مسرحية " هنا .. هناك " تأليف مجد يونس احمد
مجلة الفنون المسرحية
 |
| الكاتب مجد يونس احمد |
المشهد الأول
محطة في مكان ما ... هناك بعض الإكسسوارات البسيطة... وقد يكون هناك حاوية فيها بعض الأغراض المسرحية التي سيتم استخدامها أثناء سير العرض , وسنأتي على ذكرها لاحقا ضمن السياق ..هناك رجل يجلس في المكان بصمت , هادئ بحيث وفي كثير من الأحيان لا نلحظ وجوده يجلس فوق حقيبة سفر ..
يدخل الرجل وهو يحمل حقيبته مسرعاً تلحق به المرأة وهما يكملان حديثاً كان قد بدأ قبل دخولهما الى المنصة ..
المرأة
الله يخليك لا تروح !
الرجل
لازم روح لازم روح ..
المرأة
بدك تروح ؟
الرجل
إي بدي روح ..
المرأة
خود روحي بس لاتروح !
الرجل
خلص تعبت ..لازم روح ..
المرأة
بدك تروح ؟
الرجل
لازم روح ياروحي لأني إذا مارحت كل شي بيروح ... فالأفضل إني روح منشان كل شي ما يروح ..
المرأة
إذا أنت رحت أنا لوين بروح ؟
الرجل
منشان ما تروحي أنا رح روح ..
المرأة
خليك لا تروح ؟
الرجل
إذا ما رحت روحي بتروح ,بترووووووح ..
المرأة
طيب ..روح ..
الرجل
رح روح ..
المرأة
لوين بدك تروح ..
الرجل
( لا يجيب ) ..
المرأة
( تشدد على الكلمات ) لوين بدك تروح ؟
الرجل
( لا يجيب ) ..
المرأة
( تصرخ ) لوين بدك تروح ؟
الرجل
لـ هونيك .." صمت "
المرأة
( باستغراب ) لـ هونيك ؟
الرجل
إي لـ هونيك..
المرأة
وهون ؟
الرجل
هون ؟1؟
المرأة
إي هون , بعدين هون متل هونيك !!!
الرجل
لو كان هون متل هونيك ما كنت بترك هون وبروح لـ هونيك !!
المرأة
هون أحسن من هونيك !!
الرجل
بيجوز بس أنا لازم روح مشان شوف أنا إذا كان هون أحسن من هونيك ..
المرأة
مارح تلاقي فرق بين هون وهونيك !!
الرجل
في فرق كبير بين هون وهونيك ..
المرأة
وشو الفرق ؟
الرجل
الوقت ..(صمت )
المرأة
يعني وقت هون غير وقت هونيك ؟
الرجل
طبعاً .. الوقت هون أربعة وعشرين ساعة ..
المرأة
وهونيك ؟
الرجل
هونيك ؟!! الوقت بيطلعلوا شي 96 ساعة وكم دقيقة ..
المرأة
مستحيل ؟
الرجل
كذبة ..
المرأة
مستحيل ..
الرجل
وهم ..
المرأة
مستحيل ..
الرجل
خرافة ..
المرأة
إي روح ..
الرجل
إي رايح ...
المشهد الثاني
( صمت لبعض الوقت , يحمل الرجل حقيبته ويسير .. يقف بالقرب من الرجل الذي يجلس فوق حقيبته الى جانب عامود الكهرباء والذي علق عليه فانوس مكسور.. الرجل مازال ينظر الى المرأة التي تتابعه بنظرها غير مصدقة , وكأنها تفكر في أمر ما .. تخطو باتجاهه ومن تتراجع , تكرر فعلها عدة مرات .. تخفت عليها الإضاءة , لتبقى على الرجلين :
الرجل الأول
مرحبا ؟!!( الرجل الثاني لا يجيب...يدخن....ملامحه هادئة,يكرر الرجل إلقاء التحية ) مرحبا...
الرجل الثاني
( ينظر إليه بهدوء واتزان, يبتسم ابتسامة ) أهلين !!
الرجل الأول
حضرتك صرلك زمان ناطر هون ؟
الرجل الثاني
إيه من زمان وأنا ناطر هون ؟
الرجل الأول
من إيمت وأنت ناطر هون ؟
الرجل الثاني
يمكن كل عمري وأنا ناطر هون...
الرجل الأول
ولإيمت بدك تضل ناطرهون ؟
الرجل الثاني
رح ضل ناطر هون لحتى يجي وياخدني معو من هون ..
الرجل الأول
وهوي مطول ليجي لهون ؟
الرجل الثاني
مابعرف...يمكن هوي إجى لهون بس أنا ماكنت وصلت لهون.. ويمكن لسّه ما إجى لهون.. ووقتها أنا فيني روح معو من هون ..
الرجل الأول
لوين بدك تروح معو إذا هوي إجى لهون ؟
الرجل الثاني
لـ هونيك !!!
الرجل الأول
أنت كمان رايح لـ هونيك ؟!!!!
الرجل الثاني
الكل بدو يروح لـ هونيك ؟
الرجل الأول
شوفيه هونيك لحتى الكل بدو يترك هون ويروح لـ هونيك ؟
الرجل الثاني
أنا رايح لـ هونيك لحتى أعرف , بس روح لـهونيك بعرف شو فيه !!
الرجل الأول
أنت متأكد أنو الكل بدو يروح لـ هونيك ؟
الرجل الثاني
طبعاً .. أنت بتعرف ليش رايح لـ هونيك ؟
الرجل الأول
طبعاً أنا بعرف , أنت قلي , ليش بدك تترك هون وتروح لـ هونيك ؟
الرجل الثاني
قلتلك الكل لازم يروح , وأنا من هالكل , منشان هيك لازم روح..
الرجل الأول
هيي حاولِت كتير تقنعني إني ضل هون .. بس أنا راسي يابس مارح اقتنع .. بعرف حالي راسي متل التور.. أنا قررت إني روح من هون لـ هونيك ..
الرجل الثاني
وليش ما بتضل هون ؟
الرجل الأول
لأني ماني قدران ضل هون .. حاولت كتير بس فشلت إني ضل هون .. منشان هيك لازم روح لـ هونيك..
الرجل الثاني
لازم , فعلاً لازم ..
الرجل الأول
هلق هون غير هونيك ؟
الرجل الثاني
بيقولوا أنو هونيك غير هون ..
الرجل الأول
منشان هيك بدك تترك هون وتروح لـ هونيك ؟
الرجل الثاني
بيجوز يكون هون أفضل من هونيك , وبيجوز يكون هونيك أفضل من هون ..
الرجل الأول
وكيف لازم نعرف أنو هون أفضل من هونيك , أو هونيك أفضل من هون ؟
الرجل الثاني
يلي راحوا قبلنا من هون لـ هونيك , مارجعوا .. ويلي ضلوا ؛ 95% منون مو حابين يروحوا لـ هونيك .. وماحدا بيعرف إذا كان هون أفضل من هونيك , أو هونيك أفضل من هون , هي معادلة صعبة الحل , وإذا انحلت هالمعادلة مارح يضل شي إلو معنى لا هون ولا هونيك ..
الرجل الأول
" وكأنه يخاطب نفسه ويحاول أن يفهم ويمنطق الأمور " إذا كان هون أفضل من هونيك , فليش يلي راحوا لـ هونيك مارجعوا ؟!! يعني هني ضلوا هونيك ؟!! معناتها يلي راحوا بيعرفوا إذا كان هون أفضل من هونيك !! أو هونيك أفضل من هون ؟!! و يلي بيحير أنو يلي هون مستحيل يعرفوا إذا كان هونيك أفضل من هون , وبيجوز يكون هون هوي هونيك يعني أنا هلق هونيك .. وبيجوز يكون هونيك هوي هون , يعني أنا هلق هون !! وبيجوز يكون هونيك هون أو هون هونيك.. كيف لازم نعرفو وين هون ووين هونيك ؟
الرجل الثاني
قعود استنى معي , وبس يجي هوي منروح معو لـ هونيك .. ووقتها منعرف إذا كان هون أفضل من هونيك .. أو هونيك أفضل من هون .. ومنعرف اذا كان هون هوي هونيك أو هونيك هوي هون..
الرجل الأول
بس إذا رحنا معو لـ هونيك وتركنا هون رح يصير هونيك بالنسبة إلنا هوي هون!! وهون رح يصير هونيك !! وخايف إذا رحنا من هون لـ هونيك مانقدر نرجع لهون , وهيك رح يضيع علينا هون وهونيك ..
الرجل الثاني
مابقدر أحكي لحتى روح لـ هونيك ..
الرجل الأول
أنت متأكد أنو رح يجي لهون ؟
الرجل الثاني
مافي شي بيقدر الواحد يتأكد منو بها الزمن .. ولو كان كل شي هون متأكد من كل شي , ما كان في حدا رح يترك هون ويروح لـ هونيك ..لأنو ما بيقدر ياخد معو شي لـ هونيك ..
الرجل الأول
رح أقعد معك واستنى هون , بلكي بيجي ( صمت قصير) قولتك ممكن يجي ؟!؟
الرجل الثاني
طبعاً متأكد أنو بدو يجي لهون , متل ماني متأكد انو نحنا لازم نروح لـ هونيك..
الرجل الأول
بتتوقع يجي اليوم ؟
الرجل الثاني
بتوقع يجي اليوم , وبتوقع كمان يجي مبارح ..
الرجل الأول
مايصير يجي مبارح ..!!
الرجل الثاني
بيصير , بيصر ...
الرجل الأول
ما فهمت !!!
الرجل الثاني
لحتى أنت تفهم , لازم أنا أفهم ..
الرجل الأول
شو بدك تفهم لحتى أنا أفهم ؟ !!
الرجل الثاني
لحتى أنت تفهم .. لازم أنا أفهم كيف بدي فهّمك شوبدي أفهم ... على كلٍ .. لحتى جاوبك على سؤالك لازم أنا أفهمك , ولحتى أفهمك لازم أفهم حالي لحتى أقدر فهّمك !! ولحتى أقدر فهّمك لازم أتأكد أنك عم تفهم , يعني عم تفهمني لحتى أنا أقدر أفهمك , عم تفهمني ؟!؟!
الرجل الأول
فهمت شو بدك تفهمني لحتى أنا أفهم عليك..
الرجل الثاني
منشان هيك اليوم بيصير مبارح .. لأنو بكرة رح يصير اليوم .. فحاول ما تتوقع شي من بكرة ويلي بدك تتوقعو حاول تتوقعو هلق بهاللحظة ... لأنو بكرة رح يصير مبارح وبعد بكرة رح يصير أول مبارح والمستقبل ما بيتحقق إذا ما عشنا هلق بهاللحظة ... فهمت هلق شو بدي أفهم أنا لحتى فهمك ؟!!( ينظر إليه ) هلق أنت فهمت ؟!؟!؟
الرجل الأول
فهمت .. بس اليوم مانو متل مبارح .. لأنو كل شي بيختلف عن كل شي .. اليوم غيرمبارح وهلق غير قبل هلق , السما الصبح غير السما الضهر, والسما الضهر غير السما العصر , والسما العصر غير السما المغرب , والسما المغرب غير السما بالليل ..وانا هلق غير أنا قبل هلق , أنا عم أتغير , وأنت كمان غير أنت لمّا إجيت لهون .. وأنا وأنا عم أتطلع فيك تغيرت , عم أحكي معك وغير حالي وأنت وعم تسمعني وتتطلع فيني عم تتغير فكيف مبارح رح يكون اليوم أو اليوم رح يكون مبارح ؟!؟!؟
الرجل الثاني
هاها أنت سألتني .. وبما أنك عم تفهم عليي شو عم فهّمك فأكيد رح تفهم عليي شو رح أحكي هلق .. الحياة .. حياتنا .. حياتنا حياة عادية ؛ ومو عادية ..
الرجل الأول
عادية ومو عادية ؟!!!؟؟
الرجل الثاني
" مؤكداً "عااادية ومووو عادية ... اللحظات العادية من حياتنا مو عادية ؛ بس نحنا منفكرها عادية , وحتى اللحظات الموعادية لحظات عادية ... تعى نتخيل الحياة الموعادية لأنو الحياة العادية عادية ..
الرجل الأول
كيف ؟!
الرجل الثاني
جربت شي مرة تشلح كل تيابك , كل تيابك هاه , وتمشي تحت المطر .. لتشوف شو رح يكون إحساسك ؟ أكيد لأ ..
جربت إنك تمشي عالزفت وهوي عم يغلي غلي لتشوف شو ممكن يكون إحساسك يلي رح يكون كتير مو عادي ؟ أكيد لأ ...
أو جربت شي مرة إنك تفوت لجواتك وترجع تطلع من جواتك وتتعامل مع براتك من خلال فوتاتك لجواتك وطلعاتك ؟ أكيد لأ ...
" يصرخ فجأة " هون جوهر الموضوع .. هون السّر.. السّر إنك تعمل من الشي العادي شي موعادي .. كل شي .. وهيك رح تحس أحاسيس مابتعرفها وهيك بتبلش الحكاية معك ....
الرجل 1
كيف ؟
الرجل 2
بتفكر بأفكار بحياتك العادية ما بتفكر فيها .. وهيك بتصير تشوف الاشياء العادية وكأنك بحياتك ماشفتها .. ووقتها رح تصير الأشياء العادية وكأنها مو عادية , وهيك بيعمل الواحد من العادي شي مو عادي .. هي أنا مثلاً : حملت شنتايتي ومشيت , مشيت من الصبح للصبح منشان سافر لـ هونيك ولمّا طلع الصبح اتطلعت عليه ؛ وفكرت بشغلات كنت فكر فيها على طول , بس حسيت إني أول مرة بحس بهالطريقة , حسيت أحاسيس أول مرة بحسها , هون , هون المعجزة .
الرجل 1
( وقد بدا ساهماً يفكر ... صمت قصير ) طوّل موهيك ؟
الرجل 2
أنت بتحسّ أنو طوّل , لأنك قاعد عم تفكر فيه وتستنى جيتو .. بس هوي بحياتو ما تأخر .. مستحيل أصلاً يتأخر .. دائما بيجي بالتوقيت المناسب .. ودائما هالتوقيت المناسب ما بيناسبنا .. ووقتها بس منحس بالعجز .. منشان هيك بنصحك تعيش طبيعي .. بتحسوّ إجى بسرعة .. أما إذا أنت قعدت واستنيت وانتظرت رح تحسوّ طوّل كتير كتير ..
الرجل 1
( وكأنه وصل الى نتيجة ما) يعني إذا بدنا ياه يجي بيطوّل ؟!! وإذا بدنا ياه يطول بيجي بكير؟ !!
الرجل 2
برافو , برافو . هلق بلشت تفهم ...
المشهد الثالث
( تتغير الاضاءة في هذه الأثناء ويتصاعد الدخان وكانها ردة فعل على بداية فهم الرجل , تتبدل الاضاءة لتصبح زرقاء , تضاء بقعة ضوئية تضيء حاوية الزبالة التي وقف في منتصفها كل من الرجل 1 والمرأة ...وكأنهما في حالة عشق .. )
المرأة
شبك حبيبي ؟
الرجل 1
مافي شي ؟
المراة
لأ في شي !!
الرجل 1
في شي , إي في شي ..
المرأة
وشو هالشي ؟
الرجل 1
أنا بدي كون انا ..
المرأة
وانا بدي كون انا ..
الرجل 1
إذا انا بدي كون انا .. وأنت بدك تكوني انت .. معناتا هني أكيد بدون يكون هني !
المرأة
حبيبي بكفي كل الضياع يلي عايشتو بحياتي , أصلاً مابعرف إذا أنا ؛ انا .. وإلا انت انت وإلا نحنا نحنا ..
الرجل 1
لازم نعرف , لأنو لازم أنا كون أنا , وانت تكوني انت , ونحنا نكون نحنا , وهني يكونوا هني , بس يلي محيرني أنا أنا وإلا هوي , وانت انت وإلا هيي , ونحنا نحنتا وإلا هني ...
( المرأة تمسك رأسها وكأنها ستجنّ , تمر فترة صمت قصير... يمر رجل عجوز في هذه اللحظة من امامهما يمثل شخصية بائع زهور, يمد يده ويناوله وردة وهو يتحدث بحديث مغاير تماماً لعملية البيع .. الممثل الذي يؤدي دور العجوز:)
العجوز
انتبه الكلمات متل حقل الألغام , الكلمات يلي كان لازم تقولها قولها , قولها وإلا هيي نفسها رح تنقلب ضدك بالوقت يلي مافيك تعمل شي .. قولها , أنت فجرها ولا تخليها تنفجر فيك .. فجرها..
( يتابع الممثل الذي يؤدي دورالعجوز بائع الورود طريقه ويخرج من بقعة الضوء , يعود الرجل 1 والمرأة الى حديثهما )
الرجل 1
بدي أسألك سؤال مهم ؟
المراة
أسألني سؤال مهم لشوف !
الرجل 1
فيكي تعرفي إذا أنت قدرتي تكوني أنت يلي كنت حابة تكونيها ؟
المرأة
ما بعرف , ( وكأنها تتذكر .. ) يلي بعرفوا أو بتذكروا , إني أول ما خلقت تعلمت أشياء كتيرة كتيرة على وحدة بعمري تفهما , كنت كتير صغيرة يا حرام , وكنت حس كل ما علموني شي متل كأنون حطو جبل فوق راسي وهيك بلش حملي التقيل من انا وصغيرة ..
الرجل 1
هي هيِّي .. قولي , أنا بقدر بعرف إذا أنت قدرتي تكوني أنت أو أنت صرتي هيي يلي كان بدك تكونيها ..؟!
المرأة
رح قول , رح قول , إيه وليش لحتى ما قول , ( وهي تنظر حولها وكأنها مراقبة أو خائفة ) من أول ما خلقت تعلمت إني إخرس .. إيه , تعلمت إني ما أحكي عن أكتر شي بيحرك مشاعري أو أحاسيسي , تعلمت إني خبي كل شي بيصير جواتي وما قولوا , وما كنت بعرف ليش , من لمّا كنت صغيرة تعملت إني أحكي كل شي ما بحس فيه , وبنفس الوقت حسيت بكتير شغلات أنا ما حكيتها , علموني احكي متلون , وصرت متلون هني , وضليت ضايعة وما قدرت إني أتعلم شي مني أنا من أنا يلي كنت حابة كونها ,لوقدرت .. مو بس هيك , هلق اكتشفت شغلة كتير مهمة , اكتشفت إني كل ما كنت ضيع أكتر كانوا يشجعوني أكتر , لحتى صرت بعيدة عن حالي , ضيعت حالي وصرت غريبة عني وعنون هني يلي كانوا مبسوطين كتير مبسوطين فيني أنا يلي مو انا , انا يلي هيي يلي هني بدون ياها , يعني أنا هلق مو أنا أنا هديك .. ( صمت قصير , تنظر إليه بعينين محمرتين دامعتين ) .. ليش ؟
الرجل 1
( باستغراب ) ليش شو ؟
المرأة
ليش فتحت عليي هالباب ؟ أنت بتعرف هالباب متل باب جهنم فيه نار بتحرق حرق , ليش بدك تحرقني ؟ ليش ؟
الرجل 1
ليش الواحد لمّا بعرف إذا كان هوي هوي , بينحرق ؟ العمى , لهالدرجة نحنا عاجزين عن مواجهة حالنا ؟ على كلٍ انا كتير آسف , ماكان قصدي , فكرت حالي عم ساعدك ..
المرأة
ولا يهمك , أنت فيك تجاوبني على نفس السؤال ؟
الرجل 1
( متفاجئاً ) أنا ؟ إيه ! لا , كمان انا ماقدرت كون أنا يلي كان لازم كونو , وما بعرف إذا كنت أنا هوي هوي , وإلا أنت أنت , وإلا نحنا نحنا , مابعرف , يلي بعرفو انك بتحبيني وهادا رح يساعدني على إني كون هداك يلي حابب كونو لو ماكنت انا هوي يلي كنت حابب كونو , لو مرة وحدة بحياتي..
( فجأة نسمع صافرة إنذار تطلق في المكان وكأنها تنبيه وتحذير .. يختفي الرجل والمرأة داخل الحاوية فترة صمت قصيرة )
( يدخل ممثل يؤدي دور بائع جرائد في مقتبل العمر وهو يحمل بيديه مجموعة من الجرائد المختلفة من بلدان العالم )
بائع الجرائد
أخبار .. أخبار هلق و أخبار ساخنة , تازى , شمّو ريحتها ... أخبار اللحظة , اخبار الآن ..
( وهو يقلب أوراق بعض الجرائد ومازال ينادي وكأنه يقرأ محتواها )..
هلق بهاللحظة في ناس عم تتعذب , يا لطيف , هلق بهاللحظة في ناس عم تموت , منون ماتوا بالرصاص ومنون ماتوا بالزلزال ومنون ماتوا بالقصف ( يقلب صفحات الجريدة وكانه ينتقل الى أخبار أخرى أكثر تفاؤلاً ) ..
هلق في هاللحظة في ناس عم ينخانوا , والتانيين عم يخون الأولانيين وهيك الى آخره , نصيحة لاتخون نفسك , اهم شي , ( يتابع تغيير الجريدة وتقليب الأوراق ) الآن يختفي الكثير من البشر , الآن تعقد الصفقات , تتم المصالحات , الآن هناك قاضٍ يقضي بالطلاق , الآن تضمد الجروح ( يقلب صفحة ) الآن يتحرر البشر .. ( يتوقف فجأة ) إيه والله ولاد الحلال ما خلّو شي لولاد الحرام .. الله يعينا على هالزمن .. ( يمر في هذه الأثناء شرطي وهو يصفر بصفارته التي تصدر صوتاً قوياً , فينجح بالقبض على بائع الجرائد )
الشرطي
شو عم تعمل هون ولك إبن الحلااال ؟
بائع الجرائد
عم لقّط رزقي , بلكي بيمر شي ابن حرام وبيشتري مني جريدة ...
الشرطي
كل يوم نفس الموال , كم بد يقلك ممنوع تبيع الجرايد هون ؟ يا يالله من هون لشوف ..
بائع الجرائد
( وهو يسير ببطء ) حاضر , رايح , رايح , أمرك ..
الشرطي
( يصرخ ) يخرب بيتك شو ابن حلال ..
بائع الجرائد
( وهو يسير يقول لنفسه وهو ينظر الى الشرطي ) والله أنت ابن الحلال , أنت وكل عيلتك ....
( يركض بائع الجرائد خارجاً من المسرح , الشرطي الذي يقوم بالجري وراءه وهو يصفر بصفارته صائحاً )
الشرطي
والله لأحرم ابن حلال فيكون يجي لهون ...( يخرج من المسرح ) .
المشهد الرابع
( رقصة عقارب الساعة , بحيث تدخل الراقصة أو الراقص الى المسرح من اليمن الى اليسار وبالعكس تؤدى أثناء ذلك الرقصة .. تنتهي الرقصة .. تضاء بقعة ضوئية الى يمين المسرح حمراء تقف بداخلها المرأة 1 وهي تحمل بيدها مظلة , والى اليسار تضاء بقعة زرقاء تقف فيها فتاة في مقتبل العمر تقف بداخل البقعة وتحمل بيدها مظلة ايضاً , يبدأ الحوار بين المرأتين وكأنهما امرأة واحدة .. )
الفتاة
وبعدين , هيك كتير .. مليت ..
المرأة 1
كل ما غابت الشمس بفكر شو ممكن بكرة سوي يلي ما قدرت سويه اليوم ..
الفتاة
يا ترى ممكن الأحلام تضل إذا هوي إجى ؟
المرأة 1
كل ما طلعت الشمس بفكر أعمل كل شي ما قدرت اعملو ..
الفتاة
راح مبارح , واليوم راح , بكرة بيجي وبيروح .. بكرة رح يروح ..
المرأة 1
كنت كتير حابّة ودّعو ..
الفتاة
الوداع ..
المرأة 1
دهاليز ,عتم , ذكريات رطوبة باردة ..
الفتاة
غرف مليانة أفكار وألبومات صور ..
المرأة 1
ليش لمّا منودع شي حدى , كل شي بيتغيّر .. ؟؟
الفتاة
رح ضل استنى للنهاية ..
المرأة 1
إذا ودعتو وراح , كيف رح يكون بدوني , والهم , كيف انا رح كون بدونو ؟
الفتاة
إذا راح اليوم بيجي بكرة ... وإذا إجى بكرة بسوي كل شي ماقدرت سويه , كل شي كنت حابة سويه !!! إذا راح اليوم بيجي بكرة .. كيف عم تروح هالأيام ؟!!!!
المرأة 1
يا ترى قبل ما يروح , قلتلو كل شي كان رزم قلّو ياه ؟ عملنا كل شي كان لازم نعملو ؟ حكينا لبعض كل شي كان لازم نحكيه ؟ وإذا حكينا كل شي كان لازم نحكيه يا ترى حسينا بكل شي قلناه لبعض ؟
الفتاة
لوين هني رايحين ؟ وليش هني رايحين , ونحنا رح نروح !! وإذا كانوا هني رايحين فليش قاعدين منتظرين , وإذا كانوا منتظرين يا ترى شو منتظرين ؟ والله عجيب غريب , رايحين ومنتظرين قاعدين ومو عرفانين ومفكرين حالون مو قاعدين , روحوا , تحركوا , ( تغلق المظلة , تنظر الى الجمهور .. ) وانتو بتعرفوا إذا كنتوا رايحين ؟ وإذا كنتوا رايحين ليش قاعدين ؟ ليش عم تطلعوا فيني ؟ ( تضع يدها على وجهها , ترتعد ) وينو ؟ وين راح , وين ضاع , ليش تركني لحالي ؟ وين وجهي , وين ضاع ؟ أنا هلق واقفة قدامكون بهداك الوجه يلي مولازم تشوفوه ؟ خليكون لاتروحوا بس لجيب وجهي وأرجع , هداك مناسب أكتر من هاد ..
( تخرج من المنصة)
المرأة 1
مسكينة , ظنت إنها ممكن تكون هيي , ولمّا عرفت إنها مو هيي يلي كان لازم تكونها قدامكون راحت تجيب غيروا منشان تصير هيي ,لأنها هلق مو هيي يلي بدكون ياها .. ( صمت ) .... مالازم كون انا مبسوطة , بدك تكون مبسوط , بدك تكون طيب , بدك تكون إنسان منشان هيك مانك هيك .. وإذا كان بدك تكون هيك لا تنبحت لتبرهن أنك هيك , لأنك إذا كنت هيك مافي داعي تبرهن انك هيك , أما إذا ما كنت هيك , وحبيت تكون هيك , فلا تبرهن على إنك هيك بتصير هيك اكتر ..
هوي راح , تركني وراح , أنا عم استناه , ولأيمت بدي استناه , مو المشكلة إني استنى , المشكلة إذا بدي استنى كيف لازم اتأكد أنو هوي نفسو يلي بدي استناه أحسن ما...( تصمت ) ..
( تغلق مظلتها , وتسير خارجة من المنصة , وتختفي على أثرها البقعة الضوئية الأولى والثانية , تضاء بقعة ضوئية رئيسية في منتصف المنصة لنرى الرجل 1 وهو يجلس في منتصفها وقد بدا ساهماً يفكر ولكنه جاحظ العينين , ويرتجف بعض الشيء ..وكان ما يحدث على المنصة هو ما يفكر به أو أنه خائف من حدوثه ) ..
الرجل 1
لحتى أقدر استناه لازم أعمل شي , لازم اشتغل .. لازم اشتغل وأعمل شي بيخلي الدهشة ترقص بعيون العالم , ولحتى اعمل شي مدهش لازم أتعلم أخلاق الشي يلي بدي اشتغلو , هون المشكلة هي الكلمة الضبابية المبهمة , آه , كل واحد بهالزمن ألو أخلاق خاصة , مافيا خلاق عامة , والأخلاق الخاصة لازم يعممها عالكل حتى لو كانت ما بتناسب , بينفرض عليك انك تتأقلم , كيف لازم اعرف وين المناسب , لنو المناسب إلي ما بيناسب غيري , ويلي بيناسب غيري بيجوز ما بيناسبني , منشان هيك لازم نرجّع الأخلاق العامة لأعمل شي بهالحياة ..... انا خايف .. برداااااان ... حاسس إني جنيت , يا إما وصلت للنهاية , يعني خلصت , بس انا لسّه ما خلصت يلي كان لازم خلّصّو ؟!! مارح أقدر اعمل شي , بس لأ , مارح استسلم ..لازم روح لـ هونيك , هون الصبح بيركض ورا الضهر , والضهر بيركض ورا العصر , والعصر بيركض ورا المغرب والمغرب بيركض ورا المسا , والمسار بيركض ورا الليل , وما منقدر نوقفون ولا لحظة , مربوطين ببعضون متل فركونات القطار , صح , فركونات القطار , وانا جوّاتو , جوّاتو وعم أركض , عم أركض جوّات القطار " يمثل " إجري اليمن بتمشي بتقوم اليسار بتلحقها, بتقوم اليمن بتحاول تسبق اليسار , بتقوم اليسار بتحاول كمان تسبق اليمين , وهيك , يمين يسار , يسار يمين , يمين يسار , يسار يمين , كل وحدة عم تحاول تسبق التانية وانا عم أركض , وما عم أقدر وقّف , أجريي عم يركضو , وانا جوّات القطار , والقطار عم بيركض بسرعة كبيرة ( وهو يمثل الركض بأقصى سرعة ) ومابقدر وقّف إجريي , ولا القطار فيني وقفّو,نحنا كلّنا جوّات القطار , كيف لازم نركض ونسبق القطار ؟ كيف بدنا نسبق القطار ونحنا ما منعمل شي ؟ لحتى تحول العادي الى خارق , منشان هيك كل شي بيجي لعنا منشوفوا اختراع ..آآآآخ راسي,راااااسي, آآآآآخ ..( ينهار في المكان, نسمع في هذه الأثناء صوت القطار الذي يقطع الخشبة بسرعة هائلة ... صمت , نسمع بعدها أجراس المحطة .. ) (يدخل في هذه الأثناء الرجل 3 الذي يتشح بالسواد بشكل أنيق وجذاب , هادئ , واثق , قوي , ابتسامة لا تفارق شفتيه .. )
الرجل3
( وهو ينظر الى الرجل 1 ) قوم , قوم إمشي معي !!
الرجل 1
مابدي ..
الرجل 3
اسماع مني , انا بحللك كل هالمشاكل !!
الرجل 1
كل هالمشاكل منك انت , وإذا حليتها مابيصفي إلك وجود ..
الرجل 3
اسماع مني ما بتندم ..
الرجل 1
مابقدر , مابقدر روح ..
الرجل 3
جرّب وتعى معي وشوف !
الرجل 1
أمثالك معروفة طرقاتون , ولوين بتودي ..
الرجل 3
واحد متلكع ندو كل هالإبداع , بيحكي هيك , وين حسّ المغامرة عندك ..
الرجل 1
حس المغامرة موجود , بس المقامرة ما بحبها ..
الرجل 3
مافيك تضل تتحداني للنهاية أنا أقوى منك , وبالآخر رح تجي لعندي برغبتك وتمشي معي , ووقتها أنا مارح أقبل آخدك ..
الرجل 1
يلي بدي أفهمو أنت شو بدك مني , ليش لاحقني من مكان لمكان ..
الرجل 3
أنت بتعرف منيح شو بدي منك .. ولي شانا وراك على طول .. ماشي إذا كنت نسيت رح ذكرّك..انا بدي ىخد منك كل شي عملتو,وشو بدك مقابل بعطيك , أنت بس أطلب وتمنى ..
الرجل 1
أنا مارح أعطيك شي ..
الرجل 3
رح تعطيني شئت أم أبيت,فالأفضل أنك تعطيني كل شي برغبتك احسن ما ىخدهون بالقوة ..
الرجل 1
قلتلك مارح تغويني , مارح تقدر تاخد مني شي , انت عم تطلب اغلى وأهم شغلة بحياتي ..روحي معلقة فيون إذا عطيتك ياهون رح تملكني تماما ووقتها رح صير تابع ألك وخادم ..
الرجل 3
ومع هيك رح آخد منك كل شي ..
الرجل 1
شو بدك تعمل بكل شي ؟
الرجل 3
رح احرق كل شي باخدو منك , بدي أحرق كل شي..
الرجل 1
ليش ؟
الرجل 3
بدي استمتع , أنا بحب النار , ومنظر النار , الألوان يلي بتفرشها النار , ألوان , أصفر , برتقالي ,أزرق , أخضر ,أحمر ..
الرجل 1
مارح تقدر تاخد شي ..( يحاول الرجل 1 الهروب من المكان , لكنه يتوقف فجأة بعد سماع صوت الرجل 3 )
الرجل 3
وقّف محلك ولا تتحرك ولا حركة .. ( وقد أشهر مسدسه )
الرجل 1
ليش ؟ ليش ؟ ليش عم تعمل هيك ؟
الرجل 3
رح قلك وبصراحة مطلقة حتى لو كانت هالصراحة كتير فجة ... بدي آخد كل شي منشان ماحدا يستفاد منها غيري انا , أنا اهم شي , مابدي حدا يشوف ألوانك غيري , منشان ماحدا يتهنى بأي شي عملتو غيري ..
الرجل 1
معناتا ( وقد استجمع قواه وكانه حسم امره , فيقف مواجهاً للرجل 3 قائلاً ) الأفضل أنك تسدد منيح وتطلق هالرصاصة من مسدسك على صدري ..
الرجل 3
أنا بقرر هالشي , ورح قلك إني فعلاً رح خلي الطلقة تلعب بجسمك لعب ..
الرجل 1
وانا جاهز ..
الرجل 3
مانك خايف تموت ؟
الرجل 1
خايف إني موت , شي طبيعي الواحد يخاف من الموت ..
الرجل 3
خايف , وعم تفتح صدرك لأطلق الرصاص عليه ..؟ !!
الرجل 1
الموت اهون من الاستسلام لأمثالك ..
الرجل 3
إذا متت رح ينتهي كل شي بالنسبة ألك ..
الرجل 1
أنت هيك بتفكر ..
الرجل 3
ليش أنت عنيد لهالدرجة .. عم قلك اعطيني كل شي بربحك حياتك , ليش مُصّر إنك تموت ؟ انت بتعرف غني فعلاً بقدر أقتلك وآخد كل شي غصباً عنك , فليش ما بتعطيني كل شي بدون ما تموت ؟ إذا عطيتني ياهون , ما بقتلك ..
الرجل 1
الموت اهون عندي من إني أعطيك ياهون برغبتي , لازم تعرف إني إذا كنت خايف من الموت فهالخوف بيروح لمّا بيكون على إيد أمثالك , لأنك انت وأمثالك أعداء أعداء كل شي منيح , أنتو ما بتعرفوا غير القتل , ما بتشوفوا , ولا بتقدروا ولا بتسمعوا ولا بتعرفوا قيمة أي شي ..الشي الوحيد يلي خلاني إني أهرب من الموت هوي إني لازم أعمل وكمّل الشي يلي لازم اعملو قبل ما موت ..
الرجل 3
مفكر حالك ذكي وقادر تخدعني ؟
الرجل 1
مشكلتك انك بتفكر انو كل الناس بتفكر متلك ..تفكيرك محدود.. اسماع , خلينا ننهي الموضوع , مني مارح تاخد شي .. ليش عم ترجف , لا تخاف , لا تخاف هيي لحظة , رمشة عين وبيخلص كل شي وبتاخد كل شي ..
الرجل 3
حاول تقاومني ؟
الرجل 1
مستحيل أعطيك شرعية انك تاخد كل شي , إذا انا قاومتك وانت قتلتني رح يكون في صراع واحد مننا لازم يربح , وبما غني ما بحب الأذى , فأكيد انت الرابح , وهيك بيحقلك تاخد كل شي .. بيصير من حقك ..
الرجل 3
الموت وقتها شرف ..
الرجل 1
مقاومتي لإغوائك كل هالزمن هيي أكبر شرف عندي , هي بحد ذاتها شرف .. هالوقفة هي أشرف بكتير .. مقاومة أمثالك يلي ما بيسمعوا ولا بيحبوا ولا بيخلوا حدا يحب هيي الشرف الأكبر , انت عم تخدعوا حالكون , انتوا ولادكون ما بيحبوكون , وبيعرفوا حقيقتكون تماماً , أنت هلق رح تضغط على الزناد والطلقة رح تطلع وتمشي بخط مستقيم باتجاه صدري , بس الطلقة مارح تقدر تصيب صوتي , ولا كلماتي , وهي كانا باقي , فيك تقتلني بس ما فيك تقتل صوتي وكلماتي وأفكاري لأني الأقوى ..
الرجل 3
( وكأنه يبوح ) بس بدي أفهم من وين بتجيب هالقوة هي , معك حق , أنا بغار منك , من شغلك الناجح , من عزيمتك , بس انا حابب أفهم غيرون هني , بدي اسمع , بدي اعرف كيف بتحب شغلك , كيف قدرت تحافظ على أخلاقك الخاصة والعامة , على مبادئك ..
الرجل 1
اسمع , انا ماعاد بدي ضل , بلا مانضيع الوقت , خلصني , انا ماعاد يهمني شي بهاللحظة , يا الله سدد على قلبي مباشرة ..
الرجل 3
( وكأنه غضب ) بعملها هاه ؟!
الرجل 1
ماعاد فارقة معي , بس حابب قلك شغلة كتير مهمة ألك ولأمثالك..حاول تحب شي مرة عنجد,حاول ما تأذي حدا,حاول تساعد إذا قدرت,حاول تعرف أنك مو لحالك هون,ولا حتى هونيك ما فيك تكون لحالك..حاول تعمل كل شي فيك تعملو بدون مقابل بدون اجر .. أنا هلق جاهز , سدد , ليش هيك خفت( يختفي الرجل 3 من المنصة الرجل 1 ينظر حوله وقد جحظت عيناه ) وين رحت , وين نحنا , نحنا هون وإلا هونيك , جوى وإلا برى .. ( نسمع صوت القطار القادم من بعيد وقد توقف في المحطة , يسير الرجل 1 والرجل 2 باتجاه القطار المفترض وقد حمل كل واحد منهما حقيبته , الرجل 1 وهو يسير باتجاه العمق , ينظر إلى الجمهور ويقول ) ستكملون من بعدي كما أكملت انا عن غيري , كما أكملتم عن غيركم .. ولكن حاولوا أن لا تسرقوا أنفسكم وأرواحكم , لأن الثمن غالٍ جدا .. حاولوا دون ان تنهزموا , نحن جميعاً أقوياء , سندوم بعضنا ببعض سنستمر بعضنا ببعض .. الوداع ..
النهاية
ملاحظة :
اتمنى عدم إخراج هذا النص
او الاقتباس أواعداده
دون موافقة المؤلف
للتواصل مع المؤلف مجد يونس احمد
majdyounesahmad@gmail.com
موبايل : 00963945410570 -00963944565571
0 التعليقات:
إرسال تعليق