مسرحية "عيد ميلاد عجوان" تأليف عصري فياض
مجلة الفنون المسرحية
شخوص المسرحية :
حديدون : رجل في الستينيات من العمر
عجوان : رجل في ال67 من عمره
وآخرون
المشهد الأول
حديدون ستيني العمر يلبس بجامة بيضاء ويضع على رأسه طاقية ويسير في بيته صباحا بتثاقل، ويتجه نحو المذياع، ليفتح على برنامج ما يطلبة المستمعون)
تبدأ المذيعة التي تقدم البرنامج بالحديث: من عبد السلام الى جدته الغالية ختام وخالته العزيزة اكرام
من ندى وصدى وفضى الى ابن العم مطلق بمناسبة زواجه الثالث وعقبال الفاتورة الرابعة من عزام وعصام وانعام الى الاخ الغالي بسام بمناسبة المولود الجديد سمتايم
من الوالد والوالدة والاخوة والاخوات الى ولدهم الطفل الغالي ربيع بمناسبة اطفأءه الشمعة الثالثة........ الله يبعد عنك اليباس يا ربيع...
اليهم جميعا اقدم اغنية "يقصف عمرك محلاك" للمطرب طايش الشعنون
حديدون يغلق المذياع ويقول : سدي نيعك ......... ملا ناس ما بتستحي ولا بتذوق تفهتوا الفن ... كلشي صار شوربه... الله يرحم ايام قبل... بس بقى فهد بلان يقول اركبنا عالحصان.... ما يظل ولا راس خليل بالبلد جوى البيوت .. كله عالسبق...
( يتوجه نحو المنضدة ويفتح المذكرة ويقول )
ماعلينا ... بدنا نشوف برنامج اليوم شو في عنا ...
اليوم 8/8 عيد ميلاد عجوان اه ها... والله اني ناسي... يخلف على هالدفتر... والله عجوان عزيز وغالي
لازم انذكره .. اكيد هو كمان ناسي... وهيك بدو هدية تليق بمقامه
(ينظر الى الساعة ) معقول بعدو نايم .. تانلبس ونمد تلاه ..
يخرج
ستارة
المشهد الثاني
في بيت عجوان
(عجوان يغط في نوم عميق ، وشخيره يملاء المكان) يدخل حديدون وهو ينادي عدة مرات
حديدون : عجوان ... هي يا عجوان
عجوان ........ هي يا عجوان
(عجوان غارق في النوم والشخير)
حديدون : ولك عجوان..... ( يدفع الباب ويدخل)
حديدون : يا ساتر ... كنه الزلمة بعدو نايم...( يلكزه) عجوان هي عجوان .. فيق يا زلمة صارت الدنيا الضحى..
(عجوان مستمر في نومه وشخيره)
(مشيرا الى شخيره) حديدون : شغال رايح جاي .. ور ور موجه طالعة وموجه نازله ... تقول مؤشر بورصة
ول شو هاظ ماتور تراكتور.......... اجربن عنه كل سنتين بغيير سقف حلقه ... اكيد مع هالشغل سقف حلقه بدو يهتري....
(حديدون يدفع عجوان بقوة ) أي قوم فز.......
عجوان ( كالمصروع): ها........ مين .......... وين
حديدون : اسم الله عليك ..... سعد الدين سيدك ......... قوم استفتح اظهرت الدنيا
عجوان (يتثاءب) :كيف فتت؟
حديدون : بابك مفتوح
عجوان : على ايش بدو يخاف الواحد.... مهي الفيران هجرتني.... الله يستر عليها بنتي صنيبعة تفقدني بلقمة اكل من يوم ليوم
حديدون : تعملش حالك مسكين .. فز قوم..... انت عارف شو هو اليوم؟؟
عجوان : انا بعرف شو اكلت امبارح تاقلي شو اليوم؟؟
حديدون :اليوم 8/8
عجوان : اه يعني والشو 8 /8
حديدون : اليوم عيد ميلادك.. مثل اليوم قبل 67 سنة فرخت اول صوت بحياتك...
(عجوان ينهض من الفراش) ويقول : اه شو يعني عيد ميلادي .. شو صار ... وشو بدو يصير .. واصلا شو بعنيلي هذا اليوم ... بس يوم المصاعب.. الله يرحمها امي كانت دائما تقول يوم اسود يوم ما جيت عالهدنيا يا عجوان الغضيب
حديدون : لع لع لع ........ لا تستخف بحالك... انت زلمة غانم وابن أصل........ مستقبلك بستناك...
عجوان : ايوه ........ بعد 67 سنة شقى ولعانة حرسي بقلك مستقلبك بستناك... جاي تنقش راسك علي؟؟
حديدون : انا .... استغفر الله ...
عجوان : لعاد فكنا من هالسيرة وقوم ساوينا كاستين شاي
حديدون : على راس هس بقوم .. بس انا جاي اقلك انو اليوم المساء بدنا نعزم هالاصحاب والاصدقاء عندك هون في دراك ونجيب كعكه وحلويات وشموع ونعملك عيد ميلاد.... يا اخي بدنا نفرح
عجوان : انت بتحكي عن جد؟؟
حديدون : والله ما بمزح... وانا جاي لهون عزمت اكم واحد وانا مروح من هون بكمل عزايم على الباقين..
عجوان : بدك تفضحني.... ولك انت شاورتني بالاول؟؟
حديدون : يا حبيبي يا عجوان ......... انا في الاشي الي في الك مصلحة في ما بشاروك ..... وهاي الحفلة لصالحك
عجوان : كيف لمصلحتي ؟؟
حديدون : اولا التكلفة علي انا شخصيا ، وثانيا وهو الاهم كل ضيف راح يجي راح يجيب معاه هدية ، اشي بيجب طقم قزاز .. واشي بجيب طنجرة .. واشي بجيب ابرايق شاي.. واشي بجيب مش عارف ايش ... وهيك بعمر بيتك يا عجوان
عجوان : بس عيب بهالعمر اعمل عيد ميلاد
حديدون : ليش عيب والله انك معقد ... مهمو رؤساء دول وملوك وامراء بعملوا عيد ميلاد .. وكل صغير وكبير بعمل عيد ميلاد ......... مالك يا زلمة .. كنك مش عايش بالهدنيا.
عجوان : بس انا بستحي
حديدون : لا تستحي ولا عبالك.... هسا بساوي شاي..... وانت بتروح بتتحمم و بتزبط حالك للحفلة
عجوان : دخلك الحفلة مختطلة؟؟
حديدون : لع ... ليش بتسأل؟؟
عجوان : اذا مختلطة لازم اتحمم ... واذا بس للزلام ....... مفش داعي اتحمم
حديدون : اتحمم يا عجوان اتحمم ... هاي حفلة معتبرة .. احنا بدنا نلعب
عجوان : والله ما من وراك الا الغلبة
(عجوان يدخل الحمام وحديدون يدخل المطبخ)
ستارة
المشهد الثالث
مساءًفي بيت عجوان، حديدون وعجوان وجمع غفير من الرجال حضروا للاحتفال، جميعهم يقفون حول طاولة وضع عليها
قالب كبير من الكعك يقارب بحجمة عجل الجرار الصغير، وفي الوسط شمعة ضخمة، ويدور حديث كثير وفوضى في الكلام)
حديدون : يا شباب ... لو سمحتوا ........ سمع .......... سمع يا شباب
(يهدئون) (يصعد حديدون على الكراسي) ويقول : انا عريف الحفل ....... اهلا وسهلا بيكم باسمي وباسم اخوي عجوان بنرحب فيكم ومية اهلا وسهلا مرة ثانية بهاي المناسبة السعيدة وهي مناسبة عيد ميلاد عجوان المحترم
انا بهاي المناسبة كتبت للاخ العزيز والغالي عجوان قصيدة اسمحوا لي اقراها عليكم
(الجميع يصفق)ويقولون : اقرأ . هات سمعنا
(يخرج حديدون من جيبه ورق ويبدأ يقرأ)
حديدون : عجوان عيدك هل قبل السجى
والقمر نور والبدر اجى
لما بتضحك سنك بخضر
ولمال بتغضب بيطير من حوليك العجعجا
(تصفق) ويكمل حديدون:
عجوان امك توحمت على كوم سباع
تخسى من بعدك الزلم وتتضبضب من طريك الضباع
اطفي الشمع بيومك المزيون
واحمل بين ايدك ورد وحنون
وارمي الشيطان بجمر قلبلك
وغرد بصوتك يا كاظم ويا سعدون
(تصفيق حاد) يكمل :
عجوان على خدودك فتح ورد نيسان
وعلى راحتك كرم وجود لكل انسان
ابشر بطول العمر... ابشر يا احسن واحد بالبلد وافصح ما خلفت النسوان
الجميع يصفق بحدة ويغنون معا : يا مرحبا باك يا موت
حديدون : بس خلص ... بس صوت يا جماعة الان بدنا نطفي الشمعة ونغني لحبيبنا عجوان مع بعض
شايفين الكعكعة قد عجل التركتور.. ولا الشمعة تقول عمود كهربا
يا الله طفو الضي طفوا الضي .. خلي الجو يصير رومانسي........
(يطفئون الاضواء)
ويقودون الشمعة ويغنون سنة حلوة يا عجوان
سنة حلوة يا عجوان ........ سنة حلو سنة حلو سنة حلو يا عجوان....
ويقولون لعجوان : انفخ يا عجون ... انفخ يا عجوان
عجوان( يفتخ بقوة، ويقترب براسه من لهب الشمعة الكبيرة) وهم يقولون : انفخ يا عجوان ... انفخ يا عجوان
عجوان مستمر بالنفخ، لكن الشمعة من كبر لهبها لم تنطفىء)
( الجميع يرفع الصوت ) انفخ يا عجوان ذبحتنا
(عجوان يقترب اكثر من الشمعة فتندلع النار في كوفيته)
حديدون : ولكم الزلمة ولع انحرق هاتوا ميّ
( تحصل فوضى)( يخرج حديدون ويأتي بسطل من الماء ويرشقه على رأس ووجه عجوان فتنطفئ النار)
ستار
0 التعليقات:
إرسال تعليق