مسرحية " وقوف .. قف " تأليف مجد يونس احمد

مجلة الفنون المسرحية

الكاتب مجد يونس احمد  

مسرحية " وقوف .. قف  " تأليف مجد يونس احمد

	( كومة من الجرائد تتوسط خشبة المسرح .. الكثير من مخلفات المشروبات الغازية ,اطارات سيارات ,أحذية قديمة .. المكان يوحي بالوحشة )  ( يدخل ممثل مسرعا وكأنه يهرب من شيء ما .. أصوات إطلاق رصاص كثيف وبعض اصوات الانفجارات )  ( الممثل يحمل بيده بندقية من الورق المقوى , يصل وقد بدا منهكاً , يتوقف وينظر حوله , يستطلع المكان بحذر شديد )  ( أصوات الرصاص والعويل والانفجارات تنخفض شيئا فشيئا .. صمت قصير ..)  ( الممثل يلتقط أنفاسه , ومن ثم يستدير بهدوء وحذر شديدين يتوقف في منتصف الخشبة .. )  ( يخرج ممثل 2 من عمق الخشبة وهو يقوم بتسوية بنطاله , وقد كان يقوم بقضاء حاجة , يشاهد ممثل 1 , يتجمد في مكانه بحذر ومن ثم يمسك بندقية ورقية بالقرب منه , يضع خوذة ورقية ومن ثم يتخذ وضعية قتالية مبالغ فيها بعض الشيء ومن ثم يصرخ )
الممثل 2	قيييييييييييييييييف .." يصرخ ".( الممثل 1 يتجمد في مكانه,يستطلع مصدر الصوت,فيعود الممثل 2 للصراخ من جديد وبقوة أكبر ) ولك قيييييييييف , لا تتحرك ولا حركة وإلا قوصتك براسك هاه..
الممثل 1	ولك واقف واقف , " وهو يمد ذراعيه الى جانبي جسده )
الممثل 2	ولك لا تتحرك , ولا حركة نزل ايديك فورا .. ( الممثل 1 ينفذ ) زت البارودة من ايديك .. ( يترك البارودة لتسقط على الأرض ) ايديك ورا راسك ..
الممثل 1	بس ..
الممثل 2	ايديك ورا راسك ولاه ..( الممثل 1 ينفذ ) .. مين انت ولاه ؟
الممثل 1	أنا ؟!؟
الممثل 2	( بتصاعد ) شو عم تعمل هون ؟
الممثل 1	هون ؟
الممثل 2	ولك حاجة تكرر الحكي متل الببغاء .. مين انت ؟
الممثل 1	أنا .. أنا ..
الممثل 2	رح عد للتلاتة , اذا ما بتعرف على حالك , رح اعمل شي منافي للحشمة ..
الممثل 1	خلص , خلص روق , حاج تعيط !
الممثل 2	" يصرخ " ما عم عيط ..
الممثل 1	طيب , طيب , " يقترب الممثل 2 منه , ويدور حوله وهو مازال متحفزا , الممثل 1 مايزال يضع يديه وراء رأسه )
الممثل 2	أنا وين شايفك ؟
الممثل 1	" يحدق فيه " انا بعرف منيح ..
الممثل 2	" بزهو " أنت كتير طبيعي انك تعرفني , بس أنا وين شايفك ؟
الممثل 1	عنجد ماعم امزح , أنا بعرفك منيح ..
الممثل 2	لوين رايح وكيف اجيت لهون ؟
الممثل 1	بالصدفة, كنت هربان (  يتوقف فجاة وقد احس بأنه قد تورط بالكلمة  )
الممثل 2	هربااااان .. ايوااااه !! من شو هربااااان ؟ من مين ؟ ولوين هربان ؟!
الممثل 1	على مهلك,على مهلك( نسمع صمت اطلاق رصاص كثيف وانفجارات , يتحفزان بنفس الوقت , يحدث انفجار ضخم فيعم الدخان في المكان )( صمت قصير, يزول الدخان , ينظران بعضهما لبعض )..عرفت هلق من شو هربان ؟
الممثل 2	أيوااااا .. انت من وين ؟
الممثل 1	أنا من وين ؟
الممثل 2	انت غريب عن هون ؟!؟
الممثل 1	انا غريب ؟! لا هي بدي تسمحلي فيها .( وهو ينظر حوله ) كل شي هون جزء مني .. كل شارع كل حارة كل دخلة إلي فيها ذكرى كتير حلوة ..بتذكر لما كنت ( يحاول ان يتحرر  ,فيتحرك فيصرخ الممثل 2 بوجهه )
الممثل 2	هوب هوب .. لا تتحرك من محلك ..
الممثل 1	طيب , طيب , بس لا تعيط , هلق بيسمعونا ..
الممثل 2	( باستغراب ) بيسمعونا ؟!  مين ؟
الممثل 1	هدوك الأعداء ..
الممثل 2	الأعداء ؟
الممثل 1	طبعا , الحرب .. الحرب ( يرخي يديه )
الممثل 2	ايديك ورا راسك ..( ازيز رصاصة في المكان .. ينبطحان )
الممثل 1	قلتلك لا تعيط , ما بترد ..شفت ..هي كنّا رحنا ..
الممثل 2	العمى .. من وين اجت هالطلقة , يلي بعرفو أنو هالمنطقة مهجورة وما فيها غير الأشباح
الممثل 1	( ممازحا ) يعني انت شبح ؟
الممثل 2	كول خرا  ( يسمع صوت جلبة وضجة ووقع اقدام , ينظران بعضهما الى بعض)
الممثل 1	( يهمس ) سامع ؟
الممثل 2	نحنا مولحالنا هون ؟! ..
الممثل 1	هسّ .( يقترب صوت الضجة منهما,أصوات وكلام غير مفهوم,الأول يلتصق بالثاني الذي يصوب البندقية باتجاه الصوت ويكون متحفزا .. تبتعد الأصوات شيئا فشيئا .. صمت قصير ,ينظر الممثل 2 الى الممثل 1 فيجده تحت رجله وقد امسكها وكأنه يحتمي بها , يشير له .. يقف .. )
الممثل 2	( يهمس ) قوم قوم يا جبان .. يمكن راحو ..( الممثل 1 ينظر في عينيه )
الممثل 1	جبان؟! أصلا انت ما بتعرفون,ولو انك بتعرفون عن جد ما كنت قلت عني جبان..أنا بعرفون منيح ..
الممثل 2	قوم , بعدّ عني , ودير بالك تقّرب مني مرة تانية .. ( يتركه ويبتعد عنه , وينفض الغبار عن ثيابه, ويحدق في المكان وكأنه يبحث عن شيء ما ) على شو عم تتطلع ولاه ؟
الممثل 1	ماقلتلي قديش صرلك هون ؟
الممثل 2	صرلي زمان ..
الممثل 1	وليش لحالك هون ؟
الممثل 2	( بحذر واضح ) ومين قلك اني لحالي , انا مو لحالي ..
الممثل 1	بس ماني شايف حدا غيرك هون ..
الممثل 2	هاد مو شغلك ..
الممثل 1	طيب كيف عم تنام هون بين كل هالزبالة هي .. ما بتخاف ؟
الممثل 2	ليش مين عم ينام ؟ مين عم يحس أنو جاييه نوم ؟ ويلي عم ينام , مفكر حالو عم ينام , ليش النوم بس الواحد يغمض عينو ؟
الممثل 1	أنا وين بدي نام ؟
الممثل 2	( ساخرا ) وين بدك تنام , عندك كتير محلات تنام فيها , هي الصالون , وهي غرفة للضيوف وهي غرفة نوم مريحة وفيها تخوت مريحة وفيها مكيف كمان .
الممثل 1	مافي برغش هون ؟
الممثل 2	( ساخرا من جديد ) ولا يهمك , بحطلك الناموسية ما بعيضك البرغش ..
الممثل 1	( ينظر حوله ) طيب مين عم ينام هون ؟
الممثل 2	أكيد ما يخطرلك انك تنام معي بنفس المحل؟ صح ؟
الممثل 1	آه , لا .. بس مستغرب كيف فيك عم تنام وهالريحة القاتلة , مانك حاسس فيها ؟
الممثل 2	( يسخر منه بطريقة لاذعة ) لا تهكل هم هلق بعطرلك الجو , معي معطر جو , لا تآخذني المي مقطوعة والكهربا ما عم تجي ابدا مافيني شغل الدينمو مشان المي .. بعدين هلق ببعت ورا الشغالة بتجي وبتنضفلك المحل منيح , المهم تكون رضيان ..
الممثل 1	عم تتمسخر ؟
الممثل 2	لا أبدا ..
الممثل 1	لأ عم تتمسخر , وعم تحكي معي بطريقة فيها اهانة , شو شايفني يعني ؟
الممثل 2	والله شايفك واحد نقاق وجبان وكتيّر غلبة
الممثل 1	الله يسامحك .. ان بعض الظن إثم ..
الممثل 2	إثم الله عليك ما أذكاك ..
الممثل 1	استغفر الله , اللهم لا تؤاخذنا بما فعل السفهاء مِنّا ..
الممثل 2	( يقف فجأة متحفزا ,وقد استبد به الغضب , يصوب البندقية نحوه ويصرخ ) قوم ولاه , ( الممثل 1 ينظر إليه باستغراب , الممثل 2 يصرخ من جديد ) ولك قوم ولاه , قوم وقف ..( الممثل 1 ينفذ ) أنا من الأول ماني مرتحلك , وقف ولاه وقف ..
الممثل 1	طول بالك يا زلمة ..ماقصدت شي ..
الممثل 2	ماقصدت ؟ عم تحكي بلغة غريبة وبتشبهون , انت متلون
الممثل 1	متل مين ؟ والله رح تجنني ..
الممثل 2	متل مين ؟ عم تتذاكى عليي ( الممثل 2 يأخذ دور المحقق بعد أن يقيد الممثل 1 ويضعه في منتصف الخشبة ) وهلق .. بدك تعترفلي أنت مع أي جماعة , مع مين انت ؟
الممثل 1	جماعة شو ؟
الممثل 2	معك حق .. أصلا أنتو متل الجراد , حقك ماتعرف أي جماعة ؟ ( يغير من لهجته ) طيب , احكيلي لشوف شو العمليات يلي تكلفت فيها , أو شو بتعرف ؟
الممثل 1	عمليات شو ؟
الممثل 2	عمليات التخريب الممنهج يلي عم تعملوه ..
الممثل 1	وين ؟
الممثل 2	( يحاول أن يتماسك .. ساخرا ) بالصومال ؟ وين يعني ؟
الممثل 1	آه فهمت فهمت ..
الممثل 2	برافو . هات لنشوف من الأول ..
الممثل 1	مافهمت ؟( الممثل 2 يقترب منه ومن ثم يضربه بمؤخرة البندقية على رأسه , فيتألم الممثل 1 ) يا أخي والله ما إلي علاقة بشي , وحياة الله أنت غلطان .. أنا ما دلخني ولا خرجني .. ( الممثل 2 يلكزه من جديد ) وحياة الله , لا قتلت ولا فجرت ولا دبحت ولا أي شي من هالشغلات الاجرامية ..
الممثل 2	ابدا ابدا ؟!؟
الممثل 1	وحياتك ما إلي علاقة بهالشغلات أبدا ..
الممثل 2	لا تحلف بحياتي ولاه .. يعني انت مانك منون؟
الممثل 1	ولك مين هني , بس فهمني ؟
الممثل 2	مابتعرف مين هني , جماعتك , جماعة القتل والدبح وقطع الروس والتفجيرات والنهب والسلب , هدون يلي عم يغتصبوا البلد , بلدنا .
الممثل 1	وانا ما دخلني بهيك ناس مجرمين ..
الممثل 2	مجرمين ؟ هدون المجرمين عم يحلموا يصيروا  أصحاب السلطة .. هني نفسون يلي عم يدمروا البيوت والمستشفيات والمدراس والجوامع ويهجروا البشر بدون يصيروا حكام ..
الممثل 1	أي مارح يقدروا ..
الممثل 2	لا بيقدروا في حال كان في خونة متلك ..
الممثل 1	خونة .. متلي .. انا خاين .. هاد الحكي ظلم .. انت مصر انك تشوفني متل ما بدك .. يا أخي أنا ما ألي علاقة بشي .. وما دخلني فيون , أصلا أنا مابسمح لحالي انتمي ألون ..
الممثل 2	كذاب ..
المثل 1	ولك والله العظيم ما إلي علاقة فيون , ولا عملت شي , اقسم بالله العظيم , ماطلعت طلقة وحدة من بارودتي , ولا برضى ابدا يصير هالشي ..
الممثل 2	يعني مانك منون ؟
الممثل 1	لو أني كنت منون , ليش لأهرب منون ؟
الممثل 2	وشو بيعرفني انك هربان , ليش ما يكون خدعة , وناطر اللحظة المناسبة لتغدر فيني ؟!؟
الممثل 1	ولك وحياة يلي جمعنا سوا بالصدفة وحياة الأخوة وحياة هالتراب يلي واقفين عليه انا ما دخلني بكل هالشغلات يلي عم تحكي عنها . هي قلتلك كل شي , اذا ما مصدقني , اقتلني .. هي انا قدامك ..
الممثل 2	لا بالعكس , اذا كنت منون , لازم تتعذب كتير قبل ما تموت ..
الممثل 1	وليش أنت ما تكون منون , وعامل حالك مانك منون ..
الممثل 2	( يقترب منه ويصفعه ) انا,أنا مستعد انتحر ولا كون منون..بعد كل هالشي بتوجهلي هيك اتهام, انت واحد جاهل..وما بيبين فيك شي..لوبدي كون منون يا حمار,كنت هلق عم ألعب براسك كرة قدم .
	( نسمع أصوات انفجارات تهز المكان , واطلاق صاص كثيف ,من ثم نسمع أصوات مختلطة وعواء .. دخان في المكان .. صمت قصير .. صوت ريح .. )
الممثل 1	قديش صرلك هون ؟
الممثل 2	زمان ..
الممثل 1	طيب ليش لحالك هون ؟
الممثل 2	بتعرف انك واحد كتّير غلبة ولسانك طويل ومعلاقك كبير ؟
الممثل 1	ليش ؟
الممثل 2	من أول ما شفتك , وانت مافي ع لسانك غير ليش وكيف ومين ولمين ..
الممثل 1	وانت كمان هلكتني بالأسئلة ..
الممثل 2	أنا كتير طبيعي اسألك ..
الممثل 1	ليش ؟
الممثل 2	بيجوز تضل عندي فترة زمنية كبيرة , يعني بدي عيش أنا وياك ,وبيجوز يصير بيناتنا خبز وملح , فلازم أعرف عنك كل شي ..
الممثل 1	بس انا في بيني وبينك خبز وملح ..( الممثل 2 يحدق بنظرة غريبة .. صمت قصير ) عندك أكل؟
الممثل 2	لأ ..
الممثل 1	وكيف عايش ؟
الممثل 2	الله كبير ..
الممثل 1	قديش صرلك هون ؟!
الممثل 2	زمااان ..
الممثل 1	وليش لحالك هون ؟!
الممثل 2	ممكن تبطل تسأل أسئلة ما دخلك فيها..(فجأة ينتفض ويتحفز,وهو يصيخ السمع في المكان) سمعت؟
الممثل 1	لأ ما سامع شي ؟
الممثل 2	هس .. ( صمت قصير ) أول مرة بتصير هالحركة هون .. ( ينظر إليه ) والله ما عم اقدر اتطمنلك , يعني حاسس انك سبب كل شي هون .. وجيتك لهون مانها صدفة .. وجودك هون ألو سبب .. أنت أكيد بدك تغدر فيني .. هيك طبعك أنت وجماعتك .. انتو يلي خربتو الدنيا ..
الممثل 1	لاه يا طيب .. شو ماعاد في ثقة .. شوبدك اعملك لحتى توثق انو ما إلي علاقة بأي اتهام عم توجهلي ياه ..
الممثل 2	ثقة ؟! ( يضحك ساخرا ) عنجد انت واحد أجدب..أنا وياك بهيك محل والدنيا قايمة وما قاعدة, الواحد ماعاد يوثق بخيالو,بدك ياني أوثق فيك بهالبساطة ؟ نحنا بحرب غريبة , مافيها شي غير الأشباح .
الممثل 1	هي السياسة يا صاحبي ..
الممثل 2	شو , شو قلت ..
الممثل 1	السياسة ..؟!
الممثل 2	السياسة ..برافو .. شو قصدك ؟
الممثل 1	آه .. والله ما قصدي شي غير انو السياسة هيك ؟
الممثل 2	يعني انت بتتعاطى ؟
الممثل 1	أعوذ بالله , انا اتعاطى ؟
الممثل 2	لا تجدبها ولاه , قصدي بتتعاطى سياسة ..
الممثل 1	كمان الله يبعدني عنها .. ما دخلني لا بالسياسة ولا شي .. بعدين حاجة تعاملني بهالطريقة ..
الممثل 2	أي طريقة ؟
الممثل 1	شو أي طريقة , يا زلمة ما شايف حالك قديش متوتر , الواحد مابيقدر يحكي قدامك ولا ملاحظة , انا ألي رأي خاص فيني , ما بيحقلك تصادرلي ياه ..
الممثل 2	وقلتلي ما بتتعاطى سياسة .. ( يحدق فيه ) قوم ولاه .. قوم .. وقف .. ( يعود فيقيده من جديد ) ايديك وراض هرك .. لا تتحرك هاه.. أنا متأكد هلق أنك واحد منون , أنا الحق عليي , كان لازم من أول ما شفتك إني أخلص منك وزتك للكلاب ..
الممثل 1	ليش ؟ بس فهمني شو عملتلك ؟
الممثل 2	ليش قدرت تعمل شي وما عملتو ؟ أنا واثق انك ناطر اللحظة المناسبة لتغدر فيني , انا بعرفك .. جيتك لهون مو لـ ألله .. انت هلق اسير عندي .. مسجون .. ( الممثل 1 لا يجيب .. صمت قصير ) وهلق منبلش من جديد .. احكيلي .. من الاول ..مين انت , وليش اجيت لهون ؟
الممثل 1	وليش عم تسأل , وشو نفع هالأسئلة , أنا عملت شي لحد هلق ؟
الممثل 2	ولك .. ولك .. شوف ولاه .. أنا مارح استناك لحتى تعمل أي شي .. الله وقعك بين ايديي .. وحميد ربك أنك بعدك عايش ..
الممثل 1	معك حق ..
الممثل 2	هس هس .. سماع .. سماع .. ( صمت قصير ) سامع ؟
الممثل 1	شو ؟
الممثل 2	ما عم تسمع ؟
الممثل 1	لأ ..ما عم اسمع .. شو سامع انت ؟
الممثل 2	سامع أصوات جماعتك , جماعتك عم يعوو .. متل الكلاب ..
الممثل 1	ما عم يعوو .. هادا تكبير ..
الممثل 2	يعني سامع ؟ قلتلي تكبير .. شفت انك واحد داهية .. المهم عم يكبرو .. ؟
الممثل 1	أي وين المشكلة ؟
الممثل 2	مابتعرف وين المشكلة ؟ المشكلة انو هالتكبير ماعاد ألو المعنى يلي منعرفو .. هالتكبير صار علامة على الخراب والدمار , صار علامة ع القتل .. استغفر الله العظيم , يا حرام شو عم يصير فينا ؟
الممثل 1	الله يلعن أبو السياسة وساعتها ..( يسود الهدوء في المكان .. الممثل 2 يبتعد بعض الشيء عن الممثل 1 , ومن ثم يبحث في جيوبه , فلا يجد شيئا , نراه وهو يقوم بالبحث في المكان , الممثل 1 يراقب دون أن يتحدث .. فجأة يلتقط الممثل 2 عقب سيجارة ويضعه بين شفتيه , ومن ثم يشعله بطريقة بدائية عن طريق احداث شرارة بين حجرين .. يسود صمت قصير )
الممثل 2	احكيلي لشوف , ليش هربان ؟ ومن مين ؟
الممثل 1	آه , هربان ؟! ( يفكر ومن ثم يقول ) هربان منون .. ( ممثل 2 ينظر إليه باستغراب ) لا تستغرب .
الممثل 2	وليش ؟!
الممثل 1	قصة طويلة
الممثل 2	ماورانا شي .. احكي ..
الممثل 1	ياسيدي ضربت العكيد ..
الممثل 2	عكيد ؟ هههه ..
الممثل 1	معك حق تتمسخر .. ( وكانه يتذكر ) كنت واقف عم احرس الغرفة تبعو ..( يقاطعه )
الممثل 2	الغرفة تبعو ؟ .. أي لأنو لأبوه هي الغرفة , هي الغرفة أكيد صحابها مهجرين منها ..
الممثل 1	أنا ما دخلني , المهم كان عم يحكي مع واحد وكان عم يقلو ..( يتوقف )
الممثل 2	شبك ؟
الممثل 1	بصراحة , وقف شعر راسي .. ماكنت متخيل اسمع هيك حكي .. المهم , قام العكيد انتبه اني سمعت الحديث كلو ..قام أخدني على جنب وقلي : شو ؟ وقلتلو : شو ؟
الممثل 2	مارح اسألك شو الحديث .. بس حابب أعرف شورأيك باللي سمعتو ؟
الممثل 1	رأيي ؟!؟ ياسيدي هجمت عليه فجأة وبلشت ضرب فيه .. بصراحة مابعرف من وين اجتني هالقوة والجرأة
الممثل 2	قتلتلو ؟!
الممثل 1	لأ ..
الممثل 2	( وكأنه غير مصدق ) إي وبعدين ؟!
الممثل 1	بعدين هربت !!
الممثل 2	هربت ؟!بهالبساطة ؟ ولك شو مفكرني أجدب لحتى صدقك ؟ هيك بهالبساطة قدرت تنفد منون ؟! بهالبساطة ؟!
الممثل 1	ومين قال بهالبساطة ؟ ( الممثل 2 يدخن ومن ثم يرمي بعقب السيجارة , يسود صمت قصير ) أنت ليش لحالك هون ؟!
الممثل 2	( بحذر ) قلتلك ماني لحالي , بعدين اهتم بحالك ولا تتدّخل بشي ما بيعنيك .. ودير بالك هاه , هون غير هونيك .. هون الغلطة بكفرة .
الممثل 1	ليك .. بدي فوت عالحمام !!
الممثل 2	عالحمام ؟! ولك تلحس .. بس وينك مافي محارم هاه ؟!
الممثل 1	مو مشكلة , المهم يا الله ..
الممثل 2	شو يا الله ولاه , ليكون بدك ياني آخدك واقضيلك حاجتك مثلا ؟!
الممثل 1	ولك يا أخي مو هيك .. بس فكني وخليني اعملها وأخلص ..
الممثل 2	( يحمل البندقية ويقترب منه بحذر , يشير له بالوقوف ) دير بالك لا تحاول تآتي بأي حركة , وإلا ..
الممثل 1	امشي معي , وراقبني .. ( الممثل 2 يفك قيده ) ..
الممثل 2	( تحرك قدامي ( يسيران ) فوت لهون ( يصوّب البندقية باتجاهه , صمت قصير ) العمى بعيونك على هالريحة .. يخرب بيتك .. تفوووووه .. ولك شو عم تعمل ؟!
الممثل 1	( من الداخل )  شو عم اعمل يعني , ( صمت .. الممثل 2 يقوم بحركات تعبر عن نفوره من الرائحة )
الممثل 2	شو صار معك ؟ ( الممثل 1 لا يجيب ) ولك ليش ساكت ؟ ولااااه ..
الممثل 1	ولك العمى شبك شبك .. ولوه حتى هي الشغلة ماعاد قادر الواحد يعملها على راحتو ؟!
المثل 2	ماعدت سمعت صوتك .. ( يخرج في هذه الأثناء الممثل 1 وهو يزّرر بنطاله , ومن ثم يقف قبالة الممثل 2 لحظة , ومن ثم يستدير ويشبك يديه وراء ظهره ويقول له )
الممثل 1	تفضل , اربطني ..( الممثل 2 ينظر إليه بصمت , وكأنه غير راغب بربطه ولكنه مرغم على ذلك )
الممثل 2	( وهو يقوم بربطه بطريقة عنيفة ) ليك ولاه , لا تخليني اتصرف معك بطريقة مو منيحة هاه .!
الممثل 1	اربطني هلق , وقلي وين بدي نام ..؟
الممثل 2	تناااام ؟! يا حبيبي .. فاتحلك فندق أنا مو هيك ؟
الممثل 1	ولك يا عمي حيرتني , مكتفني , ومابتوثق فيني , عم نفذ كل شي بتطلبو مني ومتل مابدك , ومانك رضيان , شو بدك ؟
الممثل 2	أنت واحد غدار .. لذلك خراس وانقلع لمحلك هونيك , يلعنك شو نتن ..
الممثل 1	لا تحاكيني بهي الطريقة لو سمحت ..
الممثل 2	( ساخرا ) انجرح احساسك يا بعدي ؟! تحرك تحرك .. روح لهونيك ..( يسير الممثل 1 عدة خطوات مبتعدا عن الممثل 2 , ومن ثم يتوقف فجأة وكأنه يفكر بأمر ما ..الممثل 2 يحدق فيه باستغراب وهو يصوّب البندقية نحوه )  ( الممثل 1 ينظر الى الممثل 2 ومن ثم يقوم برلسم خطاً في المكان فيقسم المكان الى نصفين ..) شو عم تعمل ولاه ؟!
الممثل 1	مشان ترتاح مني ! شو رأيك بهالاقتراح ؟!
الممثل 2	اقتراح ؟!!! هادا يلي كان ناقص , ما صرلك بالقصر من مبارح العصر وبدك تقدم اقتراح ..
الممثل 1	أنا بدي ريحلك راسك , طيب على الأقل سماع الاقتراح ..
الممثل 2	ليش بيجي منك غير المصايب ؟  هات لنشوف اتحفنا ..
الممثل 1	شايف هالخط ؟
الممثل 2	إيه ؟!؟
الممثل 1	هالخط هو الحد الفاصل بيني وبينك .. لا انت بتقرّب لهون , ولا أنا بقرب على حدودك ؟ شو رأيك ؟
الممثل 2	حد فاصل , حدودك وحدودي ؟!؟ أيواااه , أحكي هيك من الاول , أصلا انا بعرف أنو كل جيتك لهون مو لـ ألله ..اسماع ولاه .. لا تحلم بهالشي أبداً .. هي بعيدة عن بوزك
الممثل 1	خدني على قد عقلي ؟
الممثل 2	انت مارح تقعد عاقل ؟! ناقصني جحشنتك ؟ .. هيك صعب وافق معك ..
الممثل 1	طيب , اعتبرها تسلاية ..
الممثل 2	تسلاية ؟ هي أمور ما بينلعب فيها ,, هي متل القمار تماما ..
الممثل 1	أي قاعدين هون وما منعرف شو ناطرين ؟! لا فينا نطلع من هون ,لأنو اكتر محل آمن .. فخلينانتسلى أحسن ..
الممثل 2	لهالدرجة خايف ؟!
الممثل 1	طبعا خايف , انت ما بتعرف برة شوفيه , ومابتعرف طبيعتون ,الأوغاد , القتلة ..
الممثل 2	أوغاد وقتلة .. بتعرف يا أما انك واحد خطير , وخبيث .. يا أما انك واحد حمار مابتعرف شو عم تحكي أو مفكرني غبي ومابعرف شو عم تخطط ..
الممثل 1	شفت .. شفت .. شو ماعملت مارح ترتاح , الظاهر انت أصلا ما بتعرف شو بدك .. مشان هيك اسماع مني ما بتندم ..
الممثل 2	على فرض قبلت معك بالحد الفاصل يلي رسمتو , مارح يكون لصالحك ..
الممثل 1	ما فهمت ..
الممثل 2	أي طبيعي أنك ما بتفهم .. هيك اوسع وأحسن ألنا ..
الممثل 1	كمان ما فهمت ..
الممثل 2	ولك أجدب .. ( يتوقف ) كيف بدي اشرحلك ياها .. خيو .. رح أجي معك .. بس أنا رح حملك مسؤولية النتائج يلي ممكن تصير ..
الممثل 1	موافق ..
الممثل 2	أي لكان هاد الخط الفاصل , ورح يكون لكل واحد مننا النص يلي خاص فيه , صح ..؟
الممثل 1	مظبوط ..
الممثل 2	( وكأنه يفكر بأمر ما ) يعني أنا هون وانت هونيك ..
الممثل 1	( منفعلا ) ماشي ..
الممثل 2	بس هاد مو لصالحك هاه ؟!
الممثل 1	أنت ما عليك مني .. بعدين خلينا نجرب بالتراضي أحسن منتقاتل ..( الممثل 2 ينظر إليه نظرة حادة) عم امزح معك يا زلمة .. شبك ؟ مو نحنا عم نلعب ؟! شو ..؟
الممثل 2	ماشي .. روح بس التزم بمنطقتك , وحسّك عينك تقرب على منطقتي ..
الممثل 1	موافق ..
	( فجأة يحدث اطلاق نار كثيف يخرق المكان في بعض الأحيان , ينبطحان ارضاً .. الممثل 2 , يتخذ وضعية قتالية معينة , ويصوب البندقية , نجد الممثل 1 وقد تعلق برجل الممثل 2 وكانه طفل صغير .. يحرك الممثل 2  رجله كي يبعده عنه فلا ينجح , يختفي اطلاق الرصاص ..صمت قصير )
	( يقف الممثل 1 خائفا مذعورا , يبدأ بالتلوي , يسير عدة خطوات فينتبه الممثل 2 , فيصوب البندقية نحوه )
الممثل 2	قييييييييييييف , ولا حركة .. ( الممثل 1 يتوقف في مكانه , ولكنه يتلوى بشكل كبير )
الممثل 1	شو ؟ ( يتحرك في المكان , وكانه سيتخطى الخط الفاصل )
الممثل 2	وين رايح ولاه ؟
الممثل 1	ع التواليت,,
الممثل 2	( ينتهز الفرصة ) شو على كيفك !! ماحذرت , مو على كيفك تفوت وتطلع ..
الممثل 1	ولك يا عمي خدمة انسانية ..
الممثل 2	صعب .. روح وشخّ بأرضك .. عندي ما رح خليك تعملها ..
الممثل 1	( ينظر حوله في المكان المخصص له , فيكتشف عدم قدرته على فعل ذلك في مكانه ) ولك وين بدي أعملها , ما في محل عندي ..
الممثل 2	وان اشو دخلني ؟ مو انت بدك هيك ؟؟مو انت يلي رسمت الخط ؟
الممثل 1	ولك ما كان قصدي .. انا كنت ..
الممثل 2	شو قصدك ما قصدك ؟ أنت من عضمة لسانك قلت انك بتتحمل المسؤولية , اتحمل لكان , أو خلي جماعتك يفيدوك ..
الممثل 1	( يصرخ ) يا أخي لا بقى تقلي جماعتك .. بعدين هدون ناس آخر همون انا ..هدون ناس تجار , تجاااار , بدون جيوبون وبس ..
الممثل 2	تصطفل , انا ما دخلني .. هاد خيارك , وانت  مسؤول عنو .
الممثل 1	بس هالمرة الله يوفقك ؟
الممثل 2	ولا مرة .. اتحمل مسؤولية قرارك ..
الممثل 1	( يبدأ بالصراخ ) ولك ياناس , يا هوووو ...
الممثل 2	لا تعوي , ماحدا رح يسمعك غير الأشباح .. عوي , لشوف مين بدو يرد  على واحد وطواط متلك ..
الممثل 1	( وكأنه يصاب بنوبة هيستيرية ) ولك يا عاااااالم .. يا عااالم ..
الممثل 2	( بهدوء ) لا تعيط , العالم مو فاضي لأمثالك ( الممثل 1 يستمر في الصراخ , فيقوم الممثل 2 باتخاذ وضعية الرامي ومن ثم يصرخ بوجهه ) ولك خرااااااااااس , خرااااااااس ( يتوقف الممثل 1 عن الصراخ .. صمت قصير , الممثل 1 يباعد ساقيه ومن ثم يهدأ , يسير عدة خطوات ) شو ؟ ( الممثل 1 لا يجيب ) وين رايح ( الممثل 1 لا يجيب ,فينفعل الممثل 2 , فيعمد الى السخرية ) شو , انسحاب تكتيكي ؟!
الممثل 1	( يتحدث لوحده ) حتى هون ما عاد ألي محل .. وين بدي روح , العمى ..
الممثل 2	أيوه , أيوه .. هاد يلي شاطر فيه ..الضحية .. بتموت لتكون انت الضحية ..ليك حبيبي , مافي حدا ضحية , في حدا قد أفعالو أو لأ ..يلي بدو ينكش عش الدبابير بدو يتحمل القرص , ما بتتعلم لا من التجارب ولا ..( يقاطعه ) ..
الممثل 1	ولك  ما في بقلبك شفقة ولا رحمة ؟! مو حرام عليك تعمل فيني هيك ؟!
الممثل 2	هي نتيجة أفعالك , انت هيك بدك .. مو هي رغبتك ؟ شو مفكر الدنيا فوضى ؟!؟
الممثل 1	بس هاد ظلم .. الله يخليك , الله يوفقك , خليني أخلص ..
الممثل 2	قدم طلب ..
الممثل 1	شو ؟
الممثل 2	قدم طلب .. شو أطرش ..
الممثل 1	ولك طلب شو ؟
الممثل 2	طلب اذن بالدخول ..
الممثل 1	(  يضحك ساخرا  ) اذن دخول ... ومن مين الأذن ؟!
الممثل 2	مني طبعا ً ..
الممثل 1	منك ؟! وعلى أي أساس ؟
الممثل 2	على أساس انو هي المنطقة الخاصة فيني , وإلا مفكرها سايبة يعني ؟
الممثل 1	أي شو يعني ؟
الممثل 2	يعني على راحتك .. متل ما بدك .. ( يسير عدة خطوات مبتعدا عنه ) .
الممثل 1	بدي فوت ..
الممثل 2	بحب خبرك أنو اذا بتقرب من الخط يلي انت رسمتو خطوة وحدة , لا تلوم غير حالك ..
الممثل 1	( يصرخ متألما وغاضبا ) شو على كيفك ( يتقدم خطوة , فيطلق الممثل 2 رصاصة في الهواء من البندقية الورقية  .. يتجمد الممثل 1 في مكانه مندهشا ) ..
الممثل 1	عم تقوّص عليي ..أنت يلي بلشت .. ( يتحرك بطريقة عشوائية )
الممثل 2	( يصرخ ) ولا حركة .. عم تهددني ولاه ؟! أعلى ما في خيلك اركبو .. بلّط البحر .. ولك فيق , فيق , ماحدا رح يقّشر فيك بصلة لا أنت ولا امثالك ..
الممثل 1	ماشي , هلق بتشوف .. والله لقوّم الدنيا فوق راسك , وما خليها تقعد ..
الممثل 2	برافو .. برافووووو .. هيدا يلي انت شاطر فيه , مو شاطر غير تبعبع .. ولك يا حمار كل ما شافونا عم نتقاتل , رح يكيفوا علينا , حلك تفهم , نحنا مو أعداء , مو أعداء يا حمار , ولو كنت عدوي ما كنت عايش لهلق .. حلك تفهما بقى , واذا كنت ساكت مو لأني خايف منك , أو ماني قدران اعمل شي , بس عم حاول أعطيك فرصة , شوف , شوف شو صار فينا , وانت راكد ورا وهم وسراب .. ولك هيدا هوي الكفر .. يلي بيعمل ببلدو هيك بيكون كافر .. كاااااااااااااااااافر ..
الممثل 1	( منزعجاً ) لأ مو صحيح , انت عم تضحك عليي ..
الممثل 2	تصطفل .. بس هي آخر فرصة .. وبعدها رح يكون في كلام تاني .. وانتبه .. اذا بتقرب خطوة وحدة جنب الخط يلي أنت رسمتو , خطوة وحدة هاه , رح فجرلك راسك وارتاح منك .
الممثل 1	شو يلي تغير ؟
الممثل 2	هي قواعد الاشتباك الجديدة ..
الممثل 1	بيني وبينك ؟!
الممثل 2	وليش مستغرب .. بعدين لوكنت انت محلي ما كنت رح تعمل نفس الشي .. بيجوز كنت تعاملت معي بطريقة كتير شنيعة ..
الممثل 1	هي اعلان حرب ..
الممثل 2	( ساخرا ) ما شاء الله شو هالذكى .. هلق حتى عرفت انها حرب .. طبعا هي حرب .. ولازم تعرف انو  بالحرب البقاء بيكون للأقوى , وللأصلح .. هي الحرب هي اصطفاء طبيعي للبشر ..
الممثل 1	بس انت كتير عم تصعب الأمور ..
الممثل 2	طبيعة الأمور هيي الصعبة .. هيك القوانين , واذا مو عاجبتك هالقوانين الله معك .. فيك تغادر وتنقلع من هون فورا ..
الممثل 1	( يتلوى من جديد كالأفعى , وكأنه يفقد السيطرة على الأمور ) آآآآخ يا بطني , ممغوووص .. آآآخ , بترجاك ..
الممثل 2	( وهو ينظر إليه ) رح اسمحلك هالمرة بس .. ( الممثل 1 يرمي سترته في المكان , ويسير باتجاه الممثل 2 , وقبل أن يعبر فوق الحبل ,.يصرخ الممثل 2 ..) قييييييف .. ( يتوقف فجأة ) ولا حركة, وراء دُر ( ينفذ ) ايديك ورا راسك .. لفوق .. ( ينفذ , فيقوم الممثل 2 بتفتيشه ) يا الله .. امام سر ..( يسير عدة خطوات , فيعود الممثل 2 الى الصراخ ) قيييييييييييف ..
الممثل 1	( وقد فقد السيطرة على اعصابه) ولك شبك .. شو صرلك .. ولك رح افقد السيطرة ع الأمور هاه ..
الممثل 2	أنا ما دخلني , هي القوانين , انا عم طبق القانون , هون في قانون , ولازم الكل يلتزم فيه , شو مفكر لكان , هون الكل بيحترم القانون ..
الممثل 1	بوعدك اني احترم القانون , بس انت احترم قانون الطبيعة .. والله حرام عليك تعذبني هيك ..
الممثل 2	ليش انت بتعرف الحلال من الحرام .. انقلع .. روح .. ( يسير خطوة ) قيييييف ..( يتوقف ) معك دقيقة وحدة ( يسير , فيعود للصراخ ) قييييف ( يتوقف ) بلا صوات هاه .. ( يسير , فيصرخ من جديد ) وبلا ريحة ( يسير بسرعة أكبر ) قيييييييف ( يقف ) ونضف الوسخ يلي بيطلع منك .. ( يسير الممثل 1 خطوة , ومن ثم يتوقف لوحده )
الممثل 1	في أوامر تانية ..
الممثل 2	أي , لا تنسى اني شايفك ومراقبك منيح .. ( يختفي الممثل 1 .. صمت قصير , نسمع من خلاله اصوات بعيدة وحركة , أصوات ريح , وبرق ورعد . انفجارات بعيدة , محطات تليفزيونية وكأنها تتعارك , الممثل 2 يبحث بين أكوام الجرائد , فيجد آلة العود , يمسكها ويحدق فيها , يتفحصها , فجأة يسمع وقع أقدام تقترب , يترك العود ويمسك البندقية , الممثل 1 يخرج من الداخل متراخيا , يقترب بهدوء , ويسير من أمامه باتجاه الحبل .. وقبل أن يخطو  ليصبح في الضفة الأخرى يصرخ الممثل 2 ) هيييه .. هيه .. قيف .. ( يتوقف الممثل 1 , يقترب منه الممثل 2  يحدق فيه ) شو .. لوين ؟
الممثل 1	( باستغراب ) لوين ؟! راجع لمحلي ..
الممثل 2	ومين قلك أنو دخول الحمام متل خروجو ؟!
الممثل 1	كيف يعني ؟
الممثل 2	معك إذن خروج ؟!
الممثل 1	إذن خروج ؟! لأ .. ما معي إذن خروج ( باستهزاء )
الممثل 2	لكان رجاع ..
الممثل 1	مابقدر ..
الممثل 2	مشكلتك ..
الممثل 1	ومن مين بدي آخد إذن خروج ؟!
الممثل 2	مني طبعا .. شو انت ما بتفهم يعني ؟!
الممثل 1	( يصرخ ) خيّو .. الله يلعن هديك الساعة يلي اقترحت عليك هاللعبة الجحشة .
الممثل 2	أنا نبهتك , وقلتلك هي اللعبة مو لصالحك بس انت ما بتقنع , وراسك ترس متل التور ..
الممثل 1	بس أنا
الممثل 2	خرااااس
الممثل 1	ولك من شان الله خلص خلص ..
الممثل 2	لا تتحرك , قلي لشوف , وين كنت؟, ومين شفت ؟,وشو اجيت تعمل هون؟,.ولويح رايح ؟.
الممثل 1	( ينفجر غيظا ) كنت بالتواليت , خريت , شفت الخرية تبعي , ورايح هلق لمحلي , منيح هيك ؟!
الممثل 2	بلا قرف ولاه .. يعني انت خريت بمنطقتي ؟!
الممثل 1	( ساخرا ) وحسب الأصول كمان .
الممثل 2	عم تتمسخر ولاه ؟!
الممثل 1	لأ , بس رح تجنني , أكيد طاقق عقلك , مجنون انت مجنون نظامي .
الممثل 2	المهم , بس تطلع من هون , شو رح تعمل ؟!
الممثل 1	مابعرف .
الممثل 2	مين رح تشوف ؟
الممثل 1	مابعرف .
الممثل 2	( غاضبا) مابعرف , مابعرف , مابعرف , هيك لكان رايح طفش ..
الممثل 1	مافهمت ؟
الممثل 2	يعني أنت ماعندك ارتباطات هيك والا هيك , والا هيك ؟!!!!
الممثل 1	لأ ..
الممثل 2	متأكد ؟
الممثل 1	متأكد
الممثل 2	منظمات ؟
الممثل 1	لأ .
الممثل 2	متأكد
الممثل 1	متأكد .
الممثل 2	عمليات تخريب .
الممثل 1	لأ
الممثل 2	استخبارات ؟
الممثل 1	لأ
الممثل 2	تفجيرات ؟
الممثل 1	لأ
الممثل 2	تهريب اسحلة مخدرات ؟
الممثل 1	لأ .
الممثل 2	تجارة اعضاء ؟
الممثل 1	لأ , لأ , أبدا أبدا ..
الممثل 2	متأكد ؟
الممثل 1	قلتلك انا ما بشتغل هيك شي .
الممثل 2	صدقتك .. ماشي .. اتفضل , انقلع الله معك ..( يذهب , ومن ثم يجلس في زاوية ما .. صمت قصير .. نسمع اصوات رصاص بعيد .. )
	( الممثل 2 يبحث عن عقب سيجارة ومن ثم يقوم بإشعاله , ويبدأ بالتدخين , تخفت الاضاءة تدريجيا , ويسود سواد كامل )
	( تحدث معركة عنيفة في الظلام , نسمع فيها كل أصوات المعركة , وقد تكون أصوات مزعجة حتى للمتلقي , اطلاق رصاص , تفجيرات , شيفرة , اذاعات , خطابات , أصوات مجنزرات , لاسلكي , حركة أرجل , اصوات استغاثة , عويل , بكاء ... ) صمت قصير
	( ترتفع الاضاءة تدريجيا , نجد أثار الدخان في المكان .. ونجد بعض التغييرات في المكان , الجرائد مقسّمة الى قسمين , كل قسم تعلوه سارية وعليها راية خاصة ..)
	( الممثل 1 وكأنه يلبس كفن من الضمادات , يتحرك متألما , يتقدم باتجاه السارية الخاصة بالممثل 2 ويحاول اقتلاعها من مكانها , وهو ينظر حوله متلصصا , ومن ثم يحمل رايته الخاصة به , ويحاول زرعها في المكان نفسه , ومن ثم التقاط بعضالصور بسرعة )
	( يدخل الممثل 2 وقد لفت بعض أجزاء جسده بالضمادات , ويحمل بندقيته الورقية , يراقب ما يقوم به الممثل 1 فنراه يتخذ وضعية ما , ومن ثم يقول )
الممثل 2	قلتلك أنت واحد غدار , ماعندك ولا ذرة وفا .. ومابتقتنع اني صاحيلك .. قوم .. قوم ولااااه ( يقف الممثل 1 بهدوء غدار وبشكل حذر .. يتواجهان , فجأة يخرج آلة ما ( نقيفة ) ويبدأ باطلاق القذائف على الممثل 2 , الذي يبتعد بعض الشيء ويحاول تفادي القذائف التي يطلقها عليه , يصاب الممثل 2 عدة مرات , ولكن لا يمنعه ذلك من التقدم باتجاه الممثل 1 , وهو يطلق رصاصة في الهواء , وينجح بالقاء القبض عليها , ومن ثم يصفعه , يتألم الممثل 1 , ومن ثم يستسلم  , يمسكه ومن ثم يقيده وقد بدا غاضبا بشدة , والألم الشديد باد عليه )
الممثل 1	لا تفهمني غلط انا كان قصدي ..
الممثل 2	( يقاطعه ) انا بعمري ما فهمتك غلط , دائما بفهمك صح ..
	( يقيده جيدا , ومن ثم يقوم بأزلة الحبل بشكل كامل , ويقوم بإعادة الراية الخاصة به الى المكان , ويجمع الجرائد في كتلة واحدة ,ومن ثم يقف بالقرب من الممثل 1 ويقول له )
	هي مو لعبة , وانا كنت من الأول بعرف انك ما عم تلعب , ولازم تعرف اذا رح تضل هيك ما قدامي غير خيارين , أول واحد اني فجرلك راسك , أو اني اجبرك تطلع من هون , وخلي جماعتك يقطعولك راسك ويلعبوا فيه مباراة كرة قدم ..
الممثل 1	ماعاد بيهمني شي ..
الممثل 2	طبعا , لا كان بيهمك شي , ولا بيهمك شي , ولا رح يهمك شي , لو كان هامّك , ماصار هيك بالبلد , يلي ساكنين فيها أنا وياك , مناكل من خيرها ومنتنفس هواها , اتطلع هلق كيف صارت كلها أشباح , شوارعها فاضية , بيوتها مهدمة ومهجورة , هي هيي البلد يلي تربينا من خيرها , هي هيي .. هي بلدنا , يلي كانت بتجمع كل شقاء العالم , وكل عظمة التاريخ والانسانية , هي بلدنا , ولك شو عملنا فيها , اتطلع منيح , وفيق بقى , انا وياك مارح نقدر نطلع من هالمحل غير عالقبر , ضايعين , آآآآآآآآآآخ يا راسي , حاجة وجع , بس ايمت رح يخلص هالكابوس , اتطلع منيح حواليك , بدل كل شجرة صار في قبر ..( صمت قصير يحمل الممثل 2 العود ويبدأ يدندن بعض الألحان ) بعد فترة زمنية )
الممثل 1	أنا مافق .
الممثل 2	( يترك العود وينظر إليه باستغراب ) على شو موافق ؟!
الممثل 1	فكني , وخليني روح من هون .
الممثل 2	لأ مارح خليك تروح ..
الممثل 1	ليش .؟ مو انت هيك بدك ..
الممثل 2	.. لو بدي ياك تموت كنت أنا قوصتك من أول ما اقتحمت عليي المكان .
الممثل 1	ما عاد مهم أي شي . خلص فكني خليني روح .
الممثل 2	عم يعذبك ضميرك ..؟
الممثل 1	خلص .
الممثل 2	سماع منيح
الممثل 1	( يقاطعه ) انت سمعني منيح هالمرة . بما انو كل شي صار عالمكشوف , وبما اني ميت ميت , انا ماني هربان , انا..
الممثل 2	( يقاطعه ) هسّ , مافي داعي تبرهن على انك واحد واطي , خلص .. خلص .. لازم تفهم أنا ماني عدوك , وهي آخر مرة رح مدلك أيد المساعدة , انا بدي ساعدك ..
الممثل 1	أنا ما بحاجة مساعدة من حدا ..مادخلك فيني .. الله يخليك فكني , واتركني ..انا ما دخلني فيك ..
الممثل 2	أحسن .ورح اعتبرك مو موجود ..
الممثل 1	بيكون احسن .
الممثل 2	يعني انت كابوس , كابوس مرعب .
الممثل 1	بشرفي انت مجنون .. انا ماني موجود , انت عم تتوهم اتني موجود , بس انا موجود
الممثل 2	أنا ماني مجنون , أنت مانك وهم , وأنت موجود غصب عنك ..( يقترب منه ويقوم بفك قيده , ويبدأ بينهما عراك بالأيدي , تتبعثر أكوام الجرائد في المكان بطريقة فوضوية ..ينهار كل منهما .. )
	( تترك النهاية لاقتراحها اثناء البروفات )

النهاية 

ملاحظة  :

اتمنى عدم إخراج هذا النص 

او الاقتباس أواعداده 

دون موافقة المؤلف

للتواصل مع المؤلف مجد يونس احمد  

majdyounesahmad@gmail.com

موبايل : 00963945410570 -00963944565571