مسرحية " أوقفوهم " تأليف سعد يونس حسين
مجلة الفنون المسرحية |
| الكاتب سعد يونس حسين |
قدمت المسرحية بمناسبة اليوم العالمي للتصحر والجفاف 17/6/2024 اخراج عمار احمد
دراما تورج: الدكتور محمد عمر أيوب
الشخصيات:
ابو حازم : ................. مزارع .................. خمسيني
ام حازم: ..................... منتصف الاربعينيات
ليلـــى : .................... زوجة حازم .............. عشرينية
حـــازم : ................... ثلاثيني
شمس :...................... منتصف العشرينيات بنت العم
وتعيش معهم ... تعمل بمنظمة غير حكومية لمكافحة التصحر والجفاف
فاضل : اواخر العشرينيــــــات
المـــــــــــــكان : اطــراف المدينة
الزمــــــــــــان : كـــل زمــــــان
السينوغرافيـــا
تبدأ بفديو التصحر والجفــاف
يتخلل العرض صوت مؤثــر هبوب الرياح
تختتم بفديو عن اراضي خضــراء ومدن خضــراء
موسيقى أو أنشودة عن البيئة / ختـــــــــــــام
المشهد الاول
بيت المزارع ابو حازم في اطراف المدينة
هناك شخص نائم على سرير مغطى طول المسرحية
مؤثر صــوت هبوب الرياح
يدخل حازم ( مهرولاً ... ومرتبكا وهو ملثم )
حازم : الحكو .... اجانا... اجانا
الام : اسم الله ..... يمه .... شكو ..... شنو
اللي اجانا ... على كيفك .... ارتاح وفهمنا
ليلي: خير ....... شنو الذي لحكك
(تذهب الى الشخص النائم) : هذا منو ... تعرفوه؟
حازم: شمدريني : طبعا بطرانين ... ولج رمل
هجم علينا
الاب : ( بتعجب) شنو..... بويه .... اشبيك
اكلت شي غريب؟
حازم : رمل .... رمل ...... ( يصرخ)
الاب: خلف الله عليك .... انوب تضحك علينا .... هو الرمل ينوكل
....... بس ..... سالفتك ماصخــة
حازم : بويه .. الرمل ... اكول... الصحراء ......... والله
لتشوفوها جنها جيش من الدود ...من كل صفحة اجانه
اما اذا ما نسوي شي ونلحك لنفسنا
الا ... نشوفه طاب لبيوتنا ... وبعدها ما يفيد الندم
ليلى: أي يمه... ايريد ياخذ ابيوتنا ... ميدري!!
هن ملك صرف...
حازم: تتمزهدين عليه ... اسكتي ... الشي الي ما
تفتهمين بيه لا تدخلين خشمج بيه
شمس: باوع حازم .... على كيفك ... فهمهم
الام: اروح اسوي كهوة اله... عيب منه
حازم: إلمن.
الام: للرمل ... غير
(ضحك الجميع)
حازم: من اتصير المصيبه وين انروح...
لازم انكون مستعدين...
شمس: اعزائي .... استريحوا اشرحلكم
اشيقصد حازم
ليلى: أي بلكت بيه اكل ... بقـــلاوة
تذهب الى الشخص النائم ... ( دكولولي هذا منو)
حازم: شوفي ... شمس ... اتفضلي(بتهكم)
اشلون اتفهمها .... وتفكر ...
بس بطنها..
شمس: حبيبتي ... شموس ... بس لحظة
تعرفون اني خبيرة بالزراعة والبيئة
الام : نعرف ... بس طلعيها الجوهرة
شمس: شوفوا ...بدت الصحراء والرمل تزحف علينا ....
اشوية اشويه راح تاخذ حتى ابيوتنا
ليلى: شنو ... بله ... هوعدة رجلين
اكلج انت .. قاريه جم اكتاب وجاية
اذبيها علينا ...
أي .... محد يسمع الها ( بتهكم)
ابو حازم: اصبري بنتي ... خل نفتهم
شمس: لان داير ما داير المدينة ماكو
اشجار او زراعة فتكون جرداء
فالعواصف ... تنقل الرمل والغبار داخل
المدن ... وبسبب الجفاف يوميه
تقترب شوية شوية ... الى المدينة
بعدها لبيوتنا
ابوحازم: زين بنتي ...... شنسوي؟
شمس: نخلي حاجز طبيعي حول بيوتنا اولاً
ثم نتوسع الى ما حول المدينة ...
حازم: خويه ... اذا انظل هيج تره تندفن
بيوتنا...كدام اعيونا
وبعدين ... حتى الاكو ما كو ايصير...
ابو حازم: أي بويه...
شمس: نزرع داير ما داير بيوتنا شجيرات
ونباتات مقاومة ... تتحمل الجفاف
ليلى: شلون بله ... (تذهب للشخص النائم وتكول) اكلكم هذا منو ؟
شمس: جذورها عميقة والناس مجربيها ... تتحمل
الحر والجفاف
أي ... نزرع كل بقعة ..... جرداء ...
نحث بعضنا الآخر .......
ابو حازم : بعدين اعتقد بيها ثواب وانسانية ...
والاكثر منها نحافظ على انفسنا...
حازم: زين والنباتات الي زرعناها...
شلون نحميها ؟
شمس: نغطيها بالنايلون ... هاي سهلة
حتى تثبت التربة التي حولنا
ليلى: خوما ندكها بالمسامير؟
اكول ... لحظة هذا منو ( تشير للشخص النائم في السرير)
الام : اسكتي وروحي جيبيلنا
جاي ... حتى نحل هاي المصيبة
يلة يمه ... كومي...
حازم: أي ... نجمع ولد المدينة
ونفهمهم بالخطر ....
شمس: مو بس هاي نعطيهم الحلول
حازم: زين .... شنسوي؟
شمس:تتفق وتروح تشتري شتلات مقاومة
للجفاف والحرارة ... ونبدأ نزرع حول
المدينة على شكل حلقات .... تتوسع
شوية.... شوية
ليلى: والمــي؟
ابو حازم: آني عندي مضخة(موتور) ... بس شوية ارتبها ...
اشغلها ونسوي سواجي....
هاي سهلة ....
شمس : بس تنزرع ... تعرفون شيصير
الام:شيصير يمه
شمس: اولا نوكف زحف الصحراء علينا ...
ثانيا يهب هواء نقي يعني بلا غبار ..
حازم: أي .... تجي الطيور ... العصافير ....
حيوانات ... شكد حلو
شمس: نعم .... اتصير حياة
ابو حازم: حتى الارض متعاتبنا
وتكول هملتوني
شمس: اكو موضوع آخر
حازم : شنو ... انوب؟
شمس: اكو تصحر داخلي...
ليلى: وهذا شنو يمه؟
بس رحمه لوالديكم هذا منوا ( تشير للشخص النائم بالسرير)
شمس: حبيتي : اليوم بدو المزارعين يحولون
اراضيهم للسكن ... يقطعونها .... ويبنون
عشوائيات .... بلا تخطيط ...
حازم: مو فلوس احسن .... مو احسن من الزراعة وطلايبها
شمس: أي ... بس انقتلت الزراعة .... يعني
انقتل الحيوان ... يعني.... الانسان
ويدمر الاقتصاد و ...يصبح تصحر داخلي
ابو حازم: أي بويه ... نعتمد على المستورد...مو؟
احنا اهل الخضرة والمي
ارض الرافدين ... ارض السواد... ( يتحدث بحسرة)
ليلى: أي اني اغسل كل ساعة حتى
ما ادمر...
حازم: اتفضل ... بله شي يحاجيها الواحد
ليلى: اكول ..... بويه
الموتور... مو كلمة اجنبية .... مثل ما يكولون
بالسوك ... يجيبها الاستعمار
ابو حازم: نعم ....
افهمج بويه
الاستعمار ايريد يكتل كل شي .... حول الدول
حتى تبقى تحتاجه
فاذا ما كافحنا التصحر ... والجفاف
ووضعنا حلول له ... راح اتموت
الزراعة .... تجف الكـــاع ... ما كو دواجن
ما كو حيوانات ..... ما كو أي شي ...
فتضطر ... تتوسل بهذا وذاك
حتى يوفرلنا المستلزمات
ليلى: المستلزمات؟
ابو حازم : أي مستلزمات الحياة من اكل وتوابعه...
وبهالشي حققنا ما يريده الاستعمار ...
بدون ما يتعب...
المشهد الثاني
تدخل ليلى ( تلتقط اكياس.... واوراق وتقارير)
شمس: شنو ... دا يصير ... هرج ومرج
ابو حازم: الرمل اجه .... واحنا ما اخذنا كلامج
وبالمجالس صارت هم بس من....
كلمن دخل لغرفته... انتهى كل شي...
انسى...وهاي النتيجة
شمس: تدرون هذا الرمل ... الى هجم هو
غضب الطبيعة ... البيئة
وهو تحذير لاهمالهم...
الام: شنسوي ... صار الي صار
شمس: لا ... ارجوج ... صار زمان اكول
الكم ... لازم نحل المسألة ترى خطره
الاب: يبنتي كلنا مذنبين..... اليــوم
نبــدأ من جديد...
لان لازم نبدأ .... حفاظا على
حياتنا ... ووجودنا
شمس: يكول المثل ... ان تأتي متأخر
خير من ان لا تأتي...
اني حصلت الكم ......... اكياس وشتلات
من المنظمة والناس تعهدوا يساعدوكم..
ابو حازم: يا ناس؟
شمس: القرية جيراننا ... لأن
تعرف شغلنا يشمل الوطن
كله ... مو بس كلمن وقريته
انتو ما استجابيتوا ... همة .... استجابوا
والــ.... الشي الحلو
حازم: شنو؟
شمس: زادت شتلات وسماد ووسائل ري ... صوندات
وادوات الزراعة
وهمه مستعدين يساعدون
لأن الشغله مثل ما كلت انسانية
قبل لا تكو شخصية...
حازم: وهســه؟
شمس: يله ... الهمة ... يلا يا جماعة
نستخدم اسلحتنا لصد الهجوم ...
يله ايد بايد ...
ليلى: أي ... تمزهدكم ... خلاني اقره واتعلم
وهسه اكدر اساهم بالرأي
بروح اهلكم هذا منو كتلني ... احنا نشتغل وهو نايم ما يدري بالدنيا
ابو حازم: اعتذر بنيتي... احنا دائما
الا بالشدة ... نشتغل
شمس: بس عمو... كلشي بالتفكير ... حلو
وبعدين جدتي... جانت تكلي
اكو اثنين امهات يتفاخرن بأولادهن
الاولى اتكول اني ابنتي يشك ويركع
الثانية كالت اني ابني يتلكاها كبل لا توكع
الام : يعني؟
شمس: لازم نستعد لعمل الاشياء ونديم اشيائنا حتى لا ننخبص وقت
الشدة ... وما تعرف شنسوي
(يقوم الجميع احدهم يضع شباك والثاني يزرع شتلات وسنادين...
صوت هبوب رياح عاتية مع فديو عن الصحراء
تغزو المدن ... وجفاف الاول).
شمس: هسه ارتاحينا الكل بدأ يعمل ... روح
التعاون ... وحاولنا القضاء
على هذه الافة بامكانيات بسيطة
وتفكير صحيح
فديو عن اراضي خضراء حوالي المدن ...
وازدهار الزراعة
بعد الفديو
جميع الممثلين يجلسون في وسط المسرح
على كراسي وطاولة امامهم
(زي حديد )
(ينهض الشخص النائم بعد ان يرمي الاغطية وينتفض)
شمس: ها ... فاضل ...
الام : اسم الله ... فزيت
يأتي يجلس معهم ..
فاضل: اتعرفون ...... اشصار
حازم: اشصار
فاضل: جنت بحلم ... قوي ... جدا
بدايته مرعبة بس بعدين ... صار زين
ليلى: شنو هذا الحلم .. الي خلاك
بهاالنومة القوية وآني عبالي غريب نايم هنا
رحت على بالي
عبالي بعدك عند بيت خالتي
فاضل: والله بيه محاضرة افتر على القرى
والارياف وحتى المدن
وخصوصا بيه همة وتقاليد
الاب: يابه كوله ... لو بعد لا تكوله
شنو ... طلاسم ... فضها
فاضل: (يفرك عينه) كومي ليلى جيبيلي مي
ليلى: ما ... الا تحجي ( بتدلل)
الام: احجي... وآني أجيبه .. ( تذهب وتجلب الماء) ثم تعود واجلس
فاضل: جن حدث تصحر والرمال هجمت
على مدينتا ...
شموسه ... عود تعمل مع
منظمة غير حكومية لمكافحة التصحر
والجفاف وكامت تنصحنا... واحنا استمعنا
بالبداية بس ... كلشي ما سوينا
بس ... كلام بكلام ...
ليلى: وبعدين
فاضل: حدث ما حدث وانترست البيوت
رمل... وبعد ما كو زرع
حازم: أي ؟
فاضل: و من صارت الشغلة صدك .. رجعنا
لنصائحها .. وعملنا
بما وجهتنا بيه... واصبحت
الارض حول المدينة مشجرة خضراء
ابو حازم: أي ... بابا
فاضل: تعاون الجميع
وفكر الجميع.... ونتغلب على هذه
الشدة
ابو حازم: نعم.... كلام صحيح
الارض ارضنا ... تعطينا ... بس
لازم ننتبه الها ... نساعدها
وبالاخير نساعد انفسنا
شمس: ( تتحدث للجمهور)
اذا فكرنا ... بايجابية في خدمة مدينتا
... احنا بالتالي خدمنا انفسنا
التصحر والجفاف آفة ذات رأسين
تلدغ المدن ثم تبتلع الانسان
لذلك اقول
أوقفوهم
موسيقى او انشودة عن البيئة
ستارة
0 التعليقات:
إرسال تعليق