدادية---- شخصيه قديمه بغدادية من شقاوة اهل النخوه
الامراهة العجوز--- امراة بغدادية من اهل المحله عمرها مايقارب الخمسون سنه
ابو شامه ---- شقي بغدادي وصديق الشقي البغدادي
ام عادل --- امراه بغدادية
سالم ---- صديق الشهيد عادل
الصوت ---- يمثلون السلطه المتنفذه
جلال ---- ( يظهر من خلال حزمة ضوئية صادرة من سبوت لايت , وهو في حالة تامل مناجيا نفسه , وهو يعاني من التغييرات والتي حصلت لحياته ) مرات الانسان ايدور عراحه والاسترخاء , فيحاول يتذكر ايام زمان , وخاصة طفولته , ويقارن مابين الماضي والحاضر ,قبل جانت الناس عايشه على حب الله ومعتمده على اشياء بسيطه بحياتها , وهليوم , التكنولوجيا الحديثه صارت تكضي احتياجات الناس . هل تكنولوجيا ضعفت من موقف الانسان الحالي , وخلته انسان اتكالي وضعيف البنيه , بعكس ابهاتنا واجدادنا , واللي جانوا معتمدين على قوة ابدانهم بتنفيذ اعمالهم واشغالهم ,والعرك ايكت من جبينهم , لكن مع هذا جانوا عايشين بخير وسعادة وصحتهم عال العال .
فاتن ---- ( تخرج من غرفتها وتتفاجا برؤية جلال وهو يكلم نفسه وبندهاش وتعجب ) جلال ؟!
اشوفك صاحي , مانايم ؟
جلال --- صدكيني طار النوم من عيوني , وماكدرت انام .
فاتن ---- اخاف متوتر ومشغول البال !!!
جلال --- مال متوتر شويه , بس افكر بهل مشاكل اللي موعل بال , حياتنه صارت كلها معانات .
فاتن ---- صحيح , بس تدري لو مو هل معانات , حياتنه مابيها اي طعم وسعاده .
جلال --- قصدج المعانات تجلب السعادة ؟
فاتن --- مو بالشكل المباشر , من ايكون عندك مشكلة وتوتر اعصابك , وبعدين يجيك الحل عود ذاك الوكت راح تفرح لو لا ؟
جلال --- صحيح افرح واعيش بسعادة ماتنوصف , بس مع الاسف لو الخير والطيبه الانسانية موجوده بحياتنه .
فاتن --- ومنو كايلك الخير والطيبه ماموجوده بحياتنه ؟
جلال ---- بس عند الانسان اللي يبحث عن الخير والطيبه يلكه , بس العجوزي دائما ايعيش كئيب ومقطوع الامل من الحياة وحلاوتها .
فاتن --- وانت واحد منهم .
جلال ---- شلون ؟
فاتن --- لانك ماتبحث عن الخير والطيبه .
جلال --- ( بعصبيه ) فاتن , الخير والطيبه هي سمات طبيعيه وانسانية بنفس الوقت , ودنياتنا مليانه منها , بس حيفي على اللي ايخلي فد حاجز مابينه ومابين هذا العالم الجميل .
فاتن ---- ولعلمك هل عالم الجميل اللي تحجي عنه يحتاجلك عوامل تساعدك على اكتشافه .
جلال --- وشنو هل عوامل ؟
فاتن --- معقوله ؟ التفائل و العزيمه , والارادة القوية .
جلال --- صحيح , رجعتيني الايام زمان و ذكرتيني باحد تلامذتي من طلاب معهد الفنون الجميله .
فاتن --- واشبيه ؟
جلال --- هذا الطالب اسمه عدنان , جنت اتابعه واراقبه من بعيد ,يعني حرام اشوف البسمه على وجه , دائما كئيب وحزين وكالب جهرته , سالته فد يوم وكتله ( هنا المشهد يرجع فلاش باك لحدث سابق في محاورة مابين الاستاذ جلال والطالب عدنان , مع تغيير في الانارة حيث تختفي عن الزوجه وتسلط على جلال وعدنان , مصاحبة مع الموسيقى الملائمه ) .
الاستاذ جلال --- ( ينادي على الطالب عدنان ) عدنان , عدنان , تعال يمي , رايدك بحجايه .
الطالب عدنان --- ( يتقدم بخطوات متثاقله باتجاه الاستاذ جلال ) نعم استاذ , تؤمرني بشي ؟
الاستاذ جلال --- ابني عدنان اشوفك تعبان ومامرتاح ؟
الطالب عدنان --- و ياهو المرتاح بهل وكت ؟ اللي يكلك اني مرتاح , ايجذب على روحه .
جلال ---- مريض؟ تشكي من حاله وماتكدر تحلها ؟ اني اساعدك بحلها .
عدنان ---- لا استاذ , اشكرك لا مريض ولا اشكو من شي .
جلال --- لعد كلي , ليش ماتحلق وجهك ومجلب بهل هدوم الوسخه واللي ماتليق بطالب يسعى حتى ايصير فنان ؟
عدنان --- استاذ , مليت من هل حياة , كلها روتين , ومابيها اي شي جديد .
جلال ---- ابني عدنان , الانسان هو بايديه يخلق السعادة , وكل انسان اذا يبحث عنها يلكاها , لكن العجوزي واللي كاعد ابمكانه , مايشوف غير الضيم والتعاسه والكابه , والهسبب ايشوف الحياة بيها ملل.
عدنان ---- تقصدني استاذ ؟
جلال ---- يمكن , لانه حالتك هاي ماتعجبني فد نوب .
عدنان ---- ( بابتسامة عتاب ) واشتعرف انت عن حالتي ؟
جلال --- من زمان واني مراقبك , مايعجبني لا شكلك ولا مظهرك .
عنان --- ومن دون ماتعرف السبب ؟
جلال ---- ( في شيىء من الحدية ) ماكو اعذار , انت طالب والمفروض تادي واجباتك , وتهيىء مستلزمات التفوق والنجاح .
عدنان --- طبعا وهذا اللي انت تريده .
جلال --- مو بس اني , هاي امنيات كل واحد ايحبك ويفكر ابمستقبلك .
عدنان --- بس استاذ كل انسان وظروفه , وخاصة اذا كانت ظروف صعبه وقاسيه .
جلال --- اي ظروف هاي ؟ انت بعدك شاب , تعصر الصخرة اطلع منها مي .
عدنان --- بس اني طالب , مودكول واحد معتمد على راتبه وديعيش منه !!
جلال --- ولو .
عدنان --- تصور واحد مثلي جيوبه فارغه , ومايكدر ايلبي احتياجاته الخاصه , وتبقى عيونه على هذا وذاك ,تقبلها انت ؟
عدنان ---- بضمن قناعتي اقبلها لانه موشرط تبقى عيوني على هذا وذاك .
عدنان --- قد ايكون عندك فلسفه خاصه بالحياة , بس اني اختلف عنك بهوايا امور .
جلال --- نعم , لانه نظرتك للحياة نظرة تشائمية .
عدنان ---- ( بعصبية ) وطاكه روحي منها . وانعل يوم اللي ولدت بيه .
جلال --- ( يفكر بحالة عدنان ) والهل درجه ؟
عدنان --- ( بعصبيه اكثر ) واكثر .
جلال ( ساكت يتامل ردود افعال عدنان )
عدنان ---- ( مستدركا ) العفو استاذ , قد ايكون تماديت بكلامي وياك , وعليت صوتي بليا احترام , بس ارجوك تسامحني وتعذرني .
جلال --- ( بعد تفكير وشيئا من الصمت ) زين عدنان , اريد منك باجر ماتداوم بالمعهد , بس شنو ؟ من الصبح تروحلي على شعبة الطوارىء ابمستشفى اليرموك , وتراقبلي الوضع هناك فد ساعة , وتكتبلي كلشي اللي تشوفه بعينك بتقرير وتجيبلياه , واضافة الى كل هذا اريد منك ردود افعالك واحاسيسك ومشاعرك وانت توصف ماشفته بعينك بالتقرير , زين ؟
عدنان ---- شلون استاذ ؟ مامفتهم عليك .اروح الشعبة الطوارىء ؟
الاستاذ ---- وابمستشفى اليرموك .
عدنان --- زين استاذ والغياب من المعهد شلون ؟
جلال --- هذا تكليف مني وتكدر تعتبره واجب , ومن ناحية الغياب اطمئن .
عدنان --- ( سكوت لحظه ) زين استاذ راح اروح وامري لله .
جلال --- عكب باجر منتظرك تجيني وجايب التقرير كامل .
عدنان ---- ( بتردد ) استاذ ليش ماتعفيني من هذا الواجب ؟
جلال ---- لعلمك هذا الواجب , متوقف عليه نجاحك , وبنفس الوقت راح ايساعدك بالسعي السنوي , بس اذا مانفذته اعتبر نفسك راسب هسنه .
عدنان --- صدكني استاذ ليهسة ماديستوعبها عقلي , الله ايخليك , انت دتتشاقى وياي لو من صدك ؟
جلال-- لا جديات ,, وتنفذ اللي كلفتك بيه .
عدنان --- معقوله ؟
جلال --- معقوله ونص , ومثل ماكتلك , نجاحك ورسوبك متوقف على هذا التقرير , ديالله اتوكل , والله وياك .
عدنان --- ( بتفكير وتامل ومع نفسه , مصاحبا مع موسيقى ملائمه , الاضاءه تختفي عن جلال , انما تبقى مسلط حزمة ضوئية على عدنان ) يعني معقوله اروح للطوارىء وابقى ساعة متفرج عناس , واكتب شيصير ومايصير بتقرير يتوقف عليه نجاحي ؟ حيرني هل استاذ , يعني شنو غرضه وهدفه من هذا التقرير ؟ ( تبدا الموسيقى بالتصاعد و تختفي الاضاءه عن عدنان , وبالتدريج تتغير الانارة ويظهر جلال مع فاتن , بعد ان ان يخرج عدنان من المسرح ومن ثم نعود الى المشهد السابق بين فاتن وجلال )
جلال --- هذا النموذج من البشر يافاتن , هو اللي ايجيب النفسه حالة البؤس والشقاء والقلق , ليش ؟ لانه مامتحسس النعمه اللي وهبها اله الخالق !!!!
فاتن --- وبعدين عدنان نفذ اللي كلفته بيه ؟
جلال ---- طبعا , وهو الممنون , تصدكين اجالي ثالث يوم للمعهد ايدور عليا , ولمن وكف كبالي انبهرت لمن شفته , حالق وجه ومبدل هدومه , ومتانق بشكل مايوصف , ظل يحظن بيا ويشكرني .
فاتن --- وليش ؟
جلال --- ( متعجب من سؤال فاتن ) ليش ؟ لانه اتعرف على نعمة الله اللي يملكها ومايملكها غيره , بقى هناك بشعبة الطوارىء ايراقب ويكتب , هذا المضروب راسه , وذاك اللي مكسوره ايديه , وذاك الجايبيه ميت , كل هذا الشيي شافه كدام عيونه , وحمد الله على سلامته , وهو صاغ سليم , ياكل ويشرب ويتنفس من هل هوى , واكثر شي , هو بصحه وعافية .
فاتن --- بس هو جان متكئب ,تكدر دكول عنه جان مريض نفسيا !!!!
جلال --- صحيح , بس هاي الاحداث اللي شافها كدام عينه هزته هز , وخلته يصحى على روحه , بعد ماشاف نفسه صاغ سليم ومتعافي . وهوايا اكو من امثال عدنان ----
فاتن --- وشنو اسباب كابتهم ؟
جلال --- شوفي فاتن , ذوله اللي مثل عدنان , يتمنون هوايا اشياء بحياتهم , بس ايديهم ماتنوش , والهسبب تحصل عدهم الكابه و وينكمشون على نفسهم , وينعزلون عن العالم , وبذاك الوكت تحصل عنده قناعه بانه هو مظلوم ومحروم من تحقيق امنياته بالحياة .
فاتن ---- اكيد حالته مثل حالتك .
جلال --- ( ضربه موسيقيه ) شلون ؟
فاتن --- لانه دائما يتشائم ومايفكر بالخير , ومايشوف الدنيا مثل مايشوفه اي واحد سعيد .
جلال ---- ( بعصبيه ) فاتن الخير موجود , والطبيعه الحلوه تسعد اكبر انسان , ( باستدراك ) بس الانسان ابعض الاحيان ايعيش تحت ضغط قاسي , ايخليه ايفكر بخيال اوسع من حدود الواقع اللي ايعيشه , ويبالغ بتفكيره الى اقسى حدود , بس هم ارجع وانطيه حقه الهذا الانسان , ليش ؟ لانه الانسان الحساس , واللي يملك مشاعر انسانية واحاسيس وجدانية , ايخاف من قساوة هل حياة , ويكوم مايفكر بروحه وبس , اني اختلف عن عدنان , عدنان ايفكر ابمغريات دنيويه , لكن اني افكر تفكير بعيد عن الانانية , افكر ابمصير هوايا عوائل ميته من الجوع , وحسره عليهم لكمة الخبز,
واطفال متشردين ايدورون بالزباله حتى ايسكتون جوع بطونهم , وعوائل بليا مساكن ومتيتمه من الاب ومن الام , راحوا ضحية عبوات ناسفه لو بشر ايفجر نفسه بين هل ناس بحجة الدين والدين براء منهم , شحجيليج وشكول !!! لادكليلي ولا اكلج , الخير راح ويا اهله , ومابقالنه غير بس نبجي على حالنه , ايه ---- ايام زمان بالعشرينيات وفوك , يحجيلي ابويا الله ايرحمه , عن شقاورلغية بغداد ---
فاتن --- (مقاطعة اياه ) شقاورلغية بغداد ؟؟!! وذوله اشجابهم على بالك ؟
جلال ---- ذوله جزء من تاريخنا وتراثنا وموروثنا الشعبي .
فاتن ---- شقاورلغية بغداد ؟؟!!
جلال ---- طيبتهم وغيرتهم علمحله واهلها , توصل حد يفدي نفسه وبكل شجاعه وافتخار , فديوم حجالي ابويا وكلي , ( هنا تبدا الموسيقى البغدادية , ويفضل العزف بالسنطور , او الجوزه ,او القانون , تتغير الاضاءه , وتخرج فاتن من المشهد , ويذهب جلال لتناول اليشماغ البغدادي والمعلق على الخشبه والعرقجين البغدادي , ومن ثم الكيوه البغدادية في اقدامه, اضافة الى سير من الجلد في معصميه ,لتمثيل شخصية الشقاوه البغدادية , الاضاءة لمشهد ليلي )
الشقاوه ---- اويلي عليكم اهلي وخلاني اهل محلتي الطيبين , ناموا رغد , واني اسهر على راحتكم , وهيله للفريب اللي يعتدي على محلتنا , اسويه شذر مذر , اخربط وجه , اسوي خريطه بوجه , حتى ايكون عبره الكل من ايجرب يعتدي على محلتي واهلها ,( فجاة يشاهد امراة مستورة الوجه وصوت بكائها المكبوت مع نفسها , وفي يدها فانوس لتضيىء طريقها وهي تسير الهوينا , مع نفسه ) هاي منو ؟ هاي مريه !! اشعدها طالعه بهل ليل ؟ ( ينادي عليها ) يمه , يمه اشعندج طالعه بهليل ؟
الامراة العجوز ---- اخ ياوليدي , شرايد مني ؟
الشقاوه --- اخ ؟ اني موجود على هدنيا ومريه بهل عمر ومن محلتي وتصيح اخ ؟ تؤمريني يوم ؟
الامراة العجوز--- شرايد مني وليدي ؟
الشقاوه --- ارد اساعدج يوم , اني خادمج اامريني .
الامراة العجوز --- بنتي, بنتي وليدي متاذايا من راسها وراح ايطك .
الشقاوه --- وانت وين رايحه بهليل ؟
الامراة العجوز---- رايحه البيت حجي قدوري الحلاق .
الشقاوه --- بيت ابو مصطفى ؟
الامراه --- اسالهم , بلكت عدهم شي ايطيب وجع راسها .
الشقاوه --- هاي مايفيدها غير بس ملا حمادي , ايعزملها , وكلشي يكعد ابمكانه . الامراة العجوز---- ابني خل ايصبح الصبح , وهم اخذها عند الملا .
الشقاوه ---- هذا بس ايخلي ايده على راسها , وينفخ نفخه ابوجها راسا اتطيب .
الامراه العجوز ---- اي وليدي اي .
الشقاوه --- اكول يوم . مااريد اكون فضولي , بس حبيت اسال , انت مو ام حازم البنا ؟
الامراه العجوز --- بلي وليدي , بس انت تدري بحازم رايح يم عمومته باسطنبول .
الشقاوه --- اي صحيح , اسمعت هيجي حجي , ولا يهمج يوم احنا ابمكانه , اشتحتاجين اني يمج
الامراه العجوز ---- ربي ايخليك , وليدي, من ارجع للبيت راح ابخرلك بخور , حرز وبركه الك .
الشقاوه --- ولا تنسين الحرمل كلش ايفيد , هذا الحرمل يطرد العين والحسد , وحتى الجن .
الامراه العجوز--- بلي وليدي بلي , هم زين ذكرتني بالحرمل , راح اخذلي شويه منه من بيت حجي قدوري الحلاق .
الشقاوه --- وعليش اني عندي بجيبي , اصلا جيبي مايخلى منه , كل مااحس بضوجه اكول لزمني الجن , فلو اطلع قامتي والوحله بيها , لو ابخرلي شوية حرمل , وايد ابئيد , راسا ايطير عقله من ريحة الحرمل , فيعوفني ويروح .
الامراه العجوز --- زين وليدي , استسمحك , اني رايحه .
الشقاوه --- وين ؟ انت ترجعين للبيت يم بنتج , واني خمس دقايق مااطول , اروحله الحجي قدوري للبيت , واشوف شعنده من هل سوالف , اجيبلجياه للبيت , ماراح اتعطل .
الامراة العجوز ---- ابني اخاف تصير زحمه عليك .
الشقاوه --- صدك جذب , اني موجود واخليج بهليليه تتعنين البيت حجي قدوري , غير ادفن نفسي بالكبور , يلله يمه يلله , انت ترجعين البنتج , ولحظات اكون يمج , يلله الله وياج .
الامراه العجوز --- فدوى الشاربك وليدي , اني راجعه للبيت ومنتظرتك .
الشقاوه --- الله وياج . الامراه العجوز ----- ( تعود الى دارها , وهي تولول ) يامعين , ياالله , الحمدالله والشكر , الحمد الله والشكر ( تختفي عن الانظار ).
الشقاوه --- ( يتناول يشماخه من على كتفه وينفظه بالهواء ) اني ابن عمشه, وعد عيناكم يااهل المحله ,( ينادي على صاحبه والذي كان واقفا بعيدا عنه ) ابو شامه .
ابوشامه --- اغاتي , اامرني ( يتقدم نحوه ) .
الشقاوه --- شكو بجيبك طلع .
ابو شامه --- هسه اشوف ( يمد يده في جيب سرواله ويخرج مافي جيبه ) هاي تطلع ربيتين ونص .
الشقاوه --- جيبها , خطيه ابنها مسافر الاسطنبول , وبتها مريضه اخاف يحتاجون خرجيه .
( موسيقى , اظلا م على المشهد السابق , ويعود مشهد جلال وفاتن )
فاتن ---- ( بتعجب ) معقوله هذا الشي يطلع من شقاوة بغداد ؟
جلال --- ( وهو يخلع اليشماغ والعرقجين والكيوه ) ماتتصورين الطيبه والغيرة اللي عدهم على اهل المحله مفقوده بهل وكت .
فاتن --- لعد ليش مشوهين سمعتهم ؟
جلال --- ها , انت حقج , بس اكو نوعين من الشقاوه , اكو شقاوه مسلبجية وقطاع طرق ,واكو شقاوة اهل النخوه , فصاحبنا من شقاوة اهل النخوه .
فاتن --- اهل النخوه ؟
جلال --- واحدهم من ينطى جلمه ويلزم شواربه خلاص , كول وفعل .
فاتن --- الامور اختلفت وتطورت جلال , وزادت صعوبة الحياة وقساوتها , بس نرجع ونكول اكو الله . جلال --- احنا هم كايلين اكو الله , بس قساوة الحياة هي من قساوة بعض الناس على اقرب المقربين الهم ,ماكو بعد لا امان ولا طيبه , واحدنا بس ايريد ينهش بلحم الاخر ,تعودنا علبوك والنهب والسلب , تعودنا عطمع , تركنا محبة الله وتمسكنا بالشرير , بالشيطان وافعاله , فشنو ذنب هل مساكين من الناس واللي رايدة تعيش على محبة الله وتعاليمه ؟
فاتن ---- يعني قصدك ؟
جلال --- قصدي الوكت مو خوش وكت , حرام الواحد ايخلف اطفال بين هل مجتمع .
فاتن --- يعني صار عندك شعور بالخوف والكابه مثل تلميذك عدنان .
جلال --- ( بعصبيه ) فاتن اني اختلف عن عدنان , عدنان جان شخص اناني ويبحث عن اشياء النفسه يتمناها بحياته , بس اني ابحث عن سعادة المجتمع وافراده .
فاتن --- و سعادتي لمن اخلف طفل !
جلال --- بس سعادتج راح تكون مبنيه على تعاسة مستقبل حياة انسان , بعملج هذا راح ترتكبين اثم وخطيه بنفس الوكت .
فاتن --- لا تحرمني من الامومه , هذا من حقي وحق كل امريه تحب ايكون الها اطفال , تربيهم وتكبرهم وتتباها بيهم , فارجوك ---( مقاطعا لها ) .
جلال --- لاتكملين , هاي هيه الانانية بحد ذاتها .
فاتن --- الانانية ان تفكر بروحك ومن دون متفكر بغيرك , ( موسيقى حزينه ) اني مارايده غير بس حقي المشروع , اريد اصير ام , ام ترضع طفلها وتنطيه من حنانها , اريد اسمع كلمة ماما من حلك ضناي , اريد اربيه , ولمن ايشب وبصير شاب , وافرح بتخرجه وبزواجه , ( تصرخ وبشده ) شنو فرقي عن باقي الامهات ؟
جلال --- ( بانكسار وتالم وهو محتظنا لها ) فاتن انت حقج واني اعترفلج بهذا الحق , بس اني هم عندي اسبابي .
فاتن ---- ( بعصبية ونفور ) اسبابك خياليه وما موجوده غير بس براسك , انت خايف من الفقر والبهدله والحرمان من السعاده , بس احب اكلك مو كل الامهات سوه , اني لو اعرف اموت من الجوع , اللكمه الطيبه تكون بحلك ابني وبحلكك قبل لا تكون بحلكي , افكر بسعادتك وبسعادة ابني قبل ماافكر بسعادتي , فلا تخاف من الحياة الصعبه , ماكو شي اسمه صعب اذا اتفقت الكلوب علمحبه والتعاون وتذليل كل الصعوبات , فراح تكون الحياة حلوة , وحلاتها من طيبة الناس اللي تفكر بالطيبه , فارجوك , حقق رغبتي واحلامي !!!
جلال --- ( بانكسار وتالم ) يعني هاي رغبتج ؟
فاتن ---- اتوسل بيك وابوس ايديك , خليني احقق حلمي وافرح بامومتي , طبعا هاي اذا جنت تحبني !
جلال --- فاتن , اني ----( قرع على الباب بقرعات غير اعتياديه , سريعه وقويه ) هذا صوت دك علباب , ياهو اليجينا ابمثل هيجي وكت ؟
فاتن --- خل افتح الباب .
جلال --- لا اوكفي , خليني اني افتح الباب ,( يتجه الى الباب ويتحرك بحركة بطيئة جدا سلومشن , ومومسيقى ملائمه للمشهد وهو يعود بنا الى تاريخ مابعد الالفين وتلاثه من هذا العصر يقترب من الباب وينظر من العين السحرية التي في الباب ) .
فاتن --- ( بترقب وتلهف ) ها , منو بالباب ؟
جلال --- هاي ام عادل , الله يستر من هليله , ( يفتح الباب ) .
ام عادل --- سامحني وليدي , اجيتكم بوكت متاخر .
جلال ---- صدك جذب !! انت تؤمرين ياي وكت اتدكين الباب , ينفتحلج , تفضلي ادخلي جوه .
ام عادل --- ( تدخل الى الداخل )
فاتن --- خير انشاء الله خاله ام عادل ؟
ام عادل ---- ( بقلق وخوف ) الحكولي , دخيل الله ودخيلكم ,عادل طلع من الصبح وليهسه مااجا للبيت .
جلال ---- ( مهدئا ) على كيفج وارتاحي شويه , اني اكول بلكت طلع ويا ربعه .
ام عادل --- ابني جلال , غايتك ؟ تريد اتطمني وتهدي بالي ! لو تضحك عليا ؟
جلال --- لا يمه العفو , بس يعني كلشي ايصير .
فاتن --- خاله هدئي اعصابج , يعني مثل مايكول جلال , بلكت طالع ويا اصدقائه ؟؟!!
ام عادل --- يعني هلكد الدنيا بامان ؟ مو الغربان مطشره بدروبنا وبشوارعنا وتريد تنهش من لحم اجسادنه , الناس خاتله ببيوتهه يابنتي وميته خوف من هل غربان واللي جتي من دوماداير هل بلد , ودكلولي عادل طالع ويااصدقائه ؟
جلال ---- فاتن جيبيلها شوية عصير برتقال ايريح اعصابها ,
ام عادل ---- اعصابي ماترتاح اذا مااشوف عادل بعيوني جاي للبيت .
فاتن --- ميخالف خاله , خليني اجيبلج العصير .
ام عادل --- لا تعبين روحج ابنيتي .
فاتن --- خاله , تعبج راحه .
ام عادل --- شكرا ابنيتي فاتن .
جلال --- دكولين من الصبح طالع للشغل ؟
ام عادل ---- اي وليدي , وليهسه ماراجع , وتعرف وليدي , بهل وكت اللي يطلع من بيته يقرا سورة الفاتحه على روحه ويلله يطلع .
جلال --- دسمي باسم الله ياخاله , انشاء الله نسمع عنه خبر حلو .
فاتن ---- ( تاتي وفي يدها كلاص عصير وتقدمه الى ام عادل ) تفضلي خاله , اشربي هذا العصير بلكت ايريح اعصابج !
ام عادل --- لا بنتي كتلج ماارتاح اذا مااشوفه العادل كدام عيوني , اخ ياوليدي جلال , لو احجيلك حلمي اللي شفته واني نايمه لكتلي حقج مرعوبه وخايفه .
فاتن --- انشاء الله ايكون حلم خير .
ام عادل --- لا بنتي لا , ( موسيقى حزينه ) شفت عادل , ربعه شايلينه على اجتافهم ويزفونه , وهو فرحان ولابس دشداشه بيضه , بيضه مثل الثلج , ويلوحلي بابيديه ويكلي يوم اني مارايح المكان بعيد , رايح اجيب عروستي واجي , وانت حضريلي الحنة وبصينيتها حامض حلو واغصان اليأس , اريدج تهلهليلي يوم وتزفيني احلى زفه , وهذا هو يومي , يوم عرسي , ( تبكي , موسيقى حزينه ) فزيت من الحلم واركضت مثل المجنونه على غرفة عادل اطمن عليه , وتفاجئت لمن ماشفته بسريره , طلعت مثل المخبله واصيح يمه عادل رد عليا وينك ؟ كلت ويا نفسي بلكت طاب للحمام لو للمطبخ , يمه عادل رد عليا ( تتصاعد الموسيقى ) .
جلال --- ( بمعانات والم ) ام عادل , دكملي شرب العصير وهسه اكوم اخابر الشركه مالته , بلكت هليوم خلوه خفر دفاع مدني , لو حب يشتغل ساعات اضافي , ومن هشكل مااجه!!!
ام عادل ---- اخ منك عادل , اخ منك عادل اشكد عنودي ومايسوي الا اللي براسه , داده كلش عنودي ومايسمع كلام .
جلال --- هسه قابل عادل زغير ؟ ماشاءالله عليه جبير ويفتهم .
ام عادل --- وليدي جلال , حتى الجبير المفروض يسمع كلام امه وابوه , غير من باب الحرص فاتن --- خاله هاي انت شدتحجين ؟ عادل ماشاءالله متكامل وصاحب حكمه وعقل مايحتاجله اي توجيه !
ام عادل --- بنتي هو مواستزغار لمن الواحد ينصح ولده , وخاصة كلب الام دليل .
جلال --- خاله انتوا العقل والحكمه , واحنه نتعلم منكم , وفضلكم علينا ماينسي , بس اني اشاكول , لو ترتاحين ولا اتعبين روحج !!
ام عادل ---- لا ابني لا ,اني خايفه على وليدي , الدنيا تغيرت ويا اهلها , جرب بالنهار تباوع عشمس وشوف لونها محمر مثل الدم , شوف الكمر شلون حزين ومتكئب وبليا ضوه , مايضوي , والنجوم , والنجوم وليدي جلال ,شوفها شلون متوشحه بلون السواد ومافرحانه مثل فرحة ايام زمان , وليدي كبل من جنا نباوع عسما , ويامحلاها , جنه انشوف الثريه , ونشوف قيس وليلى , والميزان , ونتسلى بيها , وشارعنا الجنه نتباها بيه , من الصبح جنت تسمع اغنية صباح الخير يالوله وصباح الخير يالوله ( تغنيها بصوت كسير فيه شيئا من الحسرة ) والمغايز المتروسه وبيها اشكال والوان تحير العقل , وجنه ملمومين وعلمحبه متصافين ومتعافين , ولمن جنا نطلع سفرات الجولة الله الخضره , ونتباهه بشوفة هل بساتين واثمارهه , , وعلى غفله يمه تغيرت الاحوال وتبدلت , وشارعنا صار تلة من زبالة هل غربه واللي شوهوا منظره , هل غربه ذوله جوينا ويبسوا كل اشجارنا , شوف النخل وقارن مابين نخل ايام زمان وهسه , بايام زمان جان النخل يزهي ويتمايل وفرحان بعناكيد التمر واشكاله , وهليوم وليدي جلال , نخلنه يبس وصار حطب وجفت اغصانه , مابقالها عروك بالكاع , جوي الغربه وقلعوها من الجذر , ومسحوا هوية هاي الكاع ورمزها , وشتتوا ولدها وطشروهم ببلاد بعيدة , , وزرعاتنه من قهرها يبست وجفت وابمكان الثمر كامت تنتج عاكول وشوك , وسمانا ياوليدي كامت تحوم بيها الغربان وشردت كل حمامات السلام , تدري وليدي جلال صرت اشتاق اسمع صوت هديل الحمام وهي تهدل ابمصباحية كل يوم , واني مسترخايه على جربايتي ومتونسه ويا ذاك الهديل !!!
جلال ---- يمه ام عادل , لا تخافين , بعده الخير موجود .
ام عادل --- ( بقوة واصرار ) لا يمه لا , الخير راح , راح ويا اهله , ومابقى منه شي غير بس السوالف الحلوه , اللي صرنا نحجيها الكم , عن طيبة اهلنا , وعن زمان الخير اللي عشنا بيه .
فاتن – مثل مدكولين , حجايتج صحيحه , بس الحمدالله والشكر , مستورين والستر من رب العالمين .
ام عادل --- بس ربنا نطانا عقل وخلانا نفكر وبكيفنا نختار , والهسبب لازم نكون على حذر من غدر هل زمان .
فاتن --- ليش خاله ؟ اثاريج مثل جلال , تتشائمين من هزمان .
ام عادل --- بنيتي حقه جلال لو يتشائم ويخاف من هل زمان , هل زمان صاير الانسان ايخاف على روحه , لا بقى جار ولا صديق , وذاك من ذاك تلكين عنده نخوه وشهامه , الطيبه راحت ويا اهلها , ومابقى غير بس الخراب والدمار بهل دنيا , تشوفين الناس من خوفها مغمضه عيونها وساده حلوكها واذانها , ماتريد تشوف ولا تحجي ولا تسمع , والهسبب مرات اطك واصيح وعيط يكل صوتي , ياناس ياعالم شبيكم واشبيها الدنيا وياكم ؟ ويصيبني القهر والضيم لمن اشوف حالي اني اللي اسال , وماالكالي جواب , غير بس الصدى يرجعلي , واني اسمعه , كل هذا الضيم اللي حابسته بصدري , ودكلولي ليش خايفه على عادل !!! يمه جلال , خوفي على عادل لصاير بيه شي !؟؟
جلال --- لا يمه لا , استهدي بالرحمن , وهسه انشاء الله من تروحين للبيت راح تلكيه العادل .
( يرن جرس الهاتف النقال ).
فاتن --- جلال تلفونك ايرن !
ام عادل --- ( مع نفسها ) اللهم اجعله خير ياالله .
فاتن --- امين يارب .
جلال --- ( يرد على المكالمه , هنا يستطيع المخرج ان يعمل اظلام على فاتن وعلى ام عادل , ويحصر بحزمة ضوئية على سالم والذي يظهر في اسفل يسار المسرح , وكذالك حزمة ضوئية على جلال والواقف على يمين المسرح , وكل منهما يتكلمان بواسطة الهاتف المحمول ) نعم ,اهلا سالم خير ؟
سالم --- جلال , ام عادل يمكم مو ؟
جلال --- بلي يمنا , خير !
سالم --- رحتلهم للبيت , وبتها كلتلي هي يمكم .
جلال --- ( بهمس خوفا من ان تسمعه ام عادل ) اي جايه تسال على ابنها عادل .
سالم --- جلال اسمع اكلك , اوكف بعيد عن ام عادل , لانه الخبر اللي راح اكلك بيه موزين .
جلال --- ( بهمس ) دحجي شكو , صاير شي العادل ؟
سالم --- اي , من الصبح جنا مداومين بالشركه , وسقطت علينا قذايف طايشه , جتيلنا من مكان مجهول , وعندك الحساب .
جلال --- يعني عادل ---
سالم --- ( مقاطعا له ) عادل البقيه بحياتك , ( ضربه موسيقيه ) .
جلال --- ( مع نفسه ) لالالا هذا موخوش خبر , زين وهسه وينه ؟
سالم --- جتي الاسعاف ونقلت الجرحى والشهداء للطوارىء , فلمن سوينا احصائيه عن الشهداء والجرحى لكينا عادل ويه الشهداء , بس دير بالك تسمع امه , خليها تنام وباجر الصباح رباح .
جلال --- انا لله وانا اليه راجعون , زين وهسه شتريدني اسوي ؟
سالم --- اتجيبلي شهادة الجنسية وهوية الاحوال المدنية مالته وتجيني الشعبة الطوارىء اللي باليرموك .
جلال ---- زين واخته عرفت بالموضوع ؟
سالم --- خفت اكللها , لتسويلنا جنجرس وتخبص الدنيا , فشلون راح اتدبرها وياهم ماادري .
جلال --- زين يابا زين , مع السلامه ( يختفي سالم بعد اظلام مشهده , واعادة الاضاءة على ماكانت في المشهد السابق مابينه وبين زوجته وام عادل , يقفل الهاتف النقال , ومع نفسه ) انا لله وانا اليه راجعون .
فاتن --- ( تتقدم منه , وبهمس ) ها جلال , خير ؟ شكو ؟
سالم --- على كيفج لا تروح تسمع ام عادل , الله يرحمه ويحسن اليه !
فاتن ---- شنو؟
ام عادل --- ها ابني شكو , احجيلي شكو اشصار ؟
جلال --- ها , لا ماكوشي !
ام عادل ---- ( ببكاء ونحيب ) ابني , كلبي دليلي , احجيلي شكو ؟
جلال ---( بالم ومعانات ) كتلج خاله ماكو شي , ماكو شي ,( وهو يصرخ باعلى صوته اظلام على المسرح مع موسيقى حزينه وقوية ايضا ويتغير المشهد باختفاء ام عادل والعودة الى المشهد السابق مابين جلال وزوجته فاتن , وجلال مازال يصرخ باعلى صوته ) ماكو شي , ماكو شي , ماكو شي ,
فاتن --- ( تصرخ وتنادي على جلال ) جلال اشبيك ؟ اشبيك تصيح وتصرخ ماكو شي , ماكو شي , مدتسمع دكة الباب ؟
جلال --- ( وكانه يستفيق من حلم , وبشكل مهووس ) ها , بلي داسمعه , بس ماكو شي , ماكو شي لا تخافين .
فاتن --- اكعد وارتاح , وخليني اني افتح الباب .
جلال --- لالا اكعدي انت واني افتح الباب , ( يسير بخطى متثاقله باتجاه الباب ليفتحه ويتفاجأ )
الصوت ---( من الخارج ) الله ايساعدك رفيق جلال .
جلال --- ( وبشكل مبهوت ) هلا , هلا ومرحبا .
الصوت ---- اذا ماكو زحمه توقعلنا هنا , ورايديك تجينا باجر للمدرسة اللي بظهركم حتى تستلم اليطغ مالتك .
جلال --- يطغ ايش ؟
الصوت --- الملابس الخاكيه وبطانيتين .
جلال --- وهاي شسوي بيهن ؟
الصوت ---- رفيقي , الجبهة عالكه وانت نايم وماداري بروحك .
جلال ---- والمريود مني ؟
الصوت ---- باجر عدنه قاطع للجبهة ورايدين مشاركتك وياهم حتى يكمل العدد , متريد اتدافع عن الوطن , عن حدودك , عن تراب ارضك ؟
جلال --- ( مع نفسه ) هو اني ليش ادري شلون بدت الحرب و منوسببها وشلون صارت ؟
الصوت --- ها شكلت ؟
جلال --- ( باستدراك ) ها , صار عيني صار , ( مع نفسه ) اذا الدفاع عن الوطن وتحريره من هذا اللي ماعرفه ولا اعرف شي عنه , متوقف عليا , ميخالف اروح اشارك , بس سؤال واحد , وانتو اللي شايلين رشاشاتكم وبنادقكم على جتافكم , خاتلين ببيوتكم , وتحصدون براس هل مساكين , ليش متشاركون بهذا القاطع وتستعدون بالدفاع عن وطنكم ,اذا انتوا هلكد حريصين وتحبون الوطن , قابل الوطن مكتوب بس باسمي ؟
الصوت --- بس اللي نرجوه منك لا تعذبنا بالروحات والجيات , ترى هاي للمره الثالثه نجيك , والاخيره , وبعدها عدنه حساب وياك .
جلال --- صار عيني صار , باجر من الصبح اني يمكم .
الصوت --- زين رفيقي , بس رجاء لا تنسى .
جلال --- صدك جذب , معقوله اني انسى !! من عينات باجر الصبح اني يمكم .
الصوت --- زين رفيقي , احنا رايحين , في امان الله .
جلال --- الله ومحمد وعلي وياكم , اكلكم , وعيسى بن مريم , هم وياكم ( يقفل الباب , ويعود الى الداخل مستدرجا خطاه ببطىء , وهو في حالة شرود ذهني , يتكلم مع نفسه ) هذا شلون حجي؟ , شلون انسى ؟ لالا ماراح انسى , راح اجيلكم للمدرسه واني الممنون , طبعا رح تاخذوني للجبهه , راح اشوف بيها حدايق ا مزروعه بجثث شهدائنا والمطروحين منا ومنا , وبمكان مي النبع دم يسكي تراب هل وطن , بس المشكله , شلون راح اكدر الزم نفسي واضبط اعصابي ؟ حتى الكافر مايكدر يلزم اعصابه كدام هيجي منظر ماساوي , ايقزز البدن ويرهب الانسان , بس مع هذا بسيطه , ماراح انسى , راح اجي للمدرسه واستلم اليطغ مالتي واتوجه للجبهه , شلون لعد , اذا اني والاخر ميروح ويدافع عن الوطن , يجي الغريب ويدافع عنه , معقوله ؟ راح اجيلكم للمدرسه واني الممنون , راح اجيلكم للمدرسه واني الممنون , راح اجيلكم للمدرسه واني الممنون ( وهو في قمة الصراخ )----
فاتن ---- ( تصرخ بوجه جلال ) جلال , الخاطر الله الزم روحك وارجع الوعيك , وكلي شبيك ؟
جلال --- ( بهلوسه ) ميخالف , ولد الاكابريه خاتلين ببيوتهم , واحنا ولد الخايبه صرنا مواطنين من الدرجه الاولى , والمفروض بينا اندافع عن الوطن .
فاتن --- ( بخوف ) جلال هاي شبيك ؟ خل اروح اجيبلك كلاص مي بلكت ايريحك .
جلال ---- اخ يافتونتي الورده , حبيبتي , ليش اني شاكيلج عن عطشي ؟ الكاع , الكاع هي العطشانه , عطشانه الدم هل مساكين وتريد ترتوي من دمهم , اخ يافتونتي , تعرفين منو راح يدفع الثمن ؟ النسوان من تترمل , والاطفال من يتيتمون , ويتشردون بشوارع المدينه ايدورولهم على لكمة الخبز ومايلكون , فينجبرون لو ايبوكون لو يندفعون للجريمة , وبهشكل ينتشر فساد اجتماعي , جوع وقحط وامراض فتاكه تفلش البنيه التحتية , وتمزق الوحدة الاسرويه( يصرخ )
وين عدالتج ياسماء , اكلبيها على كل ظالم ومتجبر , وحركيهم وسوي من اجسادهم رماد , وطشريها بالعالم , ولايبقى الهم اي اثر , حتى تتنظف هل كاع , كاع الله , تتنظف من ظلمهم وقساة كلوبهم .
فاتن ---( تعود وفي يدها كلاص مي ) هاك اشرب شوية مي بلكت ترتاح .
جلال ---- ( ينظر اليها ويبتسم ) ارتاح ؟؟!! ارتاح شوكت مااشوف شعبي سعيد وعايش بخير وسلامه وامن واستقرار اسروي , ارتاح شوكت مااشوف البسمه مرسومه على وجوه الاطفال , وهمه شبعانين , ارتاح شوكت مااشوف الشمس بلون الذهب , وانسام بغداد تهب وتبرد كلوب المتشردين وتداوي جروح هناس , اريد ارجع الذاك الزمان , واسمع الكبانجي لو الناظم الغزالي , لو الاحمد الخليل ورضى على , لو الوحيده خليل وهي تغني و ياارضنا ياارضنا , هي لنا واحنه لها , ياارضنا ياارضنا ياارضنا ( هذا المقطع يغنيه بصوته وبنفس اللحن ) ذاك الوكت اني ارتاح , مستعد اقابله للموت واكله اخذ امانتك واني مرتاح ومطمئن على هناس الرايده تعيش بسلام بامان تحت سلام يشمل المعموره , واشوف الحمامات وبمنكارها اغصان الزيتون , وتهل بهديلها وتغني , رف ياحمام ياحمام ياحمام , وبلغ نشيد السلام السلام , رف ياحمام علينه علينه ,
( يبقى يردد هذا النشيد والموسيقى باك راوند , وهو يغني اغنية كاظم الساهر ) اطفال بغداد الحزينه يسالون ----عن اي ذنب يقتلون ----يترنحون على شظايا الجوع ---- يقتسمون خبز الموت ثم يودعون ---- بغداد لا لا تتالمي ,( ويبقى يردد) بغداد لا تتالمي( والى نهاية المسرحية يتعالى صوته) بغداد لا تتالمي ( هنا تعرض اسلايدات عن الانفجارات والقصف الصاروخي وتساقط الاجساد وعرض جنائز ومواكب الشهداء ونساء يبكون واطفال مشردون وطائرات تقصف , والعمارات والبيوت تتساققط نتيجة هذا الدمار , واغنية كاظم الساهر تعلو وتعلو حتى النهايه .
( ستار )
ليست هناك تعليقات:
إرسال تعليق