مسرحية " نيشان الخطوبة " تأليف : بدري نوئيل يوسف
مجلة الفنون المسرحية
(مسرحية اجتماعية كوميدية غنائية )
لإحياء العادات والتقاليد الموصلية القديمة مع مجموعة من الاغاني القديمة الموصلية .
الفكرة :
تمثل العادات والتقاليد ركنا أساسياً ، وسمة حقيقية من سمات أي مجتمع إذا أريد معرفـة خصائصه الحياتية الخاصة والعامة ، وطبيعة تشكيله الاجتماعي . والموصليون بصورة عامة امتازوا بعادات وتقاليد تختلف إلى حد ما عن عادات وتقاليد المحافظات العراقيـة الأخـرى ، نتيجة لظروف صعبة مرت عليهم على مر عصورهم التاريخية ، ولكن هـذا لا يمنـع مـن اشتراكهم بعادات وتقاليد عامة اشترك فيها كل العراقيين في المأكل والملبس والغيرة والشهامة وغير ذلك من العادات والتقاليد الحميدة الأخر .
الشخصيات المسرحية :
(سليم ... ابو دريد ) : والد سمر في الستين من العمر ، عصبي ، ينفعل بسرعة
(اخلاص ...ام دريد ) : والدة سمر ، في الخمسين من العمر، هادئة صبورة
سحر : البنت الكبرى ، في العقد الثاني متزوجة تركت زوجها لسبب تافه
سمر : البنت الوسطى ، في العقد الثاني ،تعرفت على نادر بواسطة توتير ، وهي نشطة عجولة
قمر : البنت الصغرى ، عمرها عشرون سنة
دريد : الابن الكبير : في العقد الثالث
نادر: الابن الصغير في العقد الثاني من العمر، يجيد الغناء
اديبة ..ام نادر ، في الخمسين من العمر ،
خليل : خليل في الستين من العمر بخيل جدا ، يجيد الغناء
حسيب : زوج البنت الكبرى سحر ، شخصية بسيطة محب لزوجته لكنه يسمع كلام امه
مطرب موصلي أو من يقوم محله لتقديم الاغاني
المسرح
المشهد عبارة عن غرفة الاستقبال في منزل ابو دريد مسجل يصدر الصوت منه ...
تفتح الستارة على موسيقى وأغنية (نيشان الخطوبة للميعة توفيق نسمع مقطع صغير) سمر جالسة على الاريكة تقرأ في ورقة و تضع التلفون على اذنها وتتراقص بهدوء مع اللحن والأغنية وبيدها ورقة تلوح بها تُقرب التلفون نحو المسجل توحي بان هناك متكلم معها يسمع .. توقف المسجل وتتكلم في التلفون . ( نادر يتكلم من الكواليس).
سمر : نادر سمعت الاغنية ... بشرفك شكد حلوة .
نادر : الاغنية اتجنن ...سمر ... اريد صورتك اخليها جوا المخدة حتى اقدر انام .
سمر : صورتي منشورة على فيسبوك
نادر :عيب بنت تنشر صورتها لازم شليها
سمر : و شخليي مكانها
نادر : تقدرين تخلين صورة شجرة ،وردة ، مثلا بقرة
سمر : اشكرك على هذا الاقتراح
نادر : العفو ....سمر قرأت الرسالة
• يدخل سليم والد سمر للمسرح يراقب ابنته وهو تتكلم في التلفون وتنظر الى الورقة .
سمر : بس شويا طوختها زايد ...... لو بابا شافها .... كان زعل عليك .
نادر : ليش بابا عصبي .
سمر :اي بابا يصير عصبي بسرعة .... لكن يفش .. يدخل سليم والد سمر للمسرح يراقب ابنته وهو تتكلم في التلفون وتنظر الى الورقة .
نادر : ليش هو تاير حتى يفش .
سمر : لا بابا مو تاير هو فشوش.
نادر : يعني طرطور .
سمر : لا مو طرطور ...يعني بوخا ... فشوش ..
نادر : انا وبابا وماما حاضرين ..راح نجيء للخطوبة .
سمر : ان شاء الله بابا يوافق لا يعمل لنا حجج ...
نادر : راح اخطبك على عناد هذا البوخا بابا وإذا ما عجبه خل يدق رأسه بالحائط.
سمر : نادر زعلت عليك دا لا تستعجل تعالوا اول مرة للخطبة ... (تنتبه والدها واقف خلفها تصرخ) ... بابا
تنتبه سمر على وجود والدها على المسرح ترتبك تخفي الورقة خلف ظهرها
سليم: واتكندر الجدر لقالو قبر .... سمر .يقولون .. البزوني من استعجالا تجيب اولادا عميين . بعصبية اعطيني هذه الورقة
سمر : بارتباك ...بابا .... لا لا ..هذا واجب مالت الكلية .
سليم :... اعطيني الورقة اريد اعرف منو الفشوش.
سمر : بابا هذا واجب الكلية فشوش .
سليم : اعطيني الورقة ... أنا الفشوش صوج اللي ما رباكِ (يسحبها من يدها يقرأ )
تتجه سمر نحو الخروج خائفة تضرب على خدها تظهر عليه علامات الارتباك والانزعاج مؤديا حركات تدلل على العصبية والانفعال
سليم : هذا واجب كلية !! بنت الفشوش .. !!! اذا ما شعلت اللي خلفك انا مو سليم ابو دريد . أتلاقت المكنسة مع البلوعة وصاروا جماعة ...تعالي .. يا بنت البوخا .
• تدخل سمر للداخل مرتبكة ويبدأ سليم بقراءة الورقة ..... ينادي بعصبية على سمر .
سليم : ينادي بصوت عالي سمر ....ولك سمر .
يتكلم مع نفسه .. اشتعل بيت الكذاب محد صدّقوا .... بس اريد اعرف هي البنت منو اللي علمها الكذب هذا واجب كلية لو ... رسالة من نادر .
• تدخل اخلاص الى المسرح
اخلاص : هي اش بيك صار عصبي ... مو زين تحكي مع نفسك ... راح تحتاج دكتور ومين انجيب دكتور واحنا بهذه الحالة التعباني ....ابو دريد ... شنو الموضوع ...
سليم ( بعصبية) وأنتِ اش دخلك بالنص انا صيحت بنتي سمر .
اخلاص : بنتك عدها دراسة .. اش تريد ... صوتك وصل للشارع ؟
سليم: الف مرة قلت لك لا ظلين تتمكيجين راح تعجبين عزرائيل وياخذج ؟
اخلاص : اكو اكثر مني تتمكيج لا تخاف .. شوية كريم وزيت ذرة ينفع للبقع .
سليم : بس شوية كريم .. نسيت من ترحين خطار ....كريم يد وكريم وجه وماسكارا وروموش صناعية وكريم اساس ومثبت وسمكرة صنفرة وصقل وملمع وبولش ومكبر شفايف
اخلاص : دقول الكحل والتسريحة ليش مغثوث ما تريد ام دريد تطلع اجمل نساء العالم.
سليم : هم... القرد بعين امه غزال.
اخلاص : تفضل قول ليش مغثوث ومهموم .
سليم : ما كو شيء ..الجحش مالي ضاع .......
اخلاص : يمعود راسك طيب ولا اتشيل هم ...شوفتك عندي تسوى الف (جحش) .
سليم : اكيد اكو اشياء كثيرة انا وانتي نتشابه بها ..مقبولة منك ام دريد ... طالما دخلتي على الخط تفضلي اقرئي هذه الورقة .
تأخذ الورقة منه تنظر اليها باستغراب
اخلاص : خطها ما واضح .. اقراها انت .
سليم:ايا پا .... اللي يعجبك تقرئيه واللي ما يعجبك الخط مو واضح ..... جيبي.. يوم الاسود .... كان ذاك اليوم ... لمن سمعت كلام المرحومة.
اخلاص : لا كان يوم اسود لمن سمعت كلام المرحوم ... وزوجني وأنا قاصر .... وبهذا الوقت القانون يحاسب زواج القاصرين .
سليم :لا تخليني اصير عصبي واقلب البيت فوق جوا.
اخلاص : سليم لا تعلي صوتك وإلا... .(تتظاهر بالعصبية)
سليم : اوكي ... تعالي ..اقرأ لك هذه المكتوب .
اخلاص : وهذا المكتوب منين أجاك .
سليم : هذا المكتوب كان بيد بنتك سمر مرسل من الاستاذ نادر .
اخلاص : اش يريد هذا المفجوع مو ... راح يجيء يخطبها اليوم .. اش كاتب لها . تفضل اقرأ .
سليم : (يقرأ ) عزيزتي سمر... وحياة قلبى الولهان .. ما لكي عليا حلفان ... شتاقيتولك كثيغ غتو اخابرك بس بطلت قلتوا ماطول انت بقلبي عليش هالمصاريف الزيدي ، ولهذا بعث لك المكتوب مع اختك ، واعرف انت راح تخابرين ...سمر لو تطلبي منى قلبى .. لأعطيك روحى على عناد ابوك التعبان بومة الخرائيب ,,, كل شي بيك حلوا والأحلى ضاربة ابوك بوري ..لانه فشوش اثول ، احبك حب عجيب .. وما راح يقدر ابوك يفرقني عنك حتى لو جاب لواء الذيب ... اليوم راح نجيء للخطوبة .. اخاف من ابوك ال.....دد ...(يتوقف عن القراءة) ) (مترددا بالقراءة مشيرا بيده ) الى الورقة
اخلاص : الدب ...
سليم : وهي شلون عرفتيها مو تقولين الخط مو واضح .
اخلاص : لا هي الكلمة اعرفها دب ..دبان .. دببة .
سليم : مكتوب دب لو غير كلمة .
اخلاص : دب احسن من اللي مكتوب ...كمل
سليم : راح اكمل ... اخاف من ابوك راح يعمل لنا تعقيدات في موضوع الخطوبة ويحشر انفه في الوسط مثل
اخلاص : وليش طفرت الكلمة .. ما قرأتها.
سليم : ما عليك بها ما واضحة ..
اخلاص : لازم تقرأها بالكامل حتى يكون المعنى واضح ..تريد اقراها لك
سليم : لا .. ما اريد .... اسمعي زين.. ايد وحدي ما تصفق . بنتك سمر مشجعة نادر يكتب على ابوها هذا الكلام المعسل
اخلاص : أي ... كانت عايزه.. والتمت .. قلو مرحبا قرداش .
سليم : قرداش منو
اخلاص : انا اعرف قرداش منو المثل هكذا يقولونه ..
سليم : اخلاص
اخلاص : من عيون اخلاص ابو دريد ..تفضل
سليم : انا راح اصيح على بنتك ..ديري بالك تقفين معها .. لازم تتربى وتتعلم تحترم ابوها .
اخلاص : تريد تأخذ كلام من بنتك سمر ابو دريد حضّرت المعلف قبل الحمار .
سليم : ثلثين الولد على خاله ...يعني على من يطلعون .. غير على اخوالهم.
اخلاص : وليش دخلت اخواني بالنص.
سليم: طول عمرك تبقين بلا عقل هذا مثل .
سليم :(ينادي) سمر .. سمر
• تدخل قمر المسرح
سليم : انت سمر
الحان : لا انا قمر اخت سمر
سليم : تعالي .الله جابك . يا قمر ... صار كم يوم ما اكو نشرة اخبار .
قمر : عليك دين يعني مطلوب شهر .. اخبار ما اكو الدفع مقدما .
اخلاص : قمر .. طلعتي تلعبين على الحبل تأخذين مني ومن ابوك .
قمر : ماما انتِ مطلوبة ثلاثة اشهر .. نشرة اخبار ما اكو .. اللي يدفع اولا .
سليم : لا تخلينا اعصب .. واشكد اهدومي ... تفضلي سمعينا اش عندك من الاخبار .
اخلاص : اكبر مشاغبة وفتنة انت بالبيت .
قمر : قابل مراسلين الجرائد فتنجية ... انا اش عليه اشتغل مراسلة نقل اخبار العائلة من والى العائلة ..تدفع لو لا ..
سليم : لا ما راح ادفع .
قمر : عندي دراسة بابا مع السلامة ( تحاول الدخول) .
سليم : راح ادفع ...
قمر : وأنتِ ماما تدفعين الديون اللي عليك
اخلاص : خذيها من ابوك ... يا مراسلة ..يا ليت جابت لي فد يوم خبر على ابوها .
سليم : لا ما راح تجيب لك خبر على ابوها ... تفضل بنتي سمعيني .
قمر : اختي سمر قالت ابوي صار له عشرين سنة خري مري لمدرسة وما تعلم ولا كلمة.
سليم : انا ما تعلمت ... انتظرني .. بنت ال ..
اخلاص : اش قالت .. سمعيني بعيد عنكم .. اذاني ثقيلة.
قمر : قالت اذا ابوي رجال يعرف اسم مسئول واحد بالدولة .
سليم : انا ما اريد اتعلم اسمائهم ..لان ما اريد ادخل بالسياسة .
اخلاص : منو خرب بيتنا غير سياسة ابو دريد . نسيت .
سليم : هاي امكِ تحكي لنفسها ,, لا تسمعيها ... وبعد اش تقول اختك .
قمر : تقول ابويا يخاف من امي .
سليم : انا أخاف .. اخلاص ... روحي جيبي كلاص ماي .
اخلاص : صار زحمة عليك من يقول انت عطشان .
قمر : بوخا ... سمر تقول انت بوخا .
سليم : إذا ما شوفتها نجوم نص الليل انا بوخا ..
اخلاص : وبعدين ... ... المهم ...موضوع نادر .
قمر : لعلمكم .. كل الوقت مشغولة مع نادر ولا تفكر بالدراسة .
اخلاص : مبين ... مشاء الله انت متفوقة بالدراسة وقضية الرسائل اللي تنقليها .
قمر : هي رسالة وحدة ... اجا نادر للكلية ما شاف سمر اعطاني الرسالة قال سلميها لاختكِ . تفضل ادفع الديون اللي عليك
سليم : لك تردين اسب لو اجيبك بكف يعدل دماغك ..فلس ما راح تستلمين ..
اخلاص : روحي جيبي معلومات على حبيب القلب نادر .. جيبي خبر يوكل خبز ...
سليم : ابعثيها .. خلي تجيء ... اريد اسألها كم سؤال عن هذا اللي اسمه نادر وقسما اذا ما جت واعترفت بكل شيء راح اطرده
قمر : زين اروح ابعثها ...لازم كل شيء تعرفون ... اخبار بث مباشر تردون ...
• تخرج قمر من المسرح
سليم : هذا يسموه احترام الاهل ... لو قشمره
اخلاص : من تسألهم ليش تتصرفون هكذ .. تقلك هذا حرية التعبير عن الرأي ...
سليم :.. انا اريد اعرف هذا اللي ظهر فجاءه ... من يا عائلة ... اش يشتغل ... ويريد يجيء يخطب
اخلاص : سألتُ كل اللي اعرفهم ما حد عرفة.
سليم : والشغل الدراسة.
اخلاص :الدراسة ما اعرف ، سمر تقول الشغل كل موسم يربح عشرة مليون وأكثر
سليم : ما شاء الله ...بالمواسم يربح ...
اخلاص : هذا عدا الوارث من جده طن دولارات . تقلك بالوزن وزعوه بين الاخوة .
سليم :لا تصدقين بهذا الحكي... كذاب ... المهم يطلع نادر مثل حسيب زوج سحر محترم على قد حاله معيشيها
اخلاص :اسم الله عند سحر ... مرتاحة واشكد ام حسيب تخدم وتحترم سحر.
سليم : حسيب من عائلة محترم ... يحب سحر ويحترمها .. امه وردة.
اخلاص : دريد وغسان ظل بالي عندهم طلعوا من الصبح تأخروا .
سليم : ان شاء الله يقدرون يجمعون معلومات عن عائلة نادر .
• تدخل سمر
سمر : نعم بابا تفضل
سليم : نعم بابا ... تقربي ... اللي سمعته كلام ما عجبني
سمر :لا تصدق كلام قمر ... اكبر مشاغبة ... اقول اش تحكي عليك .
اخلاص : ما يحتاج تقولين ... انت موافقة نادر يكتب على ابوك كلام قبيح .
سمر : ابدا ما قبيح ... ما اسمح له لكن هو كلام فقط ما من القلب نادر يتشاقى ولا قصده يكتب على بابا
اخلاص : هذا لازم ترفضه وما تسمح له يتقرب من عدنا.
سمر : ماما حرام نادر بعدين تضربه جلطة ، لو شلل ... انصحه بابا .
سليم : اريد اعرف شلون تعرفت على نادر.
سمر : توتير ... عن طريق توتير .
اخلاص : وهذا توتير طالب معكم بالكلية .
سمر : لا ...موقع للتواصل الاجتماعي بالانترنيت .
سليم : يعني تواصلتم مع توتير وصرتم صداقة وقررتم تزوجون ..ما شاء الله ... يعني توتير مثل خالتي شكرية كانت اكبر دلالة بالمحلة تلقي العروس وهي طائرة ايام زمان .
سمر : نعم بابا ... التطور السريع ... العولمة ...نادر غرد ,,وأنا غردت صار الانسجام .
اخلاص : قربان هل الطول ... وتعرفتم وتلاقيتم .... واتفقتم ... واهلك طراطير .
سمر : حاشاكم ... بابا احنا ... تلاقينا مرتين ..
سليم : يمكن يطلع اكبر كذاب وحيال رحتِ اتفقتم على الزواج عرفت ابن من هو من يا عائلة
سمر : انا ما راح اتزوج العائلة.
اخلاص : المثل يقول (خذ الاصيل ونام على الحصير ) .
سمر : بابا وين اكو حصير .. كلها زوالي والأرضيات كاشي موازيك وسراميك.
سليم : لك بنتي هذا مثل يعني يكون محترم مؤدب ابن اوادم .
سمر : هو محترم ومؤدب ..لكن هو ابوه اسمه خليل ما اوادم .
سليم :لك لا جنني ..ابن اوادم يعني من عائلة شريفة معروفة.
اخلاص : بنتي عادة اهلنا يفضلون الشاب اللي عنده اخلاق وسمعه زينة ومعروف.
سليم : لو واحد من شباب المحله حتى لا يروح خيرنا لغيرنا .
سمر : اصلا اذا تشوفون نادر من اول مرة راح يدخل قلبكم .
اخلاص : يعني مثل حسيب زوج اختك ..
سمر :. نادر اجنن.... يخبل بس يعجبكم تقعدون معه قلب طيب حنون ، يذوب في الرومانسية.
سليم : انتظر اخوانك يرجعون وإذا اي خبر ما اعجبني ... نيشان ما اكو .
اخلاص : انا معك ... الجواب عند دريد وغسان ننتظرهم يرجعون.
سمر : يعني جريمة تعرفت على نادر بواسطة توتير.
سليم : لك بس فهميني توتير يريد مصلحتج مثل اهلك ...
سمر : طبعا يريد مصلحتي ، لو تعرف باليوم آلاف يتعارفون بواسطة توتير .
سليم : هذا ما يوكل خبز .... انتظر اخوانك.
سمر : يبين انتم ما موافقين .. على نادر
سليم : اولا اسمع اخوانك اش يقولون على نادر ... وأحب اتعرف عليه ..
اخلاص :كلامك صحيح .... نتعرف ونسأل ونتأكد ...
سمر : موافقتكم بوخا .
اخلاص : بوخا تأخذ دماغك ام لسان طويل.
سليم :لك فهميني غير نعرف ... من هو ... امشي من قدامي ...لا اهفك بعجل اقعد شهر بالبيت.
سمر : بوخا ...
• تخرج سمر من المسرح
اخلاص : يبين هذا نادر امكدي و خنجغو بحزيمو.
سليم : راح يجننوني ... وين كان ايام زمان هل السوالف ... توتير ..تشتغل خطابة.
اخلاص : هو توتير ذكر ..لو انثى.
سليم : لك انتِ قفلت يمك مو قالت موقع تواصل اجتماعي .
طرق على الباب يفتح الباب سليم
• تدخل سحر للمسرح تحمل حقيبة صغيرة وهي تبكي تجلس على الكرسي .
سليم : ها بنتي سحر خير شنو الموضوع .
اخلاص : ليش تبكين وهاي الجنطة شني معك .
سحر :بابا طلقني ... طلقني .. ما اريد ارجع لبيت حسيب
سليم : تردين تطلقين من حبيب القلب ...بلا عقل ...ليش الطلاق لعب عجاية .. انت متزوجة من اللي حبيته يعني لو يطلع جدك العاشر من القبر ما راح اوافق.
اخلاص : لا تصير عصبي خل نفهم شنو الموضوع .
سحر : ما اريده ولا اقدر بعد اباوع بوجه امه ...امه تدخل في حياتنا .
سليم : ليش يابا ... كنتم دهن وعسل ... على غفلة وصلت للطلاق.
اخلاص : حسدوها .. ضربتها عين .. شعلت ابو اللي خلفها .
سليم : هاي من امتى ام نادر صارت تدخل في حياتكم ... مو كانت وردة .
سحر : شبعني راشديات بسببها ونتف شعري.
اخلاص : اويلي عليك بنتي يعني ضربك راشديات
سليم : السبب شنو
سحر : حسيب اشترى كيلو لحم غنم .. وقال لي اطبخي باميا ... مشتهي تشريب ... طبخت الباميا وحضرتها وكنت انتظره يرجع من الشغل حتى اصب له التشريب .. اجا ... صبيت له ما كان اكو لحم بالجدر
اخلاص : وين راح اللحم ... ذاب بالطبخ .. لو طار
سحر : سألني وين اللحم قلت ما اعرف .. امه غمزت بعينا ..افتهم انه انا اكلت اللحم واشتغلت رحمة الله من راشديات ومسبة وجر شعر.
سليم :: اللحم وين صار.
سحر : امه اكلت ... كيلو لحم اكلت.
اخلاص: ينعوج حلقها .. يزيد عدها ضغط الدم والدهن يسد شرايين قلبها.
سحر : ان شاء الله ...
سليم : ام حسيب اكلت كيلو لحم ... والعظام بقوا بالجدر لو همينا اكلتهم.
سحر : انا اعرف وين اخذتهم ... طلقني بابا.
سليم : إذا قلتبها مرة لخ .. راح احفك بكف تبقين طول عمرك ما تنسيه .. سوء فهم ينحل بالحوار والنقاش بينكم عيب هذا الكلام امه اكلت اللحم ..تردين تطلقين .
اخلاص : ادخلي بنتي استراحي .. موضوعك سهل جدا ... وشيلي من بالك فكرة طلقني انا وأبوكِ نحل هذه المشكلة
• تدخل سحر للداخل
سليم : غدا انا اروح لبيت حسيب . واحل هذه المشكلة السخيفة .
اخلاص :أنا ما اقبل يمد ايده على بنتي.
سليم : قدامنا مشكلة سمر ...
• يدخل دريد يحمل ورقة بيده
دريد : مساء الخير .
سليم : (بانفعال ) الحمد الله على السلامة... مساء الخيرات والبركات ...
اخلاص : أخوك ليش ما معك .
دريد : ماما .... اخي بعد ما كمل جمع المعلومات ..
اخلاص : من الصبح طالعين انتَ وأخوك وما قدرتم تجمعون معلومات عن عائلة نادر ...
سليم : تفضل سمعنا اش عرفتم عن نادر .
دريد : ابدا ما كانت المهمة سهلة ...
سليم : ان شاء الله جمعتم معلومات مفيدة .
اخلاص : لك احكي خل نعرف اصل وفصل العائلة قبل ما يجون ....
دريد : ابي .... امي..... انا وأخي غسان قسمنا المهمة ... انا جمعت المعلومات عن شخصية نادر ... وأخي جمع معلومات عن فصله واصله ونسبه .
سليم : خوش لحد الان ممتاز .. تفضل قول المعلومات اللي عندك .
دريد : التكنولوجيا سهلت علينا كل الامور وبسطتها أني بعثت لكل اصدقاء نادر رسائل يعني مسجات سألتهم عن اخلاقه وشخصيته ...واستلمت عدد كبير من الاجوبة ، وكذلك سويت صفحة على الفيسبوك باسم نادر يريد يتزوج .. واستلمت الاجوبة والتعليقات .
اخلاص : ابني دريد شلعت قلبي من الله يطول عمرك ... قول اللي عندك . الله يعدل دماغك .
دريد : (يفتح ورقة طويلة مدون عليها المسجات) اقرأ لكم مسجات اصدقائه وصديقاته يمكنكم تعرفون شخصيته نادر الذي سيتقدم لخطوبة اختي سمر ... ام ميسر هذه جارتهم: تقول ... حبك نادر يبعد الروح سوالي جلطة اركب سيارتي العتيقة كل يوم حسبالي بطة.
سليم : هذه ام ميسر جارتهم هي تقول... بعد كمل .
دريد : هي متزوجة لكن معجبة ... لعد سعاد اخت ام ميسر عندها تغريدة على تويتر ...نادر ... لو مات شرشبيل وهرهور ومابقى من السنافر ولا سنفور اظل احبك يا امور.....
سليم : وهذا توتير اش دخله بالنص ..
دريد : يعني ما تعرف توتير ... ما متعرف عليه.
اخلاص : يول قول جملة مفيدة ما عليك بهذا اللي اسمه توتير.
دريد : ماما لا تستعجلين .. هذه صديقة اخرى تقول ما انساك يا نادر لو الدنيا تصير سراب و أبوك يبيع كباب وأمك تلبس قبقاب ...
سليم : اخلاص ... هذا ابنك دريد تخبل ... تحفة ... حمار اللي ما يخليك بمتحف الشمع .
دريد : شكرا بابا ... ولهذا ما خليتني بالمتحف.
اخلاص : دريد اروح لك فدوه بس فهمني لوين تريد توصل.
دريد : بنت عمه تقول ..لا تظن لحظات فراقك في قلبي تمر بسهولة امنيتي ان تصاب بفشل كلوي حتى اثبت لك حبي وأتبرع لك بكليتي ..
سليم : ما افتهمت اي شيء.
دريد : هذه مشكلتك اني وصلت لك الافكار .
سليم : قول ابوي ما يفهم ... دماغ سس .
دريد : حاشاك بابا .. العمر له دور ... هذه صديق اخر اسمه مشمش : يمكن اسم مستعار كاتب كومنت على الفيسبوك ... ردت انه ويه الطير ابعث تحيه وسلام ومحبة تعذر وكال الطير فلاونزه بيه !
سليم : اخلاص .... ابنك عطينانو وج بقى يغيدلو بطاني .
اخلاص : دريد ابني تقدر ترجم ما قلت.
دريد :ماما انا ما مشتغل مترجم هذه المعلومات الي طلبتموها مني جبتها لكم ... اسمع صديقه هاي ساكنة بالطابق الرابع : تقول احبك لو صرت ارنب احبك لو صرت زرزور احبك لو صرت بطة وبيك افلاونزة الطيور.
صديقة اخرى : سنكل سفن بنياش حشحش تماني ... يعني انا احبك حيل بالتركماني . هذه صديقته من تركيا ....
سليم : لك دريد ... ابوس ايدك ... اعطيني جملة مفيدة
دريد : نادر خطب راح وراحة اياما ..... نسى سعاد ونجاح وداني وحنانا ..... ورشا وهديل وياهم جمانا
طفرت تراه الروح بشرب استكانا ..... ها خوتي هاا ..... نادر نريده ونتذكر اياما اسكت يالشامت
هذوله صديقاته كانوا متظاهرين عند حقوق الانسان (يقدمها مثل الهوسة العربية).
سليم : اخلاص هذا ابنك شلون تعالجي .
اخلاص : جيب ليل واخذ عتابة . خذه للطبيب
سليم : عندك كلام تضيفه ..
دريد : نعم اقدر اضيف .. هذا شعر كاتبة وحدة تحبه وحاليا تفتر بالشوارع .. يعني صار بيها شخطة .. ضربتني بعينيك سهما فتاكا……فمر السهم من فوق رأسي وتعلق بالشباكا ... فقال لي يا حبيبتي رأيتك في الامس تجلبين المسواكا ... فقلت له هذه اختي من عما العماكا ... فسال دمعي على خدي كلبوري المفتوح ولن اجد سباكا ... انتم تأكلون من التمن وأنا اكل من الحكاكا .
سليم : اشكرك ابني ..على تعبك بجمع المعلومات ... تقريبا اني فهمت ما هي شخصية نادر.
دريد : بابا .. مصاريف هذه المهمة كلفت عليك مائة وخمسون دولار .
سليم : تمشي من قدامي لو انعل ابو ابوك.
• يدخل غسان : السلام عليكم
سليم وإخلاص : وعليك السلام .
اخلاص : ان شاء الله جمعت معلومات نستفاد منها .
غسان : مختصر مفيد ... بعد تفكير طويل يمكن ساعتين قررت اروح لعند ابو اسحق ... سألته عن نادر ... قال تروح عند المختار أبو مفيد يفيدك احسن مني .. صدق فرحت كثير ... ورحت دقيت الباب ... فتح الباب .. طلعت بنت المختار .. اش اشوف قمر اربعطعش تضوي .. افترت الدنيا بغاسي ... دخليك بابا تروح تخطب لي بنت المختار .
سليم : ابني غسان اوصلت للمختار أبو مفيد سألت عن نادر .
غسان : بابا وبنت المختار.
سليم : بقبر ابوك لا تخليني اسبك واسب المختار .. سألت على نادر.
غسان: نعم بابا ... سألت المختار عن الاصل والنسب لنادر .. قال اللي اعرفه نادر يعود اصله الى للإنسان ونسبه يعود الى ادم وفصيلة دمه o .
اخلاص : عمت عين اللي خلفك ... هذا اللي اقدرت تعرفه من المختار
غسان : بابا اموت على بنت المختار ..
اخلاص : احترم ابوك ... عيب قدامه تحكي خشن .
غسان : يعني عيب واحد يعبر عن شعوره
سليم : يول.. راح انجلط من وراكم ...
غسان : بابا اجلها الجلطة بعد ما تخطبت لي بنت المختار ، انجلط توكل على الله ما عندي مشكلة .
سليم : اعطوني جملة مفيدة ... نادر ... يصلح زوج لأختكم.
غسان : بابا ... المختار قال :..هذا نادر اكبر لوتي .. تكه ماكو .. وسد الباب بوجهي .. انا ما عرفت اش معنى لوتي ولا تكه ماكو ..فرحت على معلم العربية استاذ فيصل تعرفه هذا بيتو يم بيت عمي.
سالت استاذ فيصل اش معنى كلمة لوتي قال ...كلمة عامية من الانجليزية وهي مأخوذة من كلمة لوت معناها المال المسروق ، يعني باختصار نصّاب
سليم : انت تحفة .. انت عبقري ابن عبقري .
غسان : وبعدين سألته تكه ماكو معنها شنو : استاذ فيصل قال يعني ما يحب تكة اللحم المشوي .. يمكن يحب تكة الدجاج المشوي بالفرن ....
دريد : أدعليك من كل كلبي يفتحها بوجهك قوطيه ببسي مخضوضه
غسان : ليش ... تدعي لي بالسوء.
دريد : ابوك كلفك تجيب معلومات عن نادر رحت وقعت بحب بنت المختار
سليم : تيتي تيتي مثل ما غحتي جيتي ؟؟ انتم الاثنين بلا عقل.
دريد : ورائة بابا !!
سليم : اشكروا امكم على هذه التربية .
دريد : غسان .. قل لي المختار عنده بنت احتياط يعني بنت اضافة.
غسان : كل البنات حلوين بس بنت المختار لها ميزة ...دخلت القلب وما تحتاج فيزة.
اخلاص : يول ... من حب عبدي عبدا ومن حب عقوقا عبد الشط ...
غسان : يوم قلبي يخفق.
سليم : اخلاص افتهمتي شيء .. شلون راح تزوجين بنتك .
اخلاص : على جية هذا المكدي ..
دريد : انا انصحكم تسمعون اش يقول وتأخذون القرار.
سليم : لك اعتمد عليكم تجيبون لي معلومة استفاد منها ...امري الله .
غسان : تريد انروح مرة لخ نسأل على عائلة نادر .
سليم : اريد تمشون من قدامي .
يدخل غسان ودريد للداخل
اخلاص : والحل شنو ...
سليم : اني راح اتعرف عليه .
• صوت جرس الباب يتجه سليم ويفتح الباب يدخل نادر للمسرح مع سليم
نادر : مساء الخير
سليم وإخلاص: مساء النور
اخلاص : اهلا وسهلا .. تشرفنا بخطيب بنتي
سليم : باستغراب اشو وحدك ... لعد الوالد والوالدة وينهم .
نادر : تريد الصراحة عمي ... ابوي وقف تاكسي .. سأله بيش توصلنا لبيت عمي سليم قال له خمسة الاف دينار ... ابوي سأله لعد بيش توصل ابني نادر .. قال له ببلاش .. ابوي قال له وصل ابني بس . ... فأنا جيت وبعد اشويا يصلون .
اخلاص: ابو دريد ... أحد يطيق يحصل من الاقغع شعغاي ؟ اذا اولها هل الشكل لعد تاليها .
نادر : عمتي اخلاص ... اعرف الزواج اولو عسل وتالينو بصل ... لكن انا قررت يكون البصل اولا ونترك العسل للأخير ..
سليم :شنو انت ... من عبقري ... تفضل استريح ابني ...على ما يجون اهلك ...
نادر : ما راح يتأخرون ..بس ابوي يمر على البنك ويجيء .
اخلاص : اكو بنك مفتوح بهذا الليل .
نادر : ابوي حط فلوسه بالبنك .. يوميه بالليل يمر ويدك باب البنك يخاف لينام الحارس .
سليم : لك ابني نادر وين اكو حراس كدام البنك كلها كاميرات.
نادر : صدقني عمي هذا اللي اعرفه لازم بالليل يتأكد من باب البنك مسدود .
اخلاص : ما علينا موضوع البنك ... ابني نادر لويش منزل رقبتك لا تخجل انت بيت عمك .
نادر :اعرف عمتي ... اخاف ياخة القميص تتوسخ .
اخلاص : دق تلفون لأبوك ..يستعجل اشويه .
نادر : اعطيني تلفونك ...
سليم : ليش ما تستعمل تلفونك
نادر: انا ما عندي شغل مع اهلي اعرف راح يجون ...انتم تردون تخابرون فتكون على حسابكم.
اخلاص : صدقة الله ... يحرسك من الحساد .
نادر : شكرا
سليم : أسألك سؤال .. وأريد منك اجابة صريحة قبل ما يصل ابوك وأمك.
نادر : تفضل عمي
سليم : انت تحب بنتي سمر .
نادر : عمي ابو دريد ..تخيل حديقة بدون حشيش، وكبه برغل بدون جريش، ودجاجه بدون ريش، واني بدون سمر شلون اعيش .
اخلاص : تعجبني افكارك ..مشاريعك بعد الزواج شني
نادر : احتمال نروح لسويسرا الصيف الجاي ، اشتري عطور لسمر من تناغرا.
سليم : ما عرفت شنو اختصاصك يعني درست كلية ...
نادر :انا اختصاصي ... نادر على اسمي
اخلاص : نادر ... عمك سليم يقصد اش تشتغل ...
نادر : صدقني عمي سليم ... اش ما امسك تتطير بركته ....يعني اذا امسك الذهب بيدي يقلب تراب ... فقررت اشتغل شغل ما امسكه حتى لا تتطير البركة ولا ينقلب تراب .
سليم : استاذ الما يعرف يرقص يقول الارض عوجا اش راح تشتغل، حتى تقدر تزوج وتكون بيت ويكون عندك زوجة ...
نادر : راح اشتغل مطرب ... شغلة نظيفة مرتبة على اربعة وعشرين قيراط ذهب ...
سليم : انت اش فهمك بالمقدمات حتى تدخل عالم الطرب ... اش معلّم الجحش بأكل النعناع .
نادر : مقبولة منك عمي اصبر عالحصرم تاكله عنب ... اول سيدي راح ينزل بعشرة مليون نسخة يعني على دولار صار عدنا عشرة مليون هذا بالموسم الواحد .
سليم : طلعت هذه المواسم مالتك
اخلاص : نادر مد غجلك على قد بساطك . ...انت نيم و غجلينك بالشمس .
نادر : لا خالتي اخلاص انتظرني جيبي ليل واخذي عتابة .
اخلاص : نادر اقعد اعوج و احكي عدل . سامع المثل اللي يقول صام صام وفطر على معلاق.
نادر : تردين احلف لك .....
سليم : لا يا استاذ ما يحتاج تحلف ¸....المايجي معاك تعال معانو .
اخلاص : أبني شغله المطرب ما تدخل بدماغي انت شغلك شنو
نادر : عمتي مطرب مو مطربة ولا راح ارقص ..اش تحب تسمع مقام ..عتابة ..موال ... ربابة ..... نشيد
اخلاص : نادر .... الما عندو فلس ما يسوى فلس .مطرب فد مرة
نادر : مطرب ... محترف
سليم : اتقلو كبب ايقلك افغدي. انت مُصر على شغل المطرب
نادر : نعم عمي .. راح اسمعك اغنية ... ترفع مشاعرك لفوق ...اسمع هذه الاغنية (ياقضيب البان احفظلي حميتي لأطبخ الكشكا واغلق باب بيتي ) ها عمتي اخلاص بس تجين عندنا للبيت نطبخ لك الكشكا
اخلاص : بالعافية نادر بش هذه الاغنية ما راح اطعمك خبز .
نادر : اسمع (صاح القطار قومي انزلي كن وصلنا حمام علي دطلع على تل السبت معاي هرجي وكم بنت )
سليم : قمت تشطح اول.... تريد تعيش بنتي بهذه القشمرة مالتك ... منو راح يسمعك اذا كل الاغاني موجودة على الانترنيت
نادر : لعد اسمع هذه الاغنية
سليم : لك لا تخليني اضربك مائة كف واعدل دماغك .واطلعك من البيت . جاين تخطب بنتي لو تغني لي
نادر : بس اسمع هذه الاغنية إذا ما قمت تهز كتف انا راح اترك الفن.
اخلاص : سمعنا اش تريد تغني
نادر : عمتي اخلاص امسكي اعصابك ... شوف راح اوقف على المسرح وأبد اغني ... هذه الاغنية لخاطر سمر سموره
موسيقى اغنية ( سمر ..سمر لرضا علي). مقطع يحدده المخرج
نسمع صوت الباب
تتجه اخلاص نحو الباب
• تدخل اديبة (ام نادر) :
اخلاص : تفضلي ....
تدخل اديبة وبعصبية تتهجم على نادر وتوقفه عن الغناء وتضربه على رقبته تقف الموسيقى
اديبة : انفجع ابو اللي خلفك ، وقت الاغاني.
اديبة : مرحبا يا جماعة (تعبة وتلهث) اسفة .
الجميع : مرحبا
نادر : ماما ابويا وينوا ليش مع معك.
اديبة : لا تخليني اسب ابوك ...
سليم : يا ستار ليش صار بينكم مشكلة .
اخلاص : عين الشمس ما تتغطا بغوبيل ... قولها عيني قبل ما اندوس تختة چرگ.
اديبة : انتم ليش رحتم لبيعد .. خليل قل لي اركبي تاكسي وروحي لبيت سليم ابو سمر كنتي .. وأنا جاي وراكي .. بس اشوف باب البنك مسدود .. أنا هم وقفت انتظر تاكسي واسمع واحد يقول لي ..هذا الحلو ليش واقف ..يا عسل .انت يا جميل . انا بصراحة خفت وقمت امشي سريع وهذا الرجل خلفي يعلق ويسمعني كلام ..اوصلت لباب بيتكم ..اشو يقلي اديبة ليش خائفة انا خليل كنت خلفك ..بعد اشتردين وفرت فلوس التاكسي ..
نادر : هاي سوالف بابا ... قحي ... تعصروه ما يطلع منه فلس رزيل .
اديبة : إول احترم ابوك.
اخلاص : عيني ام نادر الديك يموت وعينو على المزبلة .
نادر : عمي سليم فد يوم قعد ابوي من النوم يقول أصير غبي وأثول لو انام مره لخ قتولوا ليش، بابا قال حلمت موزع
فلوسي على الفقراء .
اديبة : خل يجيء ابوك يربيك.
اخلاص : عيني اليحكي الحق طاقيتو منقوبي .
اديبة : اختي ... الحكي ما يخلص .... عروستنا وينا نريد نتعرف عليها
اخلاص : سليم تشير بيدها
• ( يخرج سليم لخارج المسرح )
سليم : ادخن جيكارة وابعث لكم البنات .
اخلاص : نادر .. ما عرفت من يا كلية تخرجت .
نادر : من كنتُ بالكلية ... كان عدنا استاذ كل يوم يتريك لفة فلافل وعنبة وبصل ضوجني كثير ، ومن يشرح الدرس من ورى خشمة ، ولمن يعطيني درجة مو صمط جدي . انا على عناده تركت الكلية.
اديبة : تصوري هلكد كان ابني شاطر المدرس كان يغار منو .
اخلاص : قررت تشتغل مطرب .
نادر : احسن شغلة كلها ارباح ... اش ما اغني السكارى يرقصون ولا يعرفون اش اقول.
اخلاص : صدقة الله على هل الطول ...انت تججن .. بنتي راح تكون بنعيم .
اديبة : راح اشيلها بعيوني .
صوت الجرس
اديبة : هذا خليل
نادر : عمتي اخلاص ... انا افتح الباب (نادر يفتح الباب)
• يدخل خليل الى المسرح
اديبة : ما تأخرت خليل .
خليل : خابرت الصديق طمتن على صحته.
اخلاص : يمعود توكل على الله المهم باب البنك مسدود وأمين .
خليل : اسب اللي قال انا رحت على البنك ...
اديبة : خليل ..
نادر : بابا ..علينا تريد تعبرها علينا . اصلا ما تنام اذا ما تتأكد .
خليل :سد حلقك لا اهفك بكف اقلب جهرتك .. تريد تفضحنا ....لك حمار راح يطلبون الف طلب .(يوجه كلامه الى اخلاص ) ام دريد تعرفين ابو الحلويات اللي يم البنك نتله الكهرب فدقيت له تلفون سلمت عليه ، لو كنت اتروح كان اتأخر عليكم .
اخلاص : سلامة راس صديقك المهم بابه مسدود .
خليل : ( يأخذ اديبة لمسافة بعيدة )كملتِ الفحص تأكدت من سلامة البنت . يعني البنت ناجحة.
اديبة : لا تستعجل ابوها راح يصيحها وطمس بعد ما طلع .
خليل : اشوف ابو دريد ما اكو
اخلاص :ابو دريد واقف بالحديقة يدخن جيكارة ويجيء مع البنات ,
خليل :الله ما اكو اطيب من التدخين .. تصوري من كنت شاب ادخن ولحد الان ، عندي جيكارة عمرها اكثر عشرين سنة كل يوم اشتم ريحتها ثلاث اربع مرات وأرجعها بالباكيت .
نادر : الجيكارة كان جدي يشمشما وأبوي ورثها منه .
خليل : لك بهذا العقل تريد تتزوج ... ما تعرف تضم سر ...
• يدخل سليم مع البنات الثلاثة (عندما تدخل البنات سحر ، قمر ، سمر)
يتصافح خليل مع سليم
سليم : يا اهلا وسهلا شرفتنا
خليل : اهلا ابو دريد ...(يتحول نحو سحر ) ما شاء الله ، والله عرفت تختار نادر (يتصافح ويحضن سحر)
اديبة : اسم الله على الحسن والجمال ...ما شاء الله مطبطبي ومرتبي ما ينراد لها مصاريف (تحضن سحر)
نادر : يوم... يابا لي ورا اشويه
خليل : لك ليش تبقى بلا عقل دخلي امك تشوف شغلها .
سحر : مو أنا سمر ,,انا اختها .
اخلاص : هي بنتي سحر عين الحسود بيها عود، متزوجي وحماتها تموت عليها ... هذه سمر اللي يريد ابنكم يخطبها
اديبة : خليل ..معقولة ابني يقتنع بوحدة جلد عظم ( يتحاوران بينهما خليل وإخلاص )
خليل :اعرفه اثول ... تعال اصرف عليها حتى تسمن .
نادر : بابا شنو الموضوع .
خليل : ابو دريد بنتك سمر تعمل ريجيم لو انتم ماسكين عليها الاكل .
سليم : انت تريد تشتري بقرة لو تزوج ابنك.
خليل : اغاتي البنت ضعيفة غير نتأكد من صحتها .
سمر : نادر هذا الكلام ما يعجبني شنو ضعيفة ..قول رشيقة.
خليل : اكو فرق بنتي بين الرشيقة والضعيفة.
قمر : اسويلكم قهوة .
اخلاص : لا بنتي ما يحتاج لان ما راح ينامون بالليل.
نادر : بابا هذه اللي انا اختاريتها .
اديبة : خليل اذا القاضي راضي سخمان وجنا شنو ، جلد عظم .
خليل : اسمع نادر إذا ما نجحت بالفحص ما كو زواج ... اديبة شوفي شغلك.
سليم :تعال فهمني شنو موضوعكم .
خليل : اكو واحد يشتري سمك بالشط ، لو قدام العين .
سليم : لك لا تجنني ... يا سمك يا جلد عظم .
خليل : انتظر دقائق ونعطيك النتيجة .
اديبة : (تسقط دنبوس على الارض) تعالي بنتي ... هذا الدنبوس وقع مني تقدرين تلقيه ...( تبحث سمر عن الدنبوس)
اخلاص : اسمعي كلام.
سمر :( تبحث عنه فترة )
قمر : على اليمين عند رجلك.
سحر : عند الرجل اليسرى .
سمر : تفضلي خاله هذا الدنبوس
اديبة : شكرا خاله ...خليل ... ستة على تسعة النظر بلا نظارات .
خليل : بنتك تلبس نظارات.
اخلاص : لا ..
نادر : يابا لا تعمل لنا حسبي النظارات انا اشتريها .
خليل : لك شلون تزوج وحدة نظرها ضعيف عثرت وقعت .. هذا تقصير من الاهل.
سليم : متفهمي انت لوين تريد توصل ... تفضلوا ما عدنا بنت للزواج .
خليل : انت ليش معصب ... من تشتري حاجة من السوق غير تتأكد من النوعية والمنشأ.
سليم : تريد كرانتي ...
سمر : بس انا نظري زين .
سحر : وركي حماتي اللي اكلت اللحم وأكلت كم راشدي من حسيب ما عملت مثل ام نادر.
قمر : الله يساعدك اختي ... كثير مقهورة عليكِ.
اديبة :( تمسك يد سمر وتفرك الجلد ) (تقرب من خليل) تعالي بنتي جلد طبيعي بدون كريمات ولا اكزيما
اخلاص : الله طول يا روح ... كافي بعد ...
اديبة : ام دريد .. اختي ليش زعلاني راح تكون عشرة عمر (تسحب شعر سمر) :
سمر :( تصرخ)
اديبة : مضبوط شعر طبيعي بدون باروكة
تخرج اديبة تفاحة من حقيبة يدها وتعطيها لسمر وتطلب منها عضها ثم تأخذها وتنظر اليها كأنها تقرا فنجان
أديبة : سن يحتاج حشو ، اثنان مسوسين ، وتحتاج لسن صناعي.
خليل: نادر فوقها طلع اسنانها تحتاج تعير.
نادر: بابا بسيطة ، انا اصرف على السنون.
خليل :( يسحب اديبة مسافة) القرار الاخير .
اديبة : ناجحة بالفحص مع النظارات وتصليح الاسنان
سليم : ترى وصلت لرأس خشمي ....
خليل : تفضل استريح ... ابو دريد ..عادات وتقاليد موروثة عن الاجداد ... يشرفنا ان نأخذ بنتكم لابني نادر .
سليم : الجواب عند البنت والقرار يعود لها.
اخلاص : بنتي سمر ..انت موافقة على على هذا الطلب
قمر : اضربيهم بوري وقولي ما اريد.
اديبة : البنت ساكتة خجلانه يعني موافقة .
سليم : بنتي موافقة ..
سمر : تهز رأسها
خليل : مبروك بنتي سمر ...
• وتدخل البنات الثلاثة للداخل
اخلاص : خجلت
نادر : (ينهض ويهز كتف ) عمي تريد اغني لك .
خليل : اقعد لا تصير بلا عقل.
سليم : اخلاص كنا بوحدي صرنا بأثنين .
اديبة : راح اخليها بعيوني .
اخلاص : الحمي اذا حبت الكني ابليس يدخل الجني
خليل : ممكن نحدد موعد النيشان .
اخلاص : قبل الموعد غير نتفق اش راح تقدمون لها
اديبة : تفضلي . انت امري وإحنا ننفذ.
خليل : اديبة بالمواضيع الحساسة انت تسكتين ، أنا اللي يحكي ... تفضلي ام العروس.
اخلاص : تقدمون الها (حجول وقايش وكردانة ومنتشي ومفردات وقاردون وسباح ومغاود ومحيبس)
خليل: قلبي ... خذوني للمستشفى
سليم : سلامتك خليل ...
نادر : ابوي من يسمع كلمة ذهب قلبوا يوجعه ...
خليل : تسكت لو اقوم اعدل دماغك.
اديبة : مو كثير كل هل القطع من الذهب.
اخلاص : تردين يحكون علينا الناس ... ويقولون زوجت بنتا لواحد مكدي وحيفي مطرب ..اول سي دي بمليون نسخة
سليم : اخلاص انا ما تهمني هذه المظاهر .. ولا اريد اخلي زوج بنتي بالديون ... على بساطك مد رجلك .... المهم المحبة تكون بينهم على طول ..
اخلاص : تتوقع راح يكون بينهم محبة والأهل ما يتدخلون بعيشة المتزوجين .
خليل : راح نخليها بعيوننا
نادر : تعيش عمي ابو سمر .... تريد اغني
خليل : أنا وامك راح نغني (موسيقى وأغنية موصلية عفاكِ عفاكِ على الفند اللي عمليته,,, الى اخر الاغنية او يضيف لها المخرج اغنية اخرى يشارك بها خليل واديبة)
تغلق الستارة
المشهد الثاني
حفلة العرس
الديكور :قاعة احتفال لعرس مع كوشة للعرسان مع مناضد وكراسي
على المسرح ( عائلة ابو دريد ، عائلة خليل مع كومبارس اصدقاء )
جالسون الجميع ينتظرون قدوم العرسان مطرب يغني اغاني موصلية
الجميع بملابس جميلة بعض الاصدقاء الذين سيقدمون الدبكة . الحفلة الموسيقية عشرين دقيقة في المنتصف يدخل حسيب وهو زوج سحر في حالة يرثى لها ملابس غير مرتبة بنطلون قصير .
تقف الموسيقى عند وصول حسيب الى منتصف المسرح :
سحر : (تنهض تتهجم عليه بعصبية ) اطلع برا من بيتنا ... انت اش جابك .
حسيب : انا حسيب .... صار لك كم يوم زعلاني .... اولي نسيتني ... هلو عيني اشلونج انتي ان شاء الله زينه
سحر : اطلع من بيت ابوي وروح عند امك اللي من وراها شبعتني راشديات.
حسيب : صدكني سحر مشتاق بس اريد اشوفك ونزلت دموع العين على فراقك .
غسان : ايا با ... صار شاعر .. . رومانسي لو أنت ملاكم برأس البنات.
حسيب : انت وخر ما عليك ..(يوجه كلامه لسحر) يا اجمل من خلق ربي ترى حبك وسط قلبي.
دريد : لك حسيب لا تشطح ... اهفك بكف انزل اسنونك بحلقك .. شنو موضوع الباميا.
حسيب : حرمت اكل الباميا .... قررت المحل اللي يبيع الباميا ما امشي من كداما ....اسب الباميا واللي طبخها
سحر : انا طبختوها تريد تسبني قدام اهلي.
غسان : لسانك طويل .. لا تقول هذه البنت ما عدها احد يقف معها ... ترى احنا موجودين.
اخلاص : اسمع انت اللي اسمك حسيب لعلمك قبل ما تقدم وتزوج بنتي خمسة وأربعين عريس تقدم لها .. اش دكتور واش جراح واش صيدلي واش مهندس .. مو زوجناك بنتنا حتى تصير خادمة لامك وكل ما تسمع كلمة منها جيبها بكف . ﺍﻟﻠﻪ ﻳﺸﻠﻚ ﻭﻳﺴﻠﻚ ﻭﻛﻞ ﺃﻛﻠﻚ ﻳﻘﻠﺐ زقوم .
حسيب : انا ما اريد احلف لان الحلفان خطيئة ... بس قسما بالله العظيم ...توبة .... عمتي اخلاص . خذي اضربني كف ... راشدي ... جلاق .
اخلاص : بلا عمتي بلا بطيخ .. منكد على بنتي عيشها كل يوم صار عصبي على حساب صحتها شوف شلون صارت ضعانة كانها مسوية ريجيم .
حسيب : عمتي اخلاص من يوم اللي زعل كلبي ..كمت امش واحجي مع نفسي .. صدكني حتى رقم الباص كمت اقرا
بالمقلوب ...
دريد : يتهجم عليه دريد وغسان . تطلع لو انطلعك
نادر :( يتقدم بعصبية ) ما قلتي انت شني سالفتك ... اقلولك طلع برا ...
خليل : لك تعال اكعد انت من صخم وجهك وتحط نفسك بالوسط ،يبيع ثكل وسوي نفسك ثكيل .
اديبة : خليل ... ابين الجماعة امورهم فلتنانة هاي اللي عين الحسود بيها عود متزوجي وحماتها تموت عليها .
خليل : اسا ما علينا ننتظر اذا انلاصت بيناتهم نأخذ ابنا ونمشي.
سليم : خليل اشوفك متضايق
خليل : لا ..سلاماتك
غسان : اسا بلشت حالة الكآبة عندي تصعد وراح انفجر ... فوق ما ضربت اختي جاي تخرب عرس سمر
سحر : خل يطلع ما اريد اشوف جهرته ...
حسيب : انت عمي سليم اشوفك ساكت ...
اخلاص : اسمع حسيب ... نصيحة .. دير وجك وامشي.
سليم : انت ليش ضربت سحر ..
حسيب : غلطة . وبعد ما تصير بعد... شوف حالي حتى الجواريب تاهت عليه
سليم : انت تحب سحر ..
حسيب : عمي ابو دريد .... الحب نعمة من الله ... الله محبة ,,, عرفته بعد ما سحر تركت البيت ...
سحر : لا تصدقوا يسمع كلام امه هي ام المشاكل والفتن.
خليل : تسمحون لي بكلمة .. اذا أنت عرفت الحب نعمة من الله ... امك هم عرفته لو بس انت.
حسيب : اكيد عرفت وكانت كل ما تضوج تشاغب بينا.
سليم : المفروض ان تحترم الزوجة .
خليل : الزواج ليس مجرد عقد وحسب وإنما هو عهد.
سليم : الزواج رباط يرتبط فيه امرأة ورجل
حسيب : وعد قدام الكل امي راح تخليها بعينها بعد ما شافت حالتي.
سحر : ما اريد .. طلقني ..
سليم : هذه ثانية مرة اسمعها منك ... وماذا قلتيها مرة لخ راح اقص لسانك لان كلمة ثقيلة لا طلاق عدنا
سحر : الحل شنو
سليم : انت وحسيب ترجعون للبيت تحلون مشاكلكم بالكلام وبالمحبة
خليل : تعال حسيب... انت سحر (يقربهم)
اخلاص : حسيب .. خذ مرتك وشارككم الجميع بنيشان خطوبة سمر .
حسيب : سحر ...
سحر : حسيب
تعزف الموسيقى و تكمل الحفلة مع المطرب والجميع يرقص فرحا والزمن يحدده المخرج.
انتهت بدري نوئيل يوسف
ستار
0 التعليقات:
إرسال تعليق